പാലക്കാട്: കെഎസ്ആര്ടിസി ബസുകളില് വനിതകള്ക്ക് സൗജന്യ യാത്ര ഏര്പ്പെടുത്തുന്നതില് ആശങ്കയുമായി സ്വകാര്യ ബസ് ഉടമകള്. പദ്ധതി നടപ്പിലാക്കിയാല് സ്വകാര്യ ബസ് വ്യവസായം തകരും. സര്ക്കാര് ചര്ച്ചയ്ക്കു തയാറാകണമെന്ന് സ്വകാര്യബസ് ഉടമകള് ആവശ്യപ്പെട്ടു.
കര്ണാടകയിലേതുപോലെ ആദ്യമന്ത്രിസഭാ യോഗത്തില് തന്നെ തെരഞ്ഞെടുപ്പ് വാഗ്ദാനം ഉത്തരവായി പുറത്തിറക്കാനാണ് യുഡിഎഫ് ആലോചിക്കുന്നത്. ഇതിനു മുന്നോടിയായാണ് കെഎസ്ആര്ടിസി ബസുകളിലെ യാത്രക്കാര് സ്ത്രീയോ പുരുഷനോയെന്ന് ടിക്കറ്റില് രേഖപ്പെടുത്താന് തുടങ്ങിയത്.
ഈ പശ്ചാത്തലത്തിലാണ് സ്വകാര്യ ബസ് ഉടമകള് രംഗത്തെത്തിയത്. തമിഴ്നാട്ടിലും കര്ണാടകയിലും സ്വകാര്യ ബസുകള് കുറവാണ്. കേരളത്തിലെ സാഹചര്യം വ്യത്യസ്തമാണെന്ന് സ്വകാര്യ ബസ് ഉടമകള് പറയുന്നു.
കെഎസ്ആര്ടിസി ബസിുകളില് സ്ത്രീകളുടെ സൗജന്യ യാത്ര പ്രഖ്യാപനം യുഡിഎഫ് സര്ക്കാര് പുനഃപരിശോധിക്കണം. സ്വകാര്യ ബസ് മേഖലയ്ക്ക് പുതിയ പാക്കേജ് പ്രഖ്യാപിക്കണമെന്നും ബസുടമകള് ആവശ്യമുന്നയിച്ചു.
