തിരുവനന്തപുരം: മുഖ്യമന്ത്രിയാകാന് കുപ്പായമിട്ട് സതീശനും രമേശ് ചെന്നിത്തലയും കടിപിടി തുടങ്ങിയതിനു പിന്നാലെ ഹൈക്കമാന്ഡിന്റെ മനസാക്ഷി സൂക്ഷിപ്പുകാരനായി ചമഞ്ഞ് കെ.സി. വേണുഗോപാല് തന്റെ സ്ഥാനം ഉറപ്പിക്കാനുള്ള നീക്കം ശക്തമാക്കി. ഇതോടെ സംസ്ഥാന രാഷ്ട്രീയത്തില് കോണ്ഗ്രസ് ഗ്രൂപ്പ് കലഹങ്ങള്ക്ക് പുതിയ മാനം കൈവന്നു.
മൂന്നുപേരും സ്ഥാനമുറപ്പിക്കാന് വിവിധ മാര്ഗങ്ങളുപയോഗിച്ച് കൂടുതല് എംഎല്എമാരെ കൂടെനിര്ത്താന് മത്സരിക്കുന്നതിനിടെ എതിര്ചേരിയെ വെട്ടിനിരത്താനും നീക്കം തുടങ്ങി. പൊടിപിടിച്ചു കിടക്കുന്ന അഴിമതിക്കേസുകള് കുത്തിപ്പൊക്കല് മുതല് ലൈംഗികാതിക്രമകേസുകള് ചികഞ്ഞെടുക്കല്വരെ ഇതിനായി ഉപയോഗിച്ചു തുടങ്ങി. മുഖ്യമന്ത്രി സ്ഥാനമോഹികളായി രംഗത്തുള്ള മൂന്നുപേരും വിവിധ അഴിമതി ആരോപണങ്ങളിലും കേസുകളിലും പെട്ടവരായതിനാല് മറുഭാഗം ഇതെല്ലാം വിദഗ്ധമായി മുതലെടുക്കാന് ശ്രമം ആരംഭിച്ചിട്ടുണ്ട്.
സതീശന് പുനര്ജനി പദ്ധതിയുമായി ബന്ധപ്പെട്ട്, കേന്ദ്രസര്ക്കാരിന്റെ മുന്കൂര് അനുമതി ഇല്ലാതെ യുകെ, ദുബായ് എന്നിവിടങ്ങളില് നിന്ന് പണം പിരിച്ച് വിദേശ സംഭാവന നിയന്ത്രണ നിയമം ലംഘിച്ചതില് സിബിഐ അന്വേഷണത്തിന് വിജിലന്സ് നിര്ദേശം നല്കിയിട്ടുണ്ട്. ഈ കേസില് അന്തിമ തീരുമാനമെടുക്കേണ്ട മുഖ്യമന്ത്രി പദത്തില് സതീശന് വരുന്നത് വലിയ തിരിച്ചടിയാകുമെന്നാണ് ഒരു വിഭാഗം കേന്ദ്രനേതൃത്വത്തെ ധരിപ്പിക്കാന് തയാറെടുക്കുന്നത്.
ഹരിയാനയിലെ ‘സീറ്റ് വില്പന’യില് കെ.സി. വേണുഗോപാലിനെതിരെ ദല്ഹി പോലീസ് കേസെടുത്തിരിക്കുകയാണ്. നിയമസഭാ തെരഞ്ഞെടുപ്പില് ബവാനി മണ്ഡലത്തില് ടിക്കറ്റ് ഉറപ്പാക്കാന് 7 കോടി രൂപ കൈപ്പറ്റിയെന്നാണ് ആരോപണം. ഇതുസംബന്ധിച്ച് ഹരിയാന മഹിള കോണ്ഗ്രസ് മുന് ജനറല് സെക്രട്ടറി സുചിത്ര ദേവിയുടെ ഭര്ത്താവ് ഗൗരവ് കുമാറാണ് ദല്ഹി പോലീസില് പരാതി നല്കിയിട്ടുള്ളത്. ലൈംഗികാതിക്രമ പരാതിയില് വേണുഗോപാലിനെ വെറുതേവിട്ട തിരുവനന്തപുരം ചീഫ് ജുഡീഷ്യല് മജിസ്ട്രേറ്റ് കോടതി വിധിക്കെതിരെ സരിതാനായര് നല്കിയ അപ്പീല് ഹൈക്കോടതിയില് നിലവിലുണ്ട്. ഹരിപ്പാട് മെഡിക്കല് കോളജിന് സ്ഥലമേറ്റെടുത്തതുമായി ബന്ധപ്പെട്ട് 2016 ല് നടന്ന അഴിമതിയും വീണ്ടും ചര്ച്ചയായിട്ടുണ്ട്. ഹരിപ്പാട് മെഡിക്കല് കോളജ് നിര്മാണത്തിന് കരുവാറ്റയില് 12.5 കോടി ചെലവില് 12 ഏക്കറോളം ഭൂമി ഏറ്റെടുത്തതിലെ രമേശ് ചെന്നിത്തലയുടെ അഴിമതിയാണ് ചര്ച്ചയായിരിക്കുന്നത്. 99 ഭൂവുടമകളില് നിന്ന് 21.71 ഏക്കര് വസ്തു ഏറ്റെടുക്കാന് 20 കോടി അനുവദിച്ചതിലും തണ്ണീര്ത്തടത്തില് മെഡിക്കല്കോളജിന് പദ്ധതിയിട്ടതിലും അഴിമതിയുടെ മണമുണ്ട്. ഇടനിലനിന്നവര് വഴി വന്തുക കൈമറിഞ്ഞതായും ആക്ഷേപമുണ്ട്. എന്നാല് ഇതെല്ലാം തുടര്ന്നു വന്ന പിണറായി സര്ക്കാര് മരവിപ്പിക്കുകയായിരുന്നു.
പരസ്പരം അഴിമതികള് വിളിച്ചുപറഞ്ഞ് അവസരം മുടക്കുക എന്ന തന്ത്രവും മുഖ്യമന്ത്രി മോഹം പൂവണിയാനായി മൂന്നുപേരും പുറത്തെടുത്തതോടെ വരും നാളുകള് ഗ്രൂപ്പുകളിയുടെ പുതിയ കഥകള് പുറത്തുവരുമെന്നുതന്നെയാണ് കണക്കുകൂട്ടല്.
