മെയ് 15 വരെ ഓണ്‍ലൈനില്‍ അപേക്ഷിക്കാം
വിശദവിവരങ്ങള്‍ https://ongcscholar.org ല്‍
50% സ്‌കോളര്‍ഷിപ്പുകള്‍ പെണ്‍കുട്ടികള്‍ക്ക്, തുക പ്രതിവര്‍ഷം 48,000 രൂപ
ഒഎന്‍ജിസി ഫൗണ്ടേഷന്‍ 2025-26 അധ്യയനവര്‍ഷം രണ്ടായിരം മെരിറ്റ് സ്‌കോളര്‍ഷിപ്പുകള്‍ നല്‍കുന്നു. ഇതില്‍ 50 ശതമാനം പെണ്‍കുട്ടികള്‍ക്ക്. ജനറല്‍ ഇഡബ്ല്യുഎസ്, ഒബിസി, എസ്‌സി/എസ്ടി വിഭാഗങ്ങളില്‍പ്പെടുന്ന വിദ്യാര്‍ത്ഥികള്‍ക്ക് അപേക്ഷിക്കാം. കേന്ദ്ര പൊതുമേഖലാ സ്ഥാപനമാണ് ഒഎന്‍ജിസി. വിശദവിവരങ്ങള്‍ https://ongcscholar.org ല്‍ ലഭ്യമാണ്. 48000 രൂപയാണ് വാര്‍ഷിക സ്‌കോളര്‍ഷിപ്പ്.
അപേക്ഷകര്‍ ബിഇ/ബിടെക്/എംബിബിഎസ്/എംബിഎ/എംഎസ്‌സി ജിയോഫിസിക്‌സ്, ജിയോളജി മുതലായ ഫുള്‍ടൈം കോഴ്‌സുകളില്‍ ഒന്നാംവര്‍ഷ വിദ്യാര്‍ത്ഥികളായിരിക്കണം. എന്‍ജിനീയറിങ്, മെഡിക്കല്‍ വിദ്യാര്‍ത്ഥികള്‍ക്ക് പ്ലസ് ടു/തത്തുല്യ പരീക്ഷയില്‍ 60 ശതമാനം മാര്‍ക്കില്‍ കുറയാതെയും ജിയോളജി, ജിയോഫിസിക്‌സ്, മാനേജ്‌മെന്റ് പിജി വിദ്യാര്‍ത്ഥികള്‍ക്ക് ബിരുദ പരീക്ഷയില്‍ 60 ശതമാനം മാര്‍ക്ക്/6.0 സിജിപിഎയില്‍ കുറയാതെയും വേണം.
2025 ഓഗസ്റ്റ് ഒന്നിന് 30 വയസ് കവിയാന്‍ പാടില്ല. വാര്‍ഷിക കുടുംബ വരുമാനം 2 ലക്ഷത്തിന് താഴെയാവണം. പട്ടികജാതി/വര്‍ഗ്ഗ വിഭാഗങ്ങള്‍ക്ക് നാലര ലക്ഷം രൂപവരെയാകാം. മറ്റ് സ്‌കോളര്‍ഷിപ്പുകളോ ധനസഹായമോ ലഭിക്കുന്നവരാകരുത്. യോഗ്യതാപരീക്ഷക്ക് ലഭിച്ച മാര്‍ക്കും വാര്‍ഷിക വരുമാനവും പരിഗണിച്ചാണ് തെരഞ്ഞെടുപ്പ്.
താല്‍പര്യമുള്ളവര്‍ക്ക് https://scholarships.gov.in ല്‍ രജിസ്റ്റര്‍ ചെയ്തശേഷം ലഭിക്കുന്ന വണ്‍ടൈം രജിസ്‌ട്രേഷന്‍ നമ്പര്‍ സഹിതം ഒഎന്‍ജിസി പോര്‍ട്ടലായ https://ongcscholar.org Â- Apply Now ലിങ്ക് വഴി അപേക്ഷിക്കാം. അപേക്ഷിക്കേണ്ട രീതി, സെലക്ഷന്‍ നടപടികള്‍, സ്‌കോളര്‍ഷിപ്പിന് അര്‍ഹതപ്പെട്ട വിഭാഗങ്ങളും സ്‌കോളര്‍ഷിപ്പുകളും തുടര്‍ച്ചയായി സ്‌കോളര്‍ഷിപ്പ് ലഭിക്കാനുള്ള നിബന്ധനകള്‍ മുതലായ വിവരങ്ങള്‍ ഒഎന്‍ജിസി പോര്‍ട്ടലിലുണ്ട്. മേഖലാടിസ്ഥാനത്തിലാണ് സ്‌കോളര്‍ഷിപ്പ് വിതരണം. കേരളം ഉള്‍പ്പെടെ ദക്ഷിണ മേഖലയിലുള്ളവര്‍ക്ക് മൊത്തം 300 സ്‌കോളര്‍ഷിപ്പുകള്‍ ലഭിക്കും.
