തായ്ലന്ഡിലെ പട്ടായയില് നടന്ന ആര്എംസി ഏഷ്യ ട്രോഫി രണ്ടാം റൗണ്ടില് മിന്നും പ്രകടനവുമായി മുംബൈ താരം കിയാന് ഷാ. 15 വയസുകാരനായ കിയാന് അന്താരാഷ്ട്ര കാര്ട്ടിങ്ങിലെ തന്റെ ഏറ്റവും മികച്ച നേട്ടമായ രണ്ടാം സ്ഥാനമാണ് ബിറ സര്ക്യൂട്ടില് സ്വന്തമാക്കിയത്. റായോ റേസിങ്ങിന്റെ താരമാണ് കിയാന്. പട്ടായയിലെ 1.2 കിലോമീറ്റര് സര്ക്യൂട്ടില് നടന്ന മത്സരത്തിന്റെ യോഗ്യതാ റൗണ്ടില് തന്നെ കിയാന് തന്റെ കരുത്തറിയിച്ചിരുന്നു. ഹീറ്റ് ഒന്നില് രണ്ടാം സ്ഥാനത്താണ് താരം ഫിനിഷ് ചെയ്തത്. എന്നാല് ഹീറ്റ് രണ്ടില് എന്ജിന് തകരാര് മൂലം പിന്നിലായെങ്കിലും സൂപ്പര് ഹീറ്റില് ഏഴാം സ്ഥാനത്ത് നിന്ന് ആരംഭിച്ച് തകര്പ്പന് മുന്നേറ്റത്തിലൂടെ കിയാന് രണ്ടാമതെത്തി. ഫൈനല് മത്സരത്തില് അഞ്ചാം സ്ഥാനത്ത് നിന്നാണ് കിയാന് സ്റ്റാര്ട്ട് ചെയ്തത്. തുടക്കത്തില് ഒരല്പം പിന്നിലായെങ്കിലും ധീരമായ നീക്കങ്ങളിലൂടെ ഒന്നാം ലാപ്പില് തന്നെ നാലാം സ്ഥാനത്തേക്ക് താരം തിരിച്ചെത്തി. പിന്നീട് ഈസണ് സെങ്, ക്രിഷ് ഗുപ്ത എന്നിവരെ മറികടന്ന് രണ്ടാം സ്ഥാനത്തേക്ക് കുതിച്ചു.
നിശ്ചിത സമയത്തിനുള്ളില് ഒന്നാമതുള്ള ടോബി ഗെയ്ലുമായുള്ള (തായ്ലന്ഡ്) അകലം കുറയ്ക്കാന് സാധിച്ചില്ലെങ്കിലും രണ്ടാം സ്ഥാനം നിലനിര്ത്താനായി. തായ്ലന്ഡ് താരം സ്റ്റിയന് മോങ്കോങ് മൂന്നാം സ്ഥാനം നേടി. ഏഷ്യന് ചാമ്പ്യന്ഷിപ്പിനൊപ്പം തന്നെ തായ്ലന്ഡ് ചാമ്പ്യന്ഷിപ്പും ഇതേ ഗ്രിഡില് നടന്നതിനാല് രണ്ട് ട്രോഫികള് നേടിയാണ് കിയാന് മടങ്ങിയത്. തന്റെ പ്രകടനത്തില് അതിയായ സന്തോഷമുണ്ടെന്നും ടീമിന്റെ മികച്ച പ്രവര്ത്തനമാണ് വിജയത്തിന് പിന്നിലെന്നും കിയാന് പറഞ്ഞു. കിയാന് ഈ തലത്തില് വലിയ പുരോഗതിയാണ് കൈവരിക്കുന്നതെന്ന് പരിശീലകനും മെന്ററുമായ റയോമണ്ട് ബനാജി അഭിപ്രായപ്പെട്ടു.
