ന്യൂദല്ഹി: നീറ്റ് ചോദ്യപേപ്പര് ചോര്ച്ചയുമായി ബന്ധപ്പെട്ട സിബിഐ അന്വേഷണം നാഷണല് ടെസ്റ്റിങ് ഏജന്സി (എന്ടിഎ)യിലെ ഉന്നതരിലേക്ക്. ചോദ്യപേപ്പര് ചോര്ച്ചയില് എന്ടിഎയിലെ ഒരു ഉന്നത ഉദ്യോഗസ്ഥന് സിബിഐയുടെ നിരീക്ഷണത്തില്.
നീറ്റ് പരീക്ഷയ്ക്ക് ചോദ്യപേപ്പര് തയാറാക്കാനായി ചുമതലപ്പെടുത്തിയ വിദഗ്ധസമിതിയിലെ അദ്ധ്യാപകരും അറസ്റ്റിലായതോടെയാണ് എന്ടിഎ ഉന്നതനിലേക്കും അന്വേഷണം നീളുന്നത്. ചോദ്യപേപ്പര് ചോര്ച്ചയില് എന്ടിഎയ്ക്കുള്ളിലുവര്ക്കും പങ്കുണ്ടെന്നാണ് സൂചന. പൂനെയില്നിന്ന് അറസ്റ്റിലായവരില് നിന്നാണ് അദ്ധ്യാപകരെക്കുറിച്ച് സൂചന ലഭിച്ചത്. തുടര്ന്നാണ് ലാത്തൂരിലെ കെമിസ്ട്രി പ്രൊഫസറായ പി.വി. കുല്ക്കര്ണി, പൂനെയിലെ ബയോളജി പ്രൊഫസറായ മനീഷ മന്ഥാരെ എന്നിവരെ സിബിഐ അറസ്റ്റ് ചെയ്തത്.
എന്ടിഎയിലെ ഒരു ഉന്നത ഉദ്യോഗസ്ഥന് മുഖേനയാണ് മനീഷയ്ക്ക് ഏപ്രില് 27ന് ചോദ്യപേപ്പറുകളും ഉത്തരസൂചികകളും ലഭിച്ചതെന്നാണ് റിപ്പോര്ട്ട്. കുല്ക്കര്ണിയില്നിന്ന് ചോദ്യങ്ങള് കരസ്ഥമാക്കിയ മനീഷ കേസിലെ മറ്റൊരു പ്രതിയായ ധനഞ്ജയ് ലോഖാന്ധെ ഉള്പ്പെടെയുള്ളവര്ക്ക് വില്ക്കുകയായിരുന്നു.
കുല്ക്കര്ണിയുടെ വീട്ടില് പരീക്ഷാ പരിശീലനത്തിനെത്തിയ കുട്ടികള്ക്കും ഇതേ ചോദ്യങ്ങള് പറഞ്ഞുകൊടുത്തിരുന്നു. മേയ് മൂന്നിലെ പരീക്ഷയ്ക്കുശേഷം മനീഷയും കുല്ക്കര്ണിയും ഉള്പ്പെടെയുള്ളവര് ചോദ്യങ്ങള് അടങ്ങിയ കുറിപ്പുകള് നശിപ്പിച്ചതായും റിപ്പോര്ട്ടിലുണ്ട്.
നീറ്റ് ചോദ്യപേപ്പര് ചോര്ച്ചയില് ഇതുവരെ രണ്ട് അദ്ധ്യാപകരടക്കം ഒന്പതുപേരാണ് അറസ്റ്റിലായത്.
