തൃശൂര്: എടത്തിരുത്തിയില് യുവാവിനെ കുത്തിക്കൊലപ്പെടുത്തിയ കേസില് പ്രതി അയ്യന്പടി സ്വദേശി കൊട്ടാരത്തില് വീട്ടില് അനൂപ് (42) അറസ്റ്റില്.
തൃശൂര് റൂറല് പൊലീസ് ആണ് അനൂപിനെ അറസ്റ്റ് ചെയ്തത്.എടത്തിരുത്തി കാളിക്കുട്ടി സാംസ്കാരിക നിലയത്തിനു സമീപം വട്ടപ്പുള്ളി വീട്ടില് അനീഷ് (43 ഞായറാഴ്ച രാത്രിയാണ് കൊല്ലപ്പെട്ടത്.ഞായറാഴ്ച വൈകുന്നേരം ഏഴോടെ അനീഷും അനൂപും ഉള്പ്പെടെ അഞ്ചംഗ സുഹൃത്തുക്കള് അയ്യന്പടിയിലെ സുഹൃത്തിന്റെ വീട്ടില് മദ്യപിച്ചു.
പുറത്തിറങ്ങിയ ശേഷം രാത്രി എട്ടോടെ അനീഷും അനൂപും തമ്മില് തര്ക്കമുണ്ടായി.തുടര്ന്നുള്ള വൈരാഗ്യത്തില് അനൂപ് കൈയിലുണ്ടായിരുന്ന കത്തി ഉപയോഗിച്ച് അനീഷിന്റെ വയറ്റില് കുത്തുകയായിരുന്നു.
കുത്തേറ്റ അനീഷിന്റെ നിലവിളി കേട്ട് തൊട്ടടുത്ത് താമസിക്കുന്ന ജ്യേഷ്ഠന് സന്തോഷും പരിസരവാസികളും ഓടിയെത്തി ഉടന് തന്നെ ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. സ്ഥലത്തുനിന്ന് രക്ഷപ്പെട്ട പ്രതി അനൂപിനെ അയ്യന്പടി ഉന്നതിയിലെ ബന്ധു വീട്ടില് നിന്നാണ് പിടികൂടിയത്.
ഇയാള് കയ്പമംഗലം, മതിലകം, കാട്ടൂര് പോലീസ് സ്റ്റേഷനുകളിലായി അഞ്ച് ക്രിമിനല് കേസുകളില് പ്രതിയാണ്.
