ലെന്സ്: ഫ്രഞ്ച് ലിഗ് വണില് ഒരിക്കല് കൂടി കിരീടം ചൂടി പാരിസ് സാന്റ് ഷാര്മെയ്ന്(പിഎസ്ജി). ലൂയിസ് എന്റിക്വെയുടെ കീഴിലുള്ള ടീം ചാമ്പ്യന്സ് ട്രോഫി കിരീടപ്പോരിലേക്ക് യോഗ്യത നേടിയിരിക്കെയാണ് നാട്ടില് തുടര്ച്ചയായ അഞ്ചാം തവണയും ലീഗ് ടൈറ്റില് ഉറപ്പിച്ചത്. കിരീടനേട്ടത്തിനായി ഒരു സമനില മാത്രം മതിയെന്നിരിക്കെ തൊട്ടടുത്ത എതിരാളികളായ ലെന്സിനെ അവരുടെ തട്ടകത്തില് 2-0ന് തോല്പ്പിച്ചതോടെയാണ് പിഎസ്ജി ടൈറ്റില് നിലനിര്ത്തിയത്.
ലീഗില് പഎസ്ജിയുടെ 14-ാം നേട്ടമാണിത്. 2022 മുതല് മുടങ്ങാതെ നേട്ടം കൊയ്യുന്നു. ലെന്സിനെതിരായ നിര്ണായക വിജയത്തോടെ പിഎസ്ജിക്ക് ലീഗില് 76 പോയിന്റായി. പട്ടികയില് രണ്ടാമതുള്ള ലെന്സിന് 67 പോയിന്റേ ഉള്ളൂ. ഇനി രണ്ട് മത്സരങ്ങള് മാത്രം ബാക്കിനില്ക്കെ ലെന്സിന് പരമാവധി നേടാനാകുക 73 പോയിന്റ് മാത്രം.
അടിമുടി പിഎസ്ജി നിയന്ത്രിച്ച മത്സരത്തില് രണ്ട് പകുതികളിലും ഓരോ ഗോള് വീതം നേടിയാണ് തകര്പ്പന് വിജയം സ്വന്തമാക്കിയത്. 29-ാം മിനിറ്റില് ഖ്വിച്ച ക്വാറത്സ്ഖീലിയ നേടിയ മികച്ച ഗോളോടെ പിഎസ്ജി ലീഡ് ചെയ്തു. ഈ ഒരൊറ്റ ഗോളില് ടീം ജയം ഉറപ്പിക്കാന് പോകുന്ന നിമിഷത്തിലായിരുന്നു അടുത്ത ഗോള്. പകരക്കാരനായി ഇറങ്ങിയ ഇബ്രാഹിം എംബായെ(90+3) ആണ് സ്കോര് ചെയ്തത്.
