ന്യൂഡല്‍ഹി: അമേരിക്കിലും ക്യാനഡയിലും മെക്‌സിക്കോയിലുമായി നടക്കുന്ന ഫിഫ ലോകകപ്പ് തുടങ്ങാന്‍ ഒരുമാസത്തില്‍ താഴെ മാത്രം സമയം അവശേഷിക്കേ, ഭാരതത്തിലെ ഫുട്‌ബോള്‍ ആരാധകര്‍ക്ക് ലോകകപ്പ് കാണാനാകുമോ എന്ന കാര്യത്തില്‍ ആശങ്ക തുടരുന്നു. സംപ്രേഷണാവകാശം ഇതുവരെ ആരും സ്വന്തമാക്കാത്ത സാഹചര്യത്തെത്തുടര്‍ന്ന് ഡല്‍ഹി ഹൈക്കോടതി വിഷയത്തില്‍ ഇടപെട്ടിരിക്കുകയാണ്. ലോകകപ്പ് സംപ്രേഷണവുമായി ബന്ധപ്പെട്ട് പ്രസാര്‍ ഭാരതിക്കും കേന്ദ്രസര്‍ക്കാരിനും ഡല്‍ഹി ഹൈക്കോടത് നോട്ടീസ് അയച്ചു.
ലോകകപ്പ് ഇന്ത്യയില്‍, പ്രത്യേകിച്ച് ദൂരദര്ശന്, ഡിഡി സ്‌പോര്‍ട്‌സ് പോലുള്ള ഫ്രീ-ടു-എയര്‍ പ്ലാറ്റ്ഫോമുകള്‍ വഴി സംപ്രേഷണം ചെയ്യുന്നുണ്ടെന്ന് ഉറപ്പാക്കാണമെന്ന് ആവശ്യപ്പെട്ട് സമര്‍പ്പിച്ച ഹര്‍ജിയിലാണ് ഹൈക്കോടതി കേന്ദ്രത്തിനും പ്രസാര്‍ ഭാരതിക്കും നോട്ടീസ് അയച്ചിരിക്കുന്നത്.
ഭരണഘടനയുടെ ആര്‍ട്ടിക്കിള്‍ 226 പ്രകാരം അഭിഭാഷകനായ അവ്‌ധേഷ് ബൈര്‍വ സമര്‍പ്പിച്ച റിട്ട് ഹര്‍ജി പരിഗണിക്കുന്നതിനിടെയാണ് ജസ്റ്റിസ് പുരുഷീന്ദ്ര കുമാര്‍ കൗരവ് നോട്ടീസ് അയയ്‌ക്കാന്‍ നിര്‍ദേശിച്ചത്. ജൂണ്‍ 11 മുതല്‍ ജൂലൈ 19 വരെ നടക്കുന്ന ലോകകപ്പിന്റെ സംപ്രേഷണം ഇന്ത്യയിലെ ഒരു കമ്പനിയും ഏറ്റെടുത്തിട്ടില്ല. ഫിഫയുടെ ഉയര്‍ന്ന സ്‌പോണ്‍സര്‍ഷിപ്പ് തുകയാണ് ഇതിനു കാരണം. സംപ്രേക്ഷണം ഇല്ലാത്തതുമൂലം ദശലക്ഷക്കണക്കിന് ഫുട്‌ബോള്‍ ആരാധകര്‍ക്ക് ലോകത്തിലെ ഏറ്റവും വലിയ കായിക മേള നഷ്ടമാകുമെന്ന അവസ്ഥയുണ്ടെന്നും ഇതൊഴിവാക്കണമെന്നും ഹര്‍ജിയില്‍ വാദിക്കുന്നു.
2007 ലെ സ്‌പോര്‍ട്‌സ് ബ്രോഡ്കാസ്റ്റിംഗ് സിഗ്‌നലുകള്‍ (പ്രസാര്‍ ഭാരതിയുമായി നിര്‍ബന്ധിത പങ്കിടല്‍) നിയമപ്രകാരം ഫിഫ ലോകകപ്പിനെ ‘ദേശീയ പ്രാധാന്യമുള്ള കായിക മേള’യായി ഇതിനകം തരംതിരിച്ചിട്ടുണ്ട് എന്നും ഹര്‍ജിയില്‍ ചൂണ്ടിക്കാട്ടി. ടൂര്‍ണമെന്റ് കാണാന്‍ പൊതുജനങ്ങള്‍ക്ക് അവസരമൊരുക്കാന്‍ അധികാരികള്‍ക്ക് ബാധ്യതയുണ്ടെന്ന് ഹര്‍ജിയില്‍ പറയുന്നു.
സോണി, ജിയോ സ്റ്റാര്‍ തുടങ്ങിയവര്‍ സംപ്രേഷണാവകാശത്തിനായി വന്‍തുക മുടക്കാന്‍ തയ്യാറാകാത്തതോടെ ദൂരദര്ശന് അവകാശം നല്‍കിയാലോ എന്നു ഫിഫ പരിശോധിക്കുന്നു എന്ന് റിപ്പോര്‍ട്ടുകളുണ്ടായിരുന്നു.
അതേസമയം, ദൂരദര്ശന് നല്‍കുമ്പോള്‍ ഫിഫയ്‌ക്ക് യാതൊര പ്രതിഫലവും ലഭഇക്കില്ല. ഭാരതത്തിലെ ഫുട്‌ബോള്‍ പ്രേമം നന്നായി മനസിലാക്കുന്ന ഫിഫ, ലോകകപ്പിന്റെ വലിയ വിപണനസാധ്യതയാണ് ഇന്ത്യയില്‍ കാണുന്നുണ്ട്. ഖത്തര്‍ ലോകകപ്പിന്റെ സംപ്രേഷണാവകാശം 574 കോടി രൂപയ്‌ക്ക് വയാകോം 18 സ്വന്തമാക്കിയിരുന്നു. വലിയ ലാഭവും അതുവഴി അവര്‍ ഉണ്ടാക്കുകയും ചെയ്തു.
ഈ സാധ്യത മനസിലാക്കി 2026, 30 ലോകകപ്പുകള്‍ ഉള്‍പ്പെടുത്തി 10 കോടി ഡോളറിന് ലോകകപ്പ സംപ്രേഷണാവകാശം ഇന്ത്യയിലെ ഏതെങ്കിലും ചാനലുകള്‍ക്ക് നല്‍കാന്‍ ഫിഫ തയാറായെങ്കിലും ഇത്രയും വലിയ തുക നല്‍കാനാരും തയാറാകാതെ വന്നു.
ഇതോടെ തുക അഞ്ചു കോടിയാക്കി കുറച്ചു. അതിലും ആരും താത്പര്യം പ്രകടിപ്പിക്കാതെ വന്നതോടെ സംപ്രേഷണാവകാശത്തിനുള്ള തുക 3.5 കോടി ഡോളറാക്കി.
