തിരുവനന്തപുരം: ”ഞാന് മരിച്ചു പോവണമെങ്കില് എന്റെ ആയുസ് തീര്ന്നിരിക്കണം. അതിനിപ്പോള് ഞാന് വീട്ടിനകത്ത് ഇരുന്നാലും മതി. ഒരു ഫാന് പൊട്ടി വീണാലും പോരേ…സമയം അവസാനിക്കണമെങ്കില് അതായാലും പോരേ. അപ്പോള് ഒരു പ്രവര്ത്തി ചെയ്തോണ്ടിരിക്കുമ്പോള് ആയാലെന്താ പ്രശ്നം.”അടൂര് എംസി റോഡില് പുതുശ്ശേരിയിലെ അപകടത്തില് മരിച്ച ചലച്ചിത്ര നടന് സന്തോഷ് .കെ. നായര് ഏതാനും ദിവസം മുമ്പ് ഒരു ഓണ്ലൈന് മാധ്യമത്തിന് നല്കിയ അഭിമുഖത്തിലെ വാക്കുകള് അറംപറ്റിയതിലെ ഞെട്ടലിലാണ് സിനിമാലോകം.
ഇന്നലെ രാവിലെ ഭാര്യക്കൊപ്പം സഞ്ചരിക്കവെയാണ് അടൂരില് വച്ച് ട്രക്കുമായി കാറ് കൂട്ടിയിടിച്ച് അപകടമുണ്ടാകുന്നത്. അതിനും ഏതാനും ദിവസം മുമ്പാണ് അഭിമുഖം നല്കിയത്. സിനിമയില് വില്ലനായുള്ള ഫൈറ്റുകളും അതിലെ അപകടങ്ങളുമൊക്കെ ഭയമില്ലാതെ നേരിടുന്നതിനെ കുറിച്ചായിരുന്നു അധികവും സംസാരിച്ചത്.
നമ്മളെ വിളിക്കുന്നു, ഇത്ര രൂപ വേണമെന്ന് പറയുന്നു. അത് അവര് തരാമെന്ന് പറയുന്നു. പിന്നെ അവര് ചോദിക്കുന്ന പ്രൊഡക്ട്, അല്ലെങ്കില് അവര് ആവശ്യപ്പെടുന്നത് കൊടുക്കുക എന്നുള്ളത് ഉത്തരവാദിത്തമാണ്. നമ്മള് അത് എന്ജോയ് ചെയ്യുകയാണ്. ഫൈറ്റിലാണെങ്കില് അഞ്ചോ പത്തോ, പ്രാവശ്യം വീഴേണ്ടിയൊക്കെ വരും. ഇന്നാണെങ്കില് അപ്പുറത്തൊരാളുണ്ടെങ്കില് എറേസ് ചെയ്യാമെന്ന് പറയും. അന്നങ്ങനെയല്ല, റീടേക്കേയുള്ളൂ. കടലിലൊക്കെ ചാടുന്നത് കാണുമ്പോള് എടാ, നിനക്ക് നീന്തലറിയില്ലല്ലോ, നീയിതെങ്ങനെ കടലിലൊക്കെ ചാടുന്നു എന്ന് വിജയരാഘവന് എന്നോട് ചോദിക്കാറുണ്ട്. വെള്ളത്തില് വീണാല് എടുത്ത് വെളിയിലിടില്ലേ, പിന്നെന്താണ് എന്നാണ് ഞാന് ചോദിക്കാറുള്ളത്. ഞാന് മരിച്ച് പോവണമെങ്കില് എന്റെ ആയുസ് തീര്ന്നിരിക്കണം. അതിനിപ്പോള് ഞാന് വീട്ടിനകത്ത് ഇരുന്നാലും മതി. ഒരു ഫാന് പൊട്ടി വീണാലും പോരേ. ഇതായിരുന്നു വാക്കുകള്.
