കൊല്ക്കത്ത: വന് ഭൂരിപക്ഷത്തിന് മമതയേയും തൃണമൂലിനെയും പരാജയപ്പെടുത്തിയ ബിജെപിയുടെ ബംഗാളിലെ ആദ്യ മുഖ്യമന്ത്രിയായി സുവേന്ദു അധികാരി. അദ്ദേഹം ഇന്ന് ചുമതലയേല്ക്കും. ഇന്നലെ കൊല്ക്കത്തയില് കേന്ദ്ര ആഭ്യന്തര മന്ത്രി അമിത് ഷായുടെ നേതൃത്വത്തില് നടന്ന എംഎല്എമാരുടെ യോഗത്തില് സുവേന്ദു അധികാരിയെ നിയമസഭാ കക്ഷി നേതാവായി തെരഞ്ഞെടുത്തു. അമിത് ഷായാണ് ഔദ്യോഗിക പ്രഖ്യാപനം നടത്തിയത്. പുതുതായി തെരഞ്ഞെടുക്കപ്പെട്ട എംഎല്എമാരെയും അമിത് ഷാ അഭിനന്ദിച്ചു.
രവീന്ദ്രനാഥ ടാഗോറിന്റെ ജന്മദിനമായ ഇന്ന് രാവിലെ 11ന് കൊല്ക്കത്തയിലെ ബ്രിഗേഡ് പരേഡ് ഗ്രൗണ്ടില് നടക്കുന്ന ചടങ്ങില് ബിജെപി സര്ക്കാര് സത്യപ്രതിജ്ഞ ചെയ്യും. ഗവര്ണര് ആര്.എന്. രവി സത്യവാചകം ചൊല്ലിക്കൊടുക്കും. പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തരമന്ത്രി അമിത് ഷാ, ബിജെപി പ്രസിഡന്റ് നിതിന് നബീന്, കേന്ദ്രമന്ത്രിമാര്, ബിജെപി ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാര് തുടങ്ങിയവര് ചടങ്ങില് പങ്കെടുക്കും.
പതിറ്റാണ്ടുകളായി ബംഗാളില് കോണ്ഗ്രസും ഇടതുപക്ഷവും പിന്നീട് തൃണമൂല് കോണ്ഗ്രസുമാണ് ഭരണം നടത്തിയിരുന്നത്. അതുകൊണ്ടുതന്നെ ബിജെപിയുടെ സര്ക്കാര് രൂപീകരണം ചരിത്രപരമാണ്.
294 നിയമസഭാ സീറ്റുകളിലേക്ക് നടന്ന തെരഞ്ഞെടുപ്പില് 207 സീറ്റുകളാണ് ബിജെപി നേടിയത്. സര്ക്കാര് രൂപീകരണം സംബന്ധിച്ച് ഇന്നലെ വൈകിട്ട് സുവേന്ദു എംഎല്എമാരുമായും ബിജെപി നേതാക്കളുമായും ചര്ച്ച നടത്തി.
