തിരുവനന്തപുരം: മുഖ്യമന്ത്രി വി ഡി സതീശനെതിരെ പ്രതിഷേധത്തിന് എന്എസ്എസ് ..തിരുവനന്തപുരം താലൂക്ക് യൂണിയന്റെ നേതൃത്വത്തില് ജനറല് സെക്രട്ടറി ജി സുകുമാരന് നായര്ക്ക് ഐക്യദാര്ഢ്യം പ്രകടിപ്പിച്ച് സെക്രട്ടേറിയറ്റിലേക്ക് പ്രതിഷേധ മാര്ച്ച് നടത്തും.
പ്രതിഷേധ പ്രകടനം വൈകിട്ട് പാളയം രക്തസാക്ഷി മണ്ഡപത്തില് നിന്ന് തുടങ്ങും. മുഖ്യമന്ത്രി വി ഡി സതീശന് കൂടിക്കാഴ്ചയ്ക്ക് അനുമതി നിഷേധിച്ചെന്ന് ആവര്ത്തിച്ച് എന്എസ്എസ് ജനറല് സെക്രട്ടറി ജി സുകുമാരന് നായര് കഴിഞ്ഞ ദിവസം രംഗത്തെത്തിയിരുന്നു.സുകുമാരന് നായര്ക്ക് കൂടിക്കാഴ്ചയ്ക്ക് അനുമതി നിഷേധിച്ചെന്ന വാര്ത്തകള് തെറ്റാണെന്നും അദ്ദേഹവുമായി സംസാരിച്ചിരുന്നെന്നും മുഖ്യമന്ത്രി വാര്ത്താസമ്മേളനത്തില് പറഞ്ഞതിനുപിന്നാലെയായിരുന്നു പ്രതികരണം.
മുഖ്യമന്ത്രി തന്നെ കാണുമെന്ന് പറയുന്നത് ഇനി ഫോട്ടോയില് മാത്രമായിരിക്കുമെന്നാണ് കഴിഞ്ഞ ദിവസം ജി സുകുമാരന് നായര് പറഞ്ഞത്.ബജറ്റിന്റെ തിരക്കായതുകൊണ്ടാണ് കാണാന് കഴിയാതിരുന്നതെങ്കില് അന്ന് തന്നെ അക്കാര്യം പറയാമായിരുന്നു. ഇപ്പോള് ന്യായീകരണം പറയുന്നതില് കാര്യമില്ല.നേരിട്ട് കണ്ട് താന് പറയാനിരുന്ന കാര്യം കഴിഞ്ഞുവെന്നും ഇപ്പോള് ന്യായീകരണം പറയുന്നതില് കാര്യമില്ലെന്നും സുകുമാരന് നായര് പറഞ്ഞു. ഇനി ആരേയും കാണേണ്ടതില്ലെന്നും അദ്ദേഹം പ്രതികരിച്ചു.
