തിരുവനന്തപുരം:വര്‍ക്കലയില്‍ വയോധികയെ വീട്ടില്‍ നിന്ന് പുറത്താക്കിയ മകള്‍ക്കെതിരെ കേസെടുത്തു. പാളയംകുന്നില്‍ ഇന്ദിരയമ്മയെയാണ് മകളും ചെറുമകളും ചെറുമകളുടെ ഭര്‍ത്താവും ചേര്‍ന്ന് വീട്ടില്‍ നിന്ന് പുറത്താക്കിയത് .
ചെറുമകളുടെ പഠനാവശ്യത്തിനായി ഇന്ദിരയമ്മയുടെ പക്കല്‍ നിന്നും മകള്‍ വീടിന്റെയും പുരയിടത്തിന്റെയും പ്രമാണം വാങ്ങി ബാങ്കില്‍ പണയം വച്ച ശേഷം അമ്മയുടെ പേരില്‍ ഉണ്ടായിരുന്ന വീടും പുരയിടവും മകള്‍ തന്റെ പേരിലേക്ക് മാറ്റി.പിന്നാലെ കുടുംബ വീടിനോട് ചേര്‍ന്നുള്ള ചെറിയ വീട്ടില്‍ താമസിച്ചിരുന്ന ഇന്ദിരയമ്മയെ ഇക്കഴിഞ്ഞ നാലാം തീയതി മകളും ചെറുമകളും ചെറുമകളുടെ ഭര്‍ത്താവും ചേര്‍ന്ന് മര്‍ദിച്ചശേഷം ഇറക്കി വിട്ടുവെന്നാണ് അയിരൂര്‍ പൊലീസില്‍ നല്‍കിയ പരാതിയില്‍ പറയുന്നത്.
നേരത്തേ, ഇന്ദിരയമ്മയും ഇളയ മകനും കോടതിയെ സമീപിച്ച് അമ്മയെ വീട്ടില്‍ നിന്നും ഇറക്കി വിടരുതെന്നും താമസിക്കാന്‍ അനുവദിക്കണമെന്നും പൊലീസ് സംരക്ഷണം നല്‍കണമെന്നുമുളള ഉത്തരവ് നേടി.എന്നാല്‍ ഇന്ന് വീണ്ടും അമ്മയെ വീട്ടില്‍ നിന്ന് ഇറക്കി വിടുകയായിരുന്നു.പൊലീസ് സ്ഥലത്തെത്തി ഇവരെ വീട്ടിലേക്ക് മാറ്റുകയും മകള്‍ ഉള്‍പ്പെടെ മൂന്നുപേര്‍ക്കെതിരെ കേസെടുക്കുകയും ചെയ്തു.
