വാന്‍കൂവര്‍: ഇറാന്‍ തീര്‍ച്ചയായും അമേരിക്കയില്‍ ലോകകപ്പ് മത്സരം കളിക്കാന്‍ എത്തിയിരിക്കുമെന്ന് ഫിഫ പ്രസിഡന്റ് ഇന്‍ഫാന്റിനോ ജിയാനി. കഴിഞ്ഞ ദിവസം കാനഡയിലെ വാന്‍കൂവറില്‍ ഫിഫ കോണ്‍ഗ്രസിനെ അഭിസംബോധന ചെയ്യുകയായിരുന്നു അദ്ദേഹം.
ഇറാന്‍ ലോകകപ്പ് കളിക്കാനെത്തുമെന്ന് പറയാന്‍ കാരണമുണ്ടെന്ന് പറഞ്ഞുകൊണ്ട് ഇന്‍ഫാന്റീനോ വിശദീകരിച്ചു. സൂഹൃത്തുക്കളെ നമ്മള്‍ ഒരുമിക്കേണ്ടവരാണ്. ആളുകളെ ഒത്തൊരുമിച്ചുകൊണ്ടുപോകേണ്ടവരാണ്. ഫുട്‌ബോള്‍ കളിയും അതിനോടുള്ള അഭിനിവേശവും ആവേശവും ലോകത്തെ ഒരുമിപ്പിക്കുന്നതാണ്, നിങ്ങളും ഞാനും നമ്മളും ഒരു കുടക്കീഴില്‍ അണിനിരക്കുകയാണ്, ഒരുമിച്ച് നില്‍ക്കേണ്ടവരാണ്- ഇന്‍ഫാന്റീനോ പറഞ്ഞു.
വാന്‍കൂവറില്‍ നടന്ന കോണ്‍ഗ്രസില്‍ പങ്കെടുക്കാന്‍ ഇറാന്‍ ഫുട്‌ബോള്‍ ടീമിനെ പ്രതിനിധീകരിച്ച് ആരും എത്തിയില്ല. കാനഡയിലേക്ക് പോകാന്‍ തയ്യാറല്ലെന്ന നിലപാടിലായിരുന്നു അവര്‍. മദ്ധ്യേഷ്യയില്‍ യുദ്ധം ഉടലെടുത്ത പശ്ചാത്തലത്തില്‍ ഇറാന്റെ മത്സരങ്ങള്‍ അമേരിക്കയ്‌ക്ക് പുറത്തെ രാജ്യങ്ങളിലേക്ക് മാറ്റി തരണമെന്ന് ഇറാന്‍ ഫുട്‌ബോള്‍ ഫെഡറേഷന്‍(എഫ്എഫ്‌ഐആര്‍ഐ) ആവശ്യപ്പെട്ടിരുന്നു. എന്നാല്‍ ഈ ആവശ്യം അംഗീകരിക്കാന്‍ ഫിഫ തയ്യാറായില്ല.
ജൂണ്‍ 11 മുതല്‍ ജൂലൈ 19 വരെ അമേരിക്ക, കാനഡ, മെക്‌സിക്കോ എന്നീ രാജ്യങ്ങളിലായാണ് ഫിഫയുടെ 23-ാം ലോകകപ്പ് ഫുട്‌ബോള്‍. ഗ്രൂപ്പ് ജിയില്‍ ബെല്‍ജിയം, ഈജിപ്ത്, ന്യൂസിലന്‍ഡ് ടീമുകള്‍ക്കൊപ്പം ആണ് ഇറാന്‍ ഉള്‍പ്പെട്ടിരിക്കുന്നത്.
