പി.കെ. കൃഷ്ണദാസ് കാട്ടാക്കടയില്‍ ഡാര്‍ക് ഹോഴ്സാകുമോ? അനൂപ് ആന്‍റണിയും പത്മജയും തിരുവല്ലയും തൃശൂരും തൂക്കുമോ?

തിരുവനന്തപുരം: വോട്ടെണ്ണുമ്പോള്‍ തിരുവനന്തപുരത്ത് നിന്നും അപ്രതീക്ഷിതമല്ലെങ്കിലും അതിശയിപ്പിക്കുന്ന വിജയമായി പി.കെ. കൃഷ്ണദാസ് കാട്ടാക്കടയില്‍ ഉയര്‍ന്നുവരുമോ? ബിജെപി താമരവിരിയിക്കുന്ന മണ്ഡലമായി കാട്ടാക്കട മാറുകയാണ്. പീപ്പിള്‍സ് ഇന്‍സൈറ്റ് ആണ് കാട്ടാക്കടയില്‍ പി.കെ. കൃഷ്ണദാസിന്റെ വിജയം വോട്ടിംഗ് ശതമാനത്തോടെ പ്രവചിച്ചത്.

കൃഷ്ണദാസ് കാട്ടാക്കടയില്‍. 33.91 ശതമാനം വോട്ട് പിടിക്കുമെന്നാണ് പീപ്പിള്‍സ് ഇന്‍സൈറ്റ് പറയുന്നത്. രണ്ടാം സ്ഥാനത്തെ എല്‍ഡിഎഫ് സ്ഥാനാര്‍ത്ഥിയായ ഐ.ബി. സതീഷിന് ലഭിക്കുക 32.65 ശതമാനം വോട്ടുകള്‍ മാത്രം. 2021ല്‍ 45.49 ശതമാനം വോട്ട് നേടി മൃഗീയ ഭൂരിപക്ഷത്തിന് കാട്ടാക്കടയില്‍ നിന്നും ജയിച്ചു കയറിയ സ്ഥാനാര്‍ത്ഥിയാണ് ഐബി സതീഷ്. 2021ല്‍ പി.കെ. കൃഷ്ണദാസ് വെറും 23.77 ശതമാനം വോട്ടുകള്‍ പിടിച്ച് മൂന്നാം സ്ഥാനക്കാരന്‍ മാത്രമായിരുന്നു. അഞ്ച് വര്‍ഷം കൊണ്ട് എന്ത് മാജിക് ആണ് പി.കെ. കൃഷ്ണദാസ് ഈ മണ്ഡലത്തില്‍ നടത്തിയത്? ഇതിന് ഉത്തരം മെയ് നാലിന് അറിയാം.

അതുപോലെ തിരുവല്ലയില്‍ മറ്റൊരു കറുത്ത കുതിരയായി മാറാന്‍ പോകുന്നത് അനൂപ് ആന്‍റണിയാണെന്നും പീപ്പിള്‍സ് ഇന്‍സൈറ്റ് പ്രവചിക്കുന്നു. തിരുവല്ലക്കാരുടെ പ്രിയങ്കരനായ മാത്യു ടി തോമസിനെ അനൂപ് ആന്‍റണി കെട്ടുകെട്ടിക്കുമെന്നാണ് പ്രവചനം. ഇവിടെ 41.68 ശതമാനം വോട്ടുകള്‍ പിടിക്കുമെന്ന് പറയുമ്പോള്‍ അത് അസാധാരണ വിജയമായി മാറും. പ്രധാനമന്ത്രി മോദി വന്ന് ഇളക്കിമറിച്ച മണ്ഡലം കൂടിയാണ് തിരുവല്ല. രണ്ടാം സ്ഥാനത്തേക്ക് പിന്തള്ളപ്പെടുന്ന മാത്യുടി തോമസിന് വെറും 26.61 ശതമാനം വോട്ടേ ലഭിയ്‌ക്കൂ എന്നും ഈ തെരഞ്ഞെടുപ്പ് പ്രവചനം പറയുന്നു. 2021ല്‍ ബിജെപി സ്ഥാനാര്‍ത്ഥിയായി മത്സരിച്ച അശോകന്‍ കുളനട വെറും 16.25 ശതമാനം വോട്ടുകള്‍ മാത്രം പിടിച്ച മണ്ഡലമാണ് തിരുവല്ല. അനുപ് ജയിച്ചാല്‍ അത് വലിയൊരു കുതിപ്പായി മാറും. മാത്രമല്ല, 2006, 2011, 2016, 2021 എന്നിങ്ങനെ നാല് തവണ വിജയിച്ച് കയറിയ മാത്യ ടി തോമസിന്റെ കോട്ടയാണ് അങ്ങിനെയെങ്കില്‍ തകരുക.

തൃശൂരില്‍ യുഡിഎഫ് സ്ഥാനാര്ത്ഥിയായ രാജന്‍ പല്ലനെ തോല്‍പിച്ച് പഴയകാലനേതാവ് കെ. കരുണാകരന്റെ മകള്‍ പത്മജ ബിജെപി ടിക്കറ്റില്‍ ജയിച്ചാല്‍ അത് ബിജെപിയുടെ തൃശൂരിലെ പിടി വീണ്ടും ഉറപ്പിക്കലാവും. സുരേഷ് ഗോപി വെട്ടിത്തെളിച്ച പാതയിലൂടെ പത്മജ വിജയപീഠത്തിലേറും എന്നാണ് പീപ്പിള്‍സ് ഇന്‍സൈറ്റ് പ്രവചിക്കുന്നത്. ഇവിടെ പത്മജയക്ക്. 32.83 ശതമാനം വോട്ടുകള്‍ ലഭിക്കുമെന്ന് പീപ്പിള്‍സ് ഇന്‍സൈറ്റ് പറയുന്നു. രണ്ടാം സ്ഥാനത്ത് വരുന്ന എല്‍ഡിഎഫ് സ്ഥാനാര്‍ത്ഥിയായ ആലങ്കോട് ലീലാകൃഷ്ണന് ലഭിക്കുക 29.12 ശതമാനം മാത്രമാണ്. രാജന്‍ പല്ലന്‍ മൂന്നാം സ്ഥാനത്തേക്ക് തള്ളപ്പെടുമെന്നും പ്രവചനം.