തിരുവനന്തപുരം: ബിജെപിയെ തോല്പിക്കാനായി വോട്ടുമറിച്ച സിപിഎമ്മിന് സംഭവിച്ചത് ഗുരുതര പരാജയം. ബിജെപി വിജയിക്കാന് സാധ്യതയുള്ള മണ്ഡലങ്ങള് തെരഞ്ഞുപിടിച്ച് വോട്ടുമറിക്കുകയായിരുന്നു. ഇങ്ങനെ വോട്ടുമറിച്ച മണ്ഡലങ്ങളിലെല്ലാം കോണ്ഗ്രസ് വിജയിച്ചു. എന്നാല് മറ്റു മണ്ഡലങ്ങളില് സിപിഎം പ്രതീക്ഷിച്ചത്ര വോട്ട് ലഭിക്കാതായതോടെ വമ്പന് പരാജയത്തിലേക്ക് പതിച്ചു.
മഞ്ചേശ്വരത്ത് 2021ല് 40639 വോട്ടുനേടിയ സിപിഎമ്മിന് ഇത്തവണ കിട്ടിയത് 21212 വോട്ടുകള് മാത്രമാണ്. 19427 വോട്ടുകളാണ് മറിച്ച് നല്കിയത്. തൃശൂരില് കഴിഞ്ഞതവണ സിപിഐ മത്സരിച്ചപ്പോള് 44263 വോട്ടുകളാണ് ലഭിച്ചത്. എന്നാല് ഇത്തവണ 10776 വോട്ടുകളാണ് സിപിഎം മറിച്ചത്. ഇതോടെ സിപിഎം സ്ഥാനാര്ത്ഥിക്ക് 33487 വോട്ടുകളെ ലഭിച്ചുള്ളു. പൂഞ്ഞാറില് പി.സി. ജോര്ജിനെ പരാജയപ്പെടുത്താന് 8461 വോട്ടുകള് മറിച്ചു. 2021ല് 58668 വോട്ടുകള് നേടി വിജയിച്ച സെബാസ്റ്റ്യന് കുളത്തുങ്കലിന് ഇത്തവണ 50207 വോട്ടുകള് മാത്രമേ ലഭിച്ചുള്ളു. തിരുവല്ലയില് അനൂപ് ആന്റണി ജയിക്കാതിരിക്കാന് 20155 വോട്ടുകളാണ് സിപിഎം മറിച്ചത്. 2021ല് 62178 വോട്ട് ലഭിച്ച മാത്യു ടി. തോമസിന് ഇത്തവണ 42023 വോട്ടുകളേ ലഭിച്ചുള്ളു.
ആറന്മുളയില് കുമ്മനം രാജശേഖരന് വിജയിക്കരുതെന്ന് സിപിഎമ്മിന് കടുത്ത വാശിയായിരുന്നു. ഇതിനുവേണ്ടി വീണാ ജോര്ജിന്റെ വോട്ടും മറിച്ചു നല്കി. 2021ല് 74950 വോട്ട് ലഭിച്ച വീണാജോര്ജിന് ഇത്തവണ നഷ്ടമായത് 22852 വോട്ടുകളാണ്. സിപിഎമ്മിന്റെ ചതിയെത്തുടര്ന്ന് 51098 വോട്ടുകള് കൊണ്ട് വീണാജോര്ജിന് തൃപ്തിപ്പെടേണ്ടി വന്നു.
വട്ടിയൂര്ക്കാവില് മുന് ഡിജിപി ആര്. ശ്രീലേഖ വിജയിക്കാതിരിക്കാന് 18198 വോട്ടുകളാണ് സിപിഎം മറിച്ചത്. കഴിഞ്ഞ തവണ നേമത്ത് കുമ്മനം രാജശേഖരനെ തോല്പിക്കാന് ഒത്തൊരുമയോടെ പ്രവര്ത്തിച്ചതിന്റെ പ്രത്യുപകാരമെന്ന നിലയില് കെ. മുരളീധരനെ വിജയിപ്പിക്കാനായിരുന്നു ഈ നീക്കം.
പകരമായി നേമം മണ്ഡലത്തില് കോണ്ഗ്രസിന്റെ 6794 വോട്ടുകള് വി. ശിവന്കുട്ടിക്ക് നല്കി വിജയിപ്പിക്കാനായിരുന്നു അണിയറനീക്കമെങ്കിലും അതും പാളി. ഇവിടെ ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര് 4978 വോട്ടുകള്ക്ക് വിജയിക്കുകയായിരുന്നു.
