ഭാരതത്തിന്റെ സാമ്പത്തിക രംഗത്ത് വലിയ മാറ്റങ്ങള് സൃഷ്ടിച്ച പരിഷ്കാരങ്ങളില് ഒന്നാണ് 2017 ജൂലൈ ഒന്നിന് നടപ്പിലാക്കിയ ജിഎസ്ടി നിയമം. നികുതി വ്യവസ്ഥയെ ഏകീകരിച്ചതോടൊപ്പം ഗതാഗത മേഖലയിലും വിപ്ലവകരമായ മാറ്റങ്ങള്ക്ക് ഇത് വഴിവെച്ചു. സംസ്ഥാന അതിര്ത്തികളിലെ ചെക്ക് പോസ്റ്റുകള് ഇല്ലാതായത് ഈ പരിഷ്കാരത്തിന്റെ പ്രധാന നേട്ടങ്ങളില് ഒന്നാണ്.
ജിഎസ്ടി നിയമം നടപ്പിലാവുന്നതിന് മുമ്പ് ഓരോ സംസ്ഥാനത്തിനും സ്വന്തം നികുതി സംവിധാനങ്ങളാണുണ്ടായിരുന്നത്. വാറ്റ്, എന്ട്രി ടാക്സ്, ഓക്ട്രോയ് എന്നിവ കാരണം സംസ്ഥാന അതിര്ത്തികളില് ചെക്ക് പോസ്റ്റുകള് അനിവാര്യമായിരുന്നു. ചരക്കുകളുമായി സഞ്ചരിക്കുന്ന ട്രക്കുകളുടെ നിരവധി രേഖകള് പരിശോധനയ്ക്ക് വിധേയമാക്കേണ്ടതും മണിക്കൂറുകളോളം കാത്തുകിടക്കേണ്ടതും പതിവായിരുന്നു. ഇതോടെ ഗതാഗതച്ചെലവ് കൂടുകയും വിതരണം വൈകുകയും ചെയ്തു. അഴിമതിക്കും കാലതാമസത്തിനും വഴിയൊരുക്കിയ സംവിധാനമായിരുന്നു ഇത്. ജിഎസ്ടി നടപ്പിലാക്കിയതോടെ ഭൂരിഭാഗം ചെക്ക് പോസ്റ്റുകളും നീക്കം ചെയ്യപ്പെട്ടു. ഇ-വേ ബില് സംവിധാനം കൊണ്ടുവന്നതിലൂടെ ഡിജിറ്റല് രീതിയില് ചരക്കുകളുടെ ഗതാഗതം നിരീക്ഷിക്കാന് സാധിച്ചു. ഇതോടെ സംസ്ഥാനങ്ങള്ക്കിടയില് തടസമില്ലാത്ത ഗതാഗതം സാധ്യമായി. യാത്രാസമയം ഗണ്യമായി കുറയുകയും ലോജിസ്റ്റിക് ചെലവുകള് ഏറെ കുറയുകയും ചെയ്തു.
ജിഎസ്ടി നിയമം നടപ്പിലായതോടുകൂടി ചരക്ക് വാഹനങ്ങളില് ഘടിപ്പിക്കുന്ന ഇലക്ട്രോണിക് ഉപകരണങ്ങള് ഗതാഗത നിയന്ത്രണത്തില് പുതിയ വഴിത്തിരിവാണ് സൃഷ്ടിച്ചിരിക്കുന്നത്. ജിപിഎസ് ട്രാക്കറുകള്, ആര്എഫ്ഐഡി ടാഗുകള്, ഫാസ്റ്റാഗ് പോലുള്ള സംവിധാനങ്ങള് ഉപയോഗിച്ച് വാഹനങ്ങളുടെ സഞ്ചാരം തത്സമയം നിരീക്ഷിക്കാനുള്ള സംവിധാനവുമെല്ലാം വലിയ പരിവര്ത്തനമുണ്ടാക്കി. ടോള് പ്ലാസകളില് നിര്ത്താതെ സ്വയമേവ പണമടയ്ക്കാന് ഫാസ്റ്റാഗ് സഹായിക്കുന്നു. ജിപിഎസ് സാങ്കേതിക വിദ്യ വഴി ചരക്കുകളുടെ സ്ഥാനം എപ്പോഴും അറിയാന് കഴിയുന്നതോടെ സുരക്ഷയും കാര്യക്ഷമതയും വര്ധിച്ചു. ആര്എഫ്ഐഡി സാങ്കേതിക വിദ്യ ഉപയോഗിച്ച് വാഹനങ്ങളുടെ തിരിച്ചറിയലും ഗതാഗത നിയന്ത്രണവും കൂടുതല് സുഗമമായി. ഈ സ്മാര്ട്ട് സാങ്കേതിക വിദ്യകളുടെ ഉപയോഗം ഗതാഗത മേഖലയെ കൂടുതല് സുതാര്യവും നിയന്ത്രിതവുമായ സംവിധാനത്തിലേക്ക് നയിച്ചു. ചെക്ക് പോസ്റ്റുകള് ഇല്ലാതായെങ്കിലും, ഡിജിറ്റല് നിരീക്ഷണത്തിലൂടെ നിയമലംഘനങ്ങള് കണ്ടെത്താനും നിയന്ത്രിക്കാനും അധികാരികള്ക്ക് സാധിക്കുന്നു. ഇതോടെ അഴിമതി കുറഞ്ഞു. നിയമാനുസൃതമായ വ്യാപാരം പ്രോത്സാഹിപ്പിക്കപ്പെട്ടു.
അതേസമയം, ഡിജിറ്റല് സംവിധാനങ്ങളിലെ ആശ്രയം വര്ധിച്ചതോടെ സാങ്കേതിക പ്രശ്നങ്ങളും ചില വെല്ലുവിളികളും നിലനില്ക്കുന്നുണ്ട്. എങ്കിലും, ജിഎസ്ടിയും അതോടൊപ്പം വന്ന ഇലക്ട്രോണിക് ഗതാഗത സംവിധാനങ്ങളും ഭാരതത്തിന്റെ ലോജിസ്റ്റിക് മേഖലയെ ഒരു പുതിയ ഉയരത്തിലേക്ക് ഉയര്ത്തിയിരിക്കുന്നു. ചെക്ക്പോസ്റ്റുകളുടെ അവസാനവും സ്മാര്ട്ട് ഉപകരണങ്ങളുടെ വരവും ചേര്ന്ന് ഭാരതത്തില് ഒരു നവീന ഗതാഗത യുഗത്തിന്റെ തുടക്കം കുറിച്ചിരിക്കുകയാണ്.
ജന്മഭൂമി ഓണ്ലൈന്