ആലപ്പുഴ : എസ് എന് ഡി പി യോഗം ജനറല് സെക്രട്ടറി വെള്ളാപ്പള്ളി നടേശനെ പൊന്നാട അണിയിച്ച ജി സുധാകരനെ രൂക്ഷമായി വിമര്ശിച്ച് എംഎസ്എഫ് സംസ്ഥാന ജനറല് സെക്രട്ടറി സി കെ നജാഫ്.സമൂഹത്തില് വിഷം കലര്ത്തുന്ന വ്യക്തിയെ പ്രകീര്ത്തിക്കുന്നത് അക്ഷന്തവ്യമായ തെറ്റാണെന്നും ഇത് യുഡിഎഫ് നിലപാടല്ലെന്നും അദ്ദേഹം കുറ്റപ്പെടുത്തി.ഫേസ്ബുക്ക് കുറിപ്പിലൂടെയാണ് നജാഫിന്റെ വിമര്ശനം.
ബി ഡി ജെ എസിന്റെ രക്ഷാധികാരിയായ ഒരാളെ ആദരിക്കുന്നത് കേരളത്തിന്റെ പുരോഗമന രാഷ്ട്രീയ ബോധത്തിന് ചേര്ന്നതല്ല.വ്യക്തിപരമായ രാഷ്ട്രീയ താല്പര്യങ്ങള് പ്രദര്ശിപ്പിക്കാന് പൊതുപദവി ഉപയോഗിക്കുന്നത് ജനവിധിയോടുള്ള അവഗണനയാണെന്നും നജാഫ് കുറ്റപ്പെടുത്തി. യു ഡി എഫ് സ്വതന്ത്ര സ്ഥാനാര്ഥിയായി മത്സരിച്ച് ജയിച്ച ജി സുധാകരന് പ്രവര്ത്തകരോട് കാണിക്കുന്ന നന്ദികേടാണിതെന്നും നജാഫ് കുറിച്ചു.
ഒരു ജനപ്രതിനിധിയായിരിക്കെ വെളളാപ്പളളി നടേശനെ പൊന്നാട അണിയിച്ച നടപടി, കേരളത്തിന്റെ പുരോഗമന രാഷ്ട്രീയബോധത്തിന്റെ അന്തസിന് യോജിച്ചതല്ല. അങ്ങനെ ചെയ്യണമെന്നുണ്ടായിരുന്നെങ്കില്, ആദ്യം ജനങ്ങള് നല്കിയ സ്ഥാനത്തിന്റെ ഉത്തരവാദിത്തത്തില് നിന്ന് രാജിവെച്ച ശേഷം മതിയായിരുന്നു. ഈ പൊന്നാട നിങ്ങള് അണിയിച്ചത് വെള്ളപ്പള്ളി നടേശനല്ല, പഴയ പിണറായി ഭക്തിയില് പിണറായിക്ക് ഇട്ട പൊന്നാടയാണെന്ന് ആര്ക്കെങ്കിലും തോന്നിയാല് അവരെ കുറ്റം പറയാന് പറ്റില്ല- നജാഫ് കുറിച്ചു
