കോട്ടയം: തപസ്യ സാംസ്‌കാരികോത്സവത്തിന്റെ ഭാഗമായി സംഘടിപ്പിച്ച ചിത്രപ്രദര്‍ശനം കലാസ്വാദകരുടെ ശ്രദ്ധ പിടിച്ചുപറ്റി. സുവര്‍ണോത്സവാഘോഷങ്ങളുടെ ഭാഗമായി ഫെബ്രുവരി 22-ന് കോട്ടയത്ത് നടന്ന “സുവര്‍ണചൈത്രം” ചിത്രകാരസംഗമത്തില്‍ രൂപംകൊണ്ട ചിത്രങ്ങളാണ് പ്രദര്‍ശനത്തില്‍ ഉള്‍പ്പെടുത്തിയത്.
“സ്വത്വം” എന്ന വിഷയത്തെ ആസ്പദമാക്കിയാണ് ചിത്രങ്ങള്‍ രചിച്ചത്. കലാകാരന്മാര്‍ കണ്ടതും അനുഭവിച്ചതും അവരുടെ ഉള്ളില്‍ രൂപപ്പെട്ട ചിന്തകളും ഭാവനകളും വര്‍ണങ്ങളിലൂടെ ആവിഷ്‌കരിച്ചപ്പോള്‍ ഓരോ ചിത്രവും വ്യത്യസ്ത അനുഭവമായി മാറി.
മൊത്തം 51 ചിത്രങ്ങളാണ് പ്രദര്‍ശനത്തില്‍ ഒരുക്കിയത്. പ്രകൃതിദൃശ്യങ്ങളില്‍ നിന്ന് പ്രതീക്ഷകളിലേക്കും സ്വാതന്ത്ര്യസ്വപ്‌നങ്ങളിലേക്കും സഞ്ചരിക്കുന്ന ചിത്രങ്ങള്‍ സന്ദര്‍ശകരെ ആകര്‍ഷിച്ചു. കൂട്ടിലകപ്പെട്ട തത്തയുടെ ചിത്രത്തില്‍ സ്വാതന്ത്ര്യത്തിന്റെ സ്വപ്‌നം നിറഞ്ഞുനിന്നപ്പോള്‍, മുറിച്ചുമാറ്റിയ മരത്തില്‍ നിന്ന് മുളച്ചുവരുന്ന പുതു ഇല പ്രതീക്ഷയുടെ പ്രതീകമായി. ചിന്തയിലാഴ്ന്ന പെണ്‍കുട്ടി, സി.എം.എസ് കോളേജിന്റെ ദൃശ്യങ്ങള്‍, ബുദ്ധന്റെ ശാന്തമുഖം, നഗ്‌നസന്യാസി, തെയ്യം, മരത്തിലിരിക്കുന്ന പക്ഷിക്കൂട്ടം എന്നിവയും പ്രദര്‍ശനത്തിലെ ശ്രദ്ധേയ ചിത്രങ്ങളായി.തപസ്യയുടെ അന്‍പത് വര്‍ഷത്തെ വളര്‍ച്ച ചിത്രശലഭത്തിന്റെ ജീവിതചക്രത്തിലൂടെ ആവിഷ്‌കരിച്ച ചിത്രവും പ്രദര്‍ശനത്തിന്റെ പ്രധാന ആകര്‍ഷണമായി.
1975-ല്‍ തപസ്യ രൂപംകൊള്ളുന്നതിനെ ചിത്രശലഭത്തിന്റെ ജനനഘട്ടമായി ചിത്രീകരിച്ച കലാകാരന്‍, തുടര്‍ന്ന് വളര്‍ച്ചയുടെ വിവിധ ഘട്ടങ്ങള്‍ കടന്ന് 2026-ല്‍ പൂര്‍ണരൂപം പ്രാപിച്ച മനോഹരമായ ചിത്രശലഭമായി മാറുന്നതാണ് ചിത്രത്തില്‍ അവതരിപ്പിച്ചത്. തപസ്യയുടെ ചിഹ്നവും ചിത്രത്തില്‍ ഉള്‍പ്പെടുത്തിയിരുന്നതിലൂടെ സംഘടനയുടെ സാംസ്‌കാരിക യാത്ര പ്രതീകാത്മകമായി വരച്ചുകാട്ടി.
