തിരുവനന്തപുരം: കുമാരനാശാന് പിറന്ന തൊമ്മന്വിളാകം തറവാടു കയ്യേറി മീന്ചന്ത തുടങ്ങുന്നതില് പ്രതിഷേധം കനക്കുന്നു. മാമ്പള്ളി പള്ളിവകയെന്ന പേരില് കുമാരനാശാന്റെ തറവാട്ടുസ്വത്ത് കയ്യേറി മീന്ചന്ത പണിയുന്നതു തടയാനും സ്ഥലം വീണ്ടെടുത്ത് കുമാരനാശാന്റെ ഓര്മ നിലനിര്ത്താന് ഉചിതമായ സ്മാരകമുണ്ടാക്കണമെന്നാവശ്യപ്പെട്ടും ആക്ഷന് കൗണ്സില് രൂപീകരിച്ച് പ്രക്ഷോഭത്തിനൊരുങ്ങുകയാണ് നാട്ടുകാര്. ജന്മഭൂമി റിപ്പോര്ട്ടിനെത്തുടര്ന്ന് കുമാരനാശാനെ സ്നേഹിക്കുന്ന സാഹിത്യകാരന്മാരും സാംസ്കാരിക നായകരും സാമുദായിക നേതാക്കളും ചേര്ന്ന് ശക്തമായ പ്രക്ഷോഭത്തിനു തീരുമാനിച്ചിരുന്നു.
മുന് പഞ്ചായത്ത് ഭരണ സമിതി അനധികൃത ചന്ത നിര്മാണത്തിന് മൗനാനുവാദം നല്കിയതില് ശക്തമായ പ്രതിഷേധമാണ് ഉടലെടുക്കുന്നത്. ചന്ത നിര്മാണത്തിനെതിരേ പല തവണ കോസ്റ്റല് പോലീസിലുള്പ്പെടെ പരാതിപ്പെട്ടിട്ടും ഇടതുഭരണ സമിതിയുടെ സമ്മര്ദത്താല് ശക്തമായ നടപടിയില്ലാതെ നീണ്ടുപോയി. ഇതോടെയാണ് തെരഞ്ഞെടുപ്പ് പെരുമാറ്റച്ചട്ടമുള്ള സമയം നോക്കി ചന്ത നിര്മാണം തകൃതിയായത്.
കഴിഞ്ഞ പഞ്ചായത്ത് ഭരണ സമിതി പ്രസിഡന്റായിരുന്ന വി. ലൈജു പള്ളിക്കമ്മിറ്റിയെ വഴിവിട്ടു സഹായിച്ചെന്ന ആക്ഷേപം ശക്തമാണ്. കുമാരനാശാന് പിറന്ന തൊമ്മന്വിളാകം തറവാടിരുന്ന രണ്ടേക്കറിലധികമുള്ള വസ്തുക്കള് പിന്തലമുറ ഭാഗംവച്ചെടുത്ത് അതില് പലതും സ്വകാര്യവ്യക്തികള്ക്കു മറിച്ചുവിറ്റിരുന്നു. എന്നാല് കുമാരനാശാന്റെ ഇളയമ്മയ്ക്കു ഭാഗം ലഭിച്ച തറവാടും വസ്തുവകകളും അനന്തരാവകാശികളില്ലാതെ അന്യംനില്ക്കുകയായിരുന്നു. ഇതാണ് മാമ്പള്ളി പള്ളിക്കമ്മിറ്റി കയ്യേറി ചന്തയുണ്ടാക്കാനൊരുങ്ങുന്നത്. ചന്ത നിര്മാണം ഏതുവിധേനയും അവസാനിപ്പിക്കണമെന്നു നാട്ടുകാര് ആവശ്യപ്പെടുന്നു. ഇതേത്തുടര്ന്ന് ചന്ത പണിയുന്ന വസ്തുവിന്റെ ഉടമസ്ഥാവകാശം വിവരാവകാശ നിയമ പ്രകാരം തേടാനൊരുങ്ങുകയാണ് ചില പഞ്ചായത്തു മെമ്പര്മാരും നാട്ടുകാരും. എന്നാല് ഇന്നലെയും ചന്ത നിര്മാണം ദ്രുതഗതിയില് പുരോഗമിക്കുകയായിരുന്നു.
