ചങ്ങനാശ്ശേരി: മുഖ്യമന്ത്രിയെ തെരഞ്ഞെടുക്കുന്നത് കോണ്‍ഗ്രസിന്റെ ആഭ്യന്തര പ്രശ്‌നം ആയതിനാല്‍ ഘടകകക്ഷികള്‍ എന്തിന് ഇടപെടണമെന്ന് എന്‍എസ്എസ് ജനറല്‍ സെക്രട്ടറി ജി. സുകുമാരന്‍ നായര്‍. ഒരു ചാനലിന് നല്‍കിയ അഭിമുഖത്തിലാണ് അദ്ദേഹം ഇക്കാര്യം പറഞ്ഞത്.
ആര് വന്നാലും സ്വീകരിക്കണം അതാണ് മര്യാദ. മുസ്ലിം ലീഗും മറ്റ് ഘടകകക്ഷികളും ഇടപെടുന്നത് കൊണ്ടാണ് മുഖ്യമന്ത്രി തെരഞ്ഞെടുപ്പ് വഴിമുട്ടുന്നത്. ഇത്തരം നടപടി ജനാധിപത്യത്തിന് എതിരാണ്. തങ്ങള്‍ പറയുന്നവരെ മുഖ്യമന്ത്രിയാക്കിയാല്‍ അവരെ തങ്ങളുടെ അധീനതയില്‍ എല്ലാം വരണമെന്ന് ആഗ്രഹിക്കുന്നവരുണ്ട്. ഇപ്പോള്‍ ഒരു തെരഞ്ഞെടുപ്പ് വന്നാല്‍ മുപ്പത് സീറ്റ് പോലും യുഡിഎഫിന് കിട്ടില്ലെന്നും, 10 ദിവസം കൊണ്ട് ജനങ്ങള്‍ മടുത്തുവെന്നും സുകുമാരന്‍ നായര്‍ പറഞ്ഞു.
കോണ്‍ഗ്രസിന് വേണ്ടി മാറ്റി വെച്ച മുഖ്യമന്ത്രി സ്ഥാനത്തിന് ഘടകകക്ഷികള്‍ ഇടപെടാന്‍ പാടില്ലായിരുന്നു. ഇതെല്ലാം കണക്ക് കൂട്ടി നോക്കുമ്പോള്‍ ഇതില്‍ ഒരുപാട് ദുരൂഹതയുണ്ട്. മുഖ്യമന്ത്രിയെ തെരഞ്ഞെടുക്കുന്നതിന് എന്തിനാണ് ഫ്‌ളെക്‌സ് ബോര്‍ഡുകള്‍, എന്‍എസ്എസ് ജനറല്‍ സെക്രട്ടറി ചോദിച്ചു.
