കന്യാകുമാരി: വാടാനപ്പിള്ളി സ്വദേശി സുനിതയെ ബെംഗളൂരുവില് ക്രൂരമായി മര്ദ്ദിച്ച് കൊലപ്പെടുത്തിയ കേസിലെ പ്രതി ദീപക് കൃഷ്ണന് കന്യാകുമാരിയില് പിടിയിലായി.
ബെംഗളൂരുവില് തെരുവുനായകളെ സംരക്ഷിക്കുന്ന ഷെല്ട്ടര് ഹോം നടത്തിവരുന്ന ദീപക് കൃഷ്ണന് മലയാളിയാണ്.ഷെല്ട്ടര് ഹോമില് മറ്റ് രണ്ട് യുവതികള്ക്കൊപ്പം ജോലിക്കെത്തിയ സുനിതയെ ലൈംഗികാതിക്രമം തടഞ്ഞപ്പോഴാണ് ക്രൂരമായി മര്ദിച്ച് കൊലപ്പെടുത്തിയതെന്നാണ് പ്രാഥമിക നിഗമനം.
ക്രൂര മര്ദനത്തില് ഗുരുതര പരിക്കേറ്റ സുനിത തൃശൂരിലെ ആശുപത്രിയില് വെന്റിലേറ്ററില് ചികിത്സയിലിരിക്കെയാണ് മരിച്ചത്.മേയ് മൂന്നിനാണ് ഇവരെ ദീപക് കൃഷ്ണന് മര്ദ്ദിച്ചത്. സുനിതയുടെ തല പിടിച്ച് പ്രതി ചുവരിലും അലമാരയിലും തുടര്ച്ചയായി ഇടിച്ചെന്നും പരിക്കേറ്റ് നിലത്തുവീണപ്പോള് നെഞ്ചത്ത് ആവര്ത്തിച്ച് ചവിട്ടിയെന്നുമാണ് ദൃക്സാക്ഷി മൊഴി. ഒപ്പമുണ്ടായിരുന്ന സ്ത്രീകളെ പ്രതി കത്തി കാട്ടി ഭീഷണിപ്പെടുത്തിയെന്നാണ് അറിയുന്നത്.
കേരളത്തിലെ വിവാദമായ കാരണവര് കൊലക്കേസിലെ പ്രതി ഷെറിന് വിഐപി തടവുകാരിയെന്ന വെളിപ്പെടുത്തല് നടത്തിയ സഹതടവുകാരിയായിരുന്നു സുനിത. ജയില്മോചിതയായ ശേഷം ജീവിക്കാന് വക തേടിയാണ് ഇവര് ബെംഗളൂരുവിലെ നായകള്ക്കായുള്ള ഷെല്ട്ടര് ഹോമിലെത്തിയത്.പ്രതിമാസം 40000 രൂപ ശമ്പളം വാഗ്ദാനം ചെയ്താണ് സുനിതയെ ബംഗളുരുവിലെ നായകളുടെ ഷെല്ട്ടര് ഹോമിലെത്തിച്ചത്.
വധശ്രമക്കേസില് ശിക്ഷിക്കപ്പെട്ടാണ് സുനിത തിരുവനന്തപുരം അട്ടക്കുളങ്ങര ജയിലില് എത്തിയത്. ഇവിടെ ഷെറിനൊപ്പമായിരുന്നു സുനിതയും ഉണ്ടായിരുന്നത്. ജയിലില് ഷെറിന് അധിക സൗകര്യങ്ങള് ഉണ്ടായിരുന്നെന്ന് 2025 ല് സുനിത വെളിപ്പെടുത്തിയിരുന്നു.ഉന്നത ബന്ധങ്ങള് മൂലം അധിക പരോളുകള് നേടി, മേയ്ക്കപ്പ് സാധനങ്ങളും ഫോണും ഷെറിന് ജയിലില് കിട്ടി.മന്ത്രി ഗണേഷ് കുമാറുമായും ജയില് മുന് ഡിഐജി പ്രദീപനുമായും ബന്ധം. 2015ല് ഷെറിന്റെ സുഖവാസത്തിനെതിരെ നല്കിയ പരാതി പൊലീസുകാര് ഗൗരവത്തോടെയെടുത്തില്ലെന്നും സുനിത വെളിപ്പെടുത്തി. ഷെറിന് ശിക്ഷാ ഇളവ് നേടി പുറത്തിറങ്ങുന്ന ഘട്ടത്തിലാണ് വെളിപ്പെടുത്തലുമായി സുനിത രംഗത്ത് വന്നത്.
