തിരുവനന്തപുരം : വി ഡി സതീശനെ അനുകൂലിച്ച് പ്രകടനങ്ങള്‍ നടത്തിയതില്‍ കോണ്‍ഗ്രസില്‍ അച്ചടക്ക നടപടിക്ക് നീക്കം.ഹൈക്കമാന്റിനെ വെല്ലുവിളിച്ച് പ്രകടനം നടത്തിയതില്‍ വിശദീകരണം തേടി പതിനഞ്ചോളം നേതാക്കള്‍ക്ക് കെപിസിസി കാരണം കാണിക്കല്‍ നോട്ടീസ് നല്‍കി.
കെപിസിസി അംഗം ചെമ്പഴന്തി അനില്‍ ഉള്‍പ്പെടെയുള്ളവരോട് വിശദീകരണം തേടി. ഐഎന്‍ടിയുസി ജില്ലാ പ്രസിഡന്റ് വി ആര്‍ പ്രതാപനും നോട്ടീസ് നല്‍കി. കൈമനം പ്രഭാകരന്‍, ടി സനാജ്, ആറ്റിങ്ങല്‍ ഉണ്ണികൃഷ്ണന്‍, അംബിരാജ തുടങ്ങി 15 ഓളം നേതാക്കള്‍ക്കാണ് കെപിസിസി നോട്ടീസ് നല്‍കിയത്.
കഴിഞ്ഞ ദിവസം തിരുവനന്തപുരം നഗരത്തില്‍ നടത്തിയ ശക്തിപ്രകടനത്തിലാണ് നടപടി. കെപിസിസി വിലക്ക് മറികടന്ന് ഹൈക്കമാന്റിനെ വെല്ലുവിളിച്ച് പ്രകടനം നടത്തിയത് എന്ത് കാരണത്താല്‍ എന്ന് വിശദീകരിക്കണം. മറുപടി തൃപ്തികരമല്ലെങ്കില്‍ സംഘടനാ നടപടി സ്വീകരിക്കും
അതേസമയം, മുഖ്യമന്ത്രി ആരെന്നത് സംബന്ധിച്ച് നേതാക്കളുമായുള്ള ഹൈക്കമാന്റിന്റെ നിര്‍ണായക ചര്‍ച്ച ദല്‍ഹിയില്‍ മല്ലികാര്‍ജുന്‍ ഖാര്‍ഗെയുടെ വസതിയില്‍ തുടങ്ങി.സമ്മര്‍ദത്തിനു വഴങ്ങി പിന്മാറില്ലെന്ന ഉറച്ച നിലപാടിലാണ് കെസി വേണുഗോപാലും രമേശ് ചെന്നിത്തലയും വിഡി സതീശനും. നേതാക്കള്‍ സമവായത്തില്‍ എത്തിയാല്‍ പ്രഖ്യാപനം ശനിയാഴ്ച ഉണ്ടായേക്കും.
