കൊച്ചി: യാത്രക്കാരന്‍ വിമാനത്തിന്‌റെ എമര്‍ജന്‍സി വാതില്‍ തുറക്കാന്‍ ശ്രമിച്ച സംഭവത്തില്‍ വിശദമായ അന്വേഷണത്തിലാണ് കേന്ദ്ര-സംസ്ഥാന ഇന്റലിജന്‍സ് വിഭാഗങ്ങളും പോലീസും. അട്ടിമറി അടക്കമുള്ള കാര്യങ്ങളെക്കുറിച്ച് അന്വേഷിക്കുന്നുണ്ട്.
മലേഷ്യയില്‍ നിന്ന് കൊച്ചിയിലേക്കുള്ള വിമാനയാത്രക്കിടെ അതിക്രമം കാണിച്ച പാലക്കാട് കൂറ്റനാട് സ്വദേശി ജംഷീര്‍ അത്താണിക്കല്‍ നിലവില്‍ കസ്റ്റഡിയിലാണ്. ക്വാലാലംപൂരില്‍ നിന്ന് വരികയായിരുന്നു ബാത്തിക് എയറിന്റെ വിമാനം. ഇതിനിടെ വിന്‍ഡോ സീറ്റിലിരുന്ന ജംഷീര്‍ എമര്‍ജന്‍സി ഡോര്‍ ബലമായി വലിച്ചുതുറക്കാന്‍ ശ്രമിക്കുകയായിരുന്നു. ഒരു വിന്‍ഡോ പാനല്‍ അടിച്ചു തകര്‍ത്തു. പരിഭ്രാന്തരായ മറ്റ് യാത്രക്കാരും ക്യാബിന്‍ ക്രൂവും ചേര്‍ന്ന് ഇയാളെ വിമാനം സുരക്ഷിതമായി ലാന്‍ഡ് ചെയ്യുന്നതുവരെ തടഞ്ഞുവയ്‌ക്കുകയായിരുന്നു.
വ്യാഴാഴ്ച പുലര്‍ച്ചെ 2:40 ഓടെ വിമാനം കൊച്ചി വിമാനത്താവളത്തില്‍ ലാന്‍ഡ് ചെയ്ത ഉടന്‍ സിഐഎസ്എഫ് ഇയാളെ കസ്റ്റഡിയിലെടുത്ത് നെടുമ്പാശ്ശേരി പോലീസിന് കൈമാറി. ക്യാബിന്‍ ക്രൂവിന്റെ നിര്‍ദ്ദേശങ്ങള്‍ ആവര്‍ത്തിച്ച് അവഗണിച്ചു, നിയന്ത്രണം വിട്ട് പെരുമാറി, വിന്‍ഡോ പാനല്‍ അടിച്ചു തകര്‍ത്തു, സഹയാത്രികരെ ഭീഷണിപ്പെടുത്തി, എമര്‍ജന്‍സി എക്‌സിറ്റ് ഡോര്‍ ബലം പ്രയോഗിച്ച് തുറക്കാന്‍ ശ്രമിച്ചു എന്നീ തുടങ്ങി എയര്‍ലൈന്‍ സുരക്ഷാ മേധാവിയുടെ പരാതിയുടെ അടിസ്ഥാനത്തില്‍ പോലീസ് എഫ്‌ഐആര്‍ ഫയല്‍ ചെയ്തു. ഭീഷണിപ്പെടുത്തല്‍, സുരക്ഷാ ലംഘനങ്ങള്‍, പൊതുജന സുരക്ഷയെ അപകടപ്പെടുത്തുന്ന പ്രവൃത്തികള്‍ എന്നിവ ചുമത്തി കേസെടുത്തു. വിമാനത്തില്‍ വെച്ച് മറ്റ് യാത്രക്കാര്‍ ചിത്രീകരിച്ച ദൃശ്യങ്ങള്‍ പുറത്തുവന്നിട്ടുണ്ട്.
