വാഷിങ്ടണ്: ഹോര്മൂസ് കടലിടുക്കിലൂടെയുള്ള കപ്പല് ഗതാഗതം സുഗമമാക്കുന്നതിനായി യുഎസ് കൊണ്ടുവന്ന പ്രൊജക്ട് ഫ്രീഡം ദൗത്യസംഘത്തിന് നേരെ ആക്രമണമുണ്ടായാല് ഇറാന് എന്ന രാജ്യം ഇനിയുണ്ടാകില്ലെന്ന് പ്രസിഡന്റ് ഡൊണാള്ഡ് ട്രംപ്. യുഎസിന്റെ പൊജക്ട് ഫ്രീഡം ഇറാന് തള്ളിയതിനോട് പ്രതികരിക്കുകയായിരുന്നു അദ്ദേഹം. യുഎസ് സൈനിക താവളങ്ങള് അത്യാധുനിക ആയുധങ്ങളാല് സജ്ജമാണ്. ആവശ്യമായി വന്നാല് അവയെല്ലാം ഉപയോഗിക്കും. ഇറാനെ ഈ ഭൂമിയില് നിന്നും ഇല്ലാതാക്കും, ട്രംപ് പറഞ്ഞു.
ഹോര്മുസ് കടലിടുക്കില് വച്ച് അടുത്തിടെ ദക്ഷിണ കൊറിയന് ചരക്ക് കപ്പലിനു നേരെ ആക്രമണം ഉണ്ടായിരുന്നു. തുടര്ന്ന് യുഎസിന്റെ ദൗത്യത്തില് പങ്കാളികളാകാന് ദക്ഷിണ കൊറിയയോട് ആവശ്യപ്പെട്ടുവെന്നും അദ്ദേഹം അറിയിച്ചു. ഹോര്മൂസില് യുഎസ് നാവികസേന സ്വീകരിച്ചിട്ടുള്ള നടപടികള് ചരിത്രത്തിലെ ഏറ്റവും വലിയ സൈനിക നീക്കങ്ങളിലൊന്നാണെന്നും ട്രംപ് വിശേഷിപ്പിച്ചു.
സ്വതന്ത്രമായും സുരക്ഷിതമായും ചരക്ക് നീക്കം ലക്ഷ്യമിട്ടാണ് പ്രൊജക്ട് ഫ്രീഡം കൊണ്ടുവന്നത്. ഇത് നടപ്പിലാക്കിയ മണിക്കൂറുകള്ക്കുള്ളില്തന്നെ നിരവധി കപ്പലുകള്ക്ക് ഹോര്മൂസ് കടക്കാന് സുരക്ഷാ സഹായം നല്കിയതായി യുഎസ് അഡ്മിറല് ബ്രാഡ് കൂപ്പര് അറിയിച്ചു. കപ്പലുകള്ക്ക് നേരെ ഇറാന് ക്രൂയിസ് മിസൈലുകളെയും ഡ്രോണുകളെയും വിന്യസിച്ചെങ്കിലും യുഎസ് സൈന്യം ഇതിനെയെല്ലാം പ്രതിരോധിച്ചെന്നും കൂപ്പര് കൂട്ടിച്ചേര്ത്തു.
അതിനിടെ പശ്ചിമേഷ്യയിലെ യുദ്ധം അവസാനിപ്പിക്കുന്നതിനായി ഇറാന് പ്രതിരോധ മന്ത്രി ചൈനയിലെത്തി. പാകിസ്ഥാന്റെ മധ്യസ്ഥതയില് നടക്കുന്ന ചര്ച്ചകളില് ഇറാന്റെ പല നേതാക്കളും അതൃപ്തി പ്രകടിപ്പിച്ചതിനെ തുടര്ന്നാണിപ്പോള് ചൈനയെ സമീപിക്കുന്നത്. അന്താരാഷ്ട്ര തലത്തില് ഇറാന് പിന്തുണ വളര്ത്തിയെടുക്കുന്നതിനാണ് ഈ സന്ദര്ശനം.
