ന്യൂദല്‍ഹി :ശബരിമല യുവതി പ്രവേശനം സംബന്ധിച്ച പുനഃപരിശോധന ഹര്‍ജികള്‍ സുപ്രീംകോടതി വിധി പറയാന്‍ മാറ്റി.ചീഫ് ജസ്റ്റിസ് സൂര്യകാന്ത് അധ്യക്ഷനായ ഒമ്പത് ജഡ്ജിമാരുടെ ഭരണഘടനാ ബെഞ്ച് 16 ദിവസം വാദം കേട്ട ശേഷമാണ് വിധി പറയാന്‍ മാറ്റിയത്.
കക്ഷികള്‍ക്ക് കൂടുതല്‍ വാദങ്ങള്‍ ഈ മാസം 29നകം രേഖാമൂലം സമര്‍പ്പിക്കാം.
സാമൂഹിക പരിഷ്‌കരണത്തിന്റെ പേരില്‍ ഭരണഘടന ഉറപ്പുനല്‍കുന്ന മതസ്വാതന്ത്ര്യം ഹനിക്കാനോ അതിലേക്ക് കടന്നുകയറാനോ കഴിയില്ലെന്ന് ജസ്റ്റിസ് ബി.വി. നാഗരത്‌ന അഭിപ്രായപ്പെട്ടിരുന്നു.ഓരോ മതസ്ഥാപനത്തിന്റെയും പ്രവര്‍ത്തനത്തിന് ചിട്ടവട്ടങ്ങളുണ്ടായിരിക്കണം. ക്ഷേത്രമായാലും ദര്‍ഗയായാലും അരാജകത്വം അനുവദിക്കാനാവില്ലെന്നും വാദത്തിനിടെ സുപ്രീംകോടതി നിരീക്ഷിച്ചു.
2018 സെപ്തംബറിലാണ് അഞ്ച് ജഡ്ജിമാരുടെ ഭരണഘടനാ ബെഞ്ച് ഭൂരിപക്ഷ വിധിയിലൂടെ (4: 1) ,10നും 50 നും ഇടയില്‍ പ്രായമുള്ള സ്ത്രീകള്‍ക്ക് ശബരിമല ക്ഷേത്രത്തില്‍ ഏര്‍പ്പെടുത്തിയിരുന്ന വിലക്ക് നീക്കി ഉത്തരവിട്ടത്. 2019 നവംബര്‍ 14ന് അന്നത്തെ ചീഫ് ജസ്റ്റിസ് രഞ്ജന്‍ ഗൊഗോയുടെ നേതൃത്വത്തിലുളള അഞ്ചംഗ ബെഞ്ച്, വിവിധ ആരാധനാലയങ്ങളില്‍ സ്ത്രീകള്‍ക്കെതിരെ നടക്കുന്ന വിവേചനം സംബന്ധിച്ച കേസ് 3:2 ഭൂരിപക്ഷത്തോടെ വിശാല ബെഞ്ചിന് വിട്ടു.
