ചെന്നൈ: തമിഴ്നാട്ടില് ഡിഎംകെയുടെ ബലത്തില് അഞ്ച് സീറ്റുകള് പിടിച്ച രാഹുല് ഗാന്ധി അധികാരത്തിന് വേണ്ടി വിജയിന്റെ ടിവികെയെ പിന്തുണയ്ക്കുക വഴി കട്ടപ്പയായി മാറിയെന്ന് ഡിഎംകെ അണികളുടെ പരിഹാസം. സമൂഹമാധ്യമങ്ങളിലാണ് ഇത്തരം പരിഹാസം പങ്കുവെയ്ക്കപ്പെടുന്നത്. ഏതാനും മന്ത്രിസ്ഥാനങ്ങള്ക്ക് വേണ്ടി സ്റ്റാലിനെ പിന്നില് നിന്നും കുത്തി വിജയിന്റെ ടിവികെയ്ക്ക് പിന്തുണ നല്കുകയായിരുന്നു രാഹുല് ഗാന്ധി.
തെരഞ്ഞെടുപ്പിന് മുന്പ് തന്നെ സ്റ്റാലിനും രാഹുല് ഗാന്ധിയും തമ്മില് അസ്വാരസ്യങ്ങള് ഉണ്ടായിരുന്നു. സഖ്യകക്ഷിയായ കോണ്ഗ്രസിനും മന്ത്രിസ്ഥാനങ്ങള് വേണമെന്ന രാഹുലിന്റെ ആവശ്യം സ്റ്റാലിന് തള്ളിയിരുന്നു. ഇതോടെ കോര്പറേഷനുകളുടെയും ബോര്ഡുകളുടെയും ഡയറക്ടര് സ്ഥാനം നല്കണമെന്നായി രാഹുല് എന്നാല് അധികാരസ്ഥാനങ്ങളില് ഡിഎംകെ മാത്രമേ ഉണ്ടാകൂ എന്ന് സ്റ്റാലിന് കട്ടായം പറഞ്ഞതോടെ ഇരുവരും തമ്മില് പിണക്കം വര്ധിച്ചു.
തെരഞ്ഞെടുപ്പ് പ്രചാരണകാലത്ത് തമിഴ്നാട്ടില് റോഡ് ഷോയ്ക്കെത്തിയ രാഹുല് ഗാന്ധി സ്റ്റാലിനെ മുഖാമുഖം കണ്ടിരുന്നില്ല. ഒരു കാലത്ത് ഇന്ത്യാ മുന്നണിയുടെ പേരില് ഇരുവരും വലിയ ചങ്ങാതിമാരായിരുന്നു. ഡിഎംകെ സഖ്യകക്ഷി എന്ന നിലയില് ഇപ്പോള് ഡിഎംകെ വോട്ടുകളുടെ ബലത്തിലാണ് കോണ്ഗ്രസിന് തമിഴ്നാട്ടില് അഞ്ച് സീറ്റുകള് ലഭിച്ചത്. പക്ഷെ ഭരണം ടിവികെ പിടിക്കുമെന്നുറപ്പായതോടെ ഡിഎംകെ മുന്നണിയില് നിന്നും പുറത്തുചാടി രാഹുല് ഗാന്ധി വിജയിന് പിന്തുണ നല്കുകയായിരുന്നു. രണ്ട് മന്ത്രിസ്ഥാനങ്ങള് കോണ്ഗ്രസിന് ഉറപ്പുനല്കിയതായി പറയുന്നു.
