തിരുവനന്തപുരം:വാട്ടര് അതോറിറ്റി ഉദ്യോഗസ്ഥരുടെ മേല്നോട്ടമില്ലാതെ ഗാര്ഹിക കണക്ഷന് നല്കാന് റോഡ് കുഴിച്ച പ്ലംബര് 10 മണിക്കൂര് ഒരു പ്രദേശത്തെയാകെ ഇരുട്ടിലാക്കി. സ്വകാര്യ വ്യക്തിക്ക് വേണ്ടി പൈപ്പ് ലൈനില് അറ്റകുറ്റപ്പണി നടത്തുന്നതിനിടെ കെ എസ് ഇ ബി ലൈനിന് വന്ന കേടുപാട് ഇരുട്ടിലാക്കിയത് 200 ഓളം കുടുംബങ്ങളെയാണ് .
ശക്തമായ വേനല് ചൂടില് തിരുവനന്തപുരം കുടപ്പനക്കുന്നിന് സമീപമുള്ള പേരാപ്പൂര് പ്രദേശവാസികളാണ് ദുരിതമനുഭവിച്ചത്. പ്രശ്ന കാരണം തേടി കെ എസ് ഇ ബി അധികൃതര് എത്തിയപ്പോഴാണ് ഭൂമിക്കടിയിലൂടെ പോകുന്ന വൈദ്യുതി ലൈനിനാണ് തകരാറെന്ന് കണ്ടെത്തിയത്. ആ ലൈന് പൂര്ണമായി വിച്ഛേദിച്ച് അറ്റകുറ്റപ്പണി നടത്തേണ്ടി വന്നതാണ് പത്ത് മണിക്കൂര് കറന്റില്ലാതെ പ്രദേശവാസികള് കഷ്ടപ്പെട്ടത്.
കെ എസ് ഇ ബി യും വാട്ടര് അതോറിറ്റിയും അറിയാതെ നടത്തിയ പണിയാണ് 200 ല് അധികം കുടുംബങ്ങളെ ഇരുട്ടിലാക്കിയത്. അധികൃതര് അറിയാതെ സ്വകാര്യ വ്യക്തി പൈപ്പ് ലൈനില് നടത്തിയ പണിയാണ് ഇതെന്നാണ് അറിയുന്നത്. പേരാപ്പൂരില് കഴിഞ്ഞ ദിവസം ഉച്ചയ്ക്ക് ശേഷം മൂന്ന് മണിക്ക് പോയ കറണ്ട് തിരികെ വന്നത് 10 മണിക്കൂറിന് ശേഷമാണ്. വാട്ടര് അതോറിറ്റി ലൈസന്സ് ഉള്ള പ്ലംബര് ആണ് പണി നടത്തിയത്. പി ഡബ്യു ഡിയില് നിന്ന് അനുമതി വാങ്ങിയിരുന്നു. എന്നാല് പൊതു അവധി ദിവസം പണി നടത്തുന്ന വിവരം ഇയാള് വാട്ടര് അതോറിറ്റിയെ അറിയിച്ചില്ല എന്നാണ് അതോറിറ്റി അറിയിച്ചത്.എന്നാല് വിവരം വാട്ടര് അതോറിറ്റിയെ അറിയിച്ചിരുന്നു എന്നാണ് പ്ലംബര് പറയുന്നത്.
