ന്യൂദല്ഹി: അദ്ധ്യാപക യോഗ്യതാ പരീക്ഷയുമായി (ടെറ്റ്/കെ-ടെറ്റ്) ബന്ധപ്പെട്ട സുപ്രീംകോടതി വിധിയില് സമര്പ്പിക്കപ്പെട്ട പുനഃപരിശോധനാ ഹര്ജികളില് തുറന്ന കോടതിയില് വാദം കേള്ക്കാന് സുപ്രീംകോടതി. ഹര്ജികള് തുറന്ന കോടതിയില് വാദം കേള്ക്കണമെന്ന അപേക്ഷ സുപ്രീംകോടതി അനുവദിക്കുകയായിരുന്നു. ജസ്റ്റിസ് ദീപാങ്കര് ദത്ത, ജസ്റ്റിസ് മന്മോഹന് എന്നിവരടങ്ങിയ ബെഞ്ച് ഹര്ജികള് പരിഗണിച്ച ശേഷമാണ് ഉത്തരവ് പുറപ്പെടുവിച്ചത്. മെയ് 13ന് ഉച്ചയ്ക്ക് രണ്ട് മണിക്ക് പുനഃപരിശോധനാ ഹര്ജികളില് തുറന്ന കോടതിയില് വാദം കേള്ക്കും. ദേശീയ അദ്ധ്യാപക പരിഷത്ത് സംസ്ഥാന ജനറല് സെക്രട്ടറി ടി. അനൂപ്കുമാര് (എന്ടിയു, കേരളം) ഉള്പ്പെടെ വിവിധ സംഘടനകള് ഹര്ജികള് തുറന്ന കോടതിയില് വാദം കേള്ക്കണമെന്ന് ആവശ്യപ്പെട്ട് അപേക്ഷ സമര്പ്പിച്ചിരുന്നു.
സാധാരണഗതിയില് പുനഃപരിശോധനാ ഹര്ജികള് ജഡ്ജിമാരുടെ ചേംബറില് സര്ക്കുലേഷന് വഴി മാത്രമാണ് പരിഗണിക്കാറുള്ളത്. എന്നാല് വിഷയത്തിന്റെ പ്രാധാന്യം പരിഗണിച്ച് തുറന്ന കോടതിയില് വാദം കേള്ക്കാനുള്ള അപേക്ഷ കോടതി അംഗീകരിക്കുകയായിരുന്നു. രാജ്യത്തെ 25 ലക്ഷത്തോളം അദ്ധ്യാപകരുടെ ജോലിയെ ബാധിക്കുന്നതും കേരളത്തിലെ 75,000ത്തിലധികം അദ്ധ്യാപകരുടെ സേവനത്തെ ബാധിക്കുന്നതുമായ വിധിയില് ഇതോടെ നേരിട്ട് വാദം ഉന്നയിക്കാന് അവസരം ലഭിക്കും. 45 ഓളം പുനഃപരിശോധന ഹര്ജികളാണ് ബെഞ്ച് കഴിഞ്ഞ ദിവസം ചേംബറില് പരിഗണിച്ചത്.
അദ്ധ്യാപക നിയമനത്തിനും പ്രൊമോഷനും അദ്ധ്യാപക യോഗ്യത പരീക്ഷ നിര്ബന്ധമാക്കിയ സുപ്രീംകോടതി വിധി നടപ്പാക്കിയാല് നെറ്റ്, എംഫില്, എംഎഡ്, പിഎച്ച്ഡി അടക്കം ഉയര്ന്ന യോഗ്യതയുടെ അടിസ്ഥാനത്തില് ടെറ്റ് പരീക്ഷ പാസാകാതെ ജോലിക്ക് കയറിയ സംസ്ഥാനത്തെ മുക്കാല് ലക്ഷത്തിലധികം വരുന്ന അദ്ധ്യാപകരുടെ ജോലിയെയും പ്രമോഷനെയും അത് ബാധിക്കും. ഇവര് വീണ്ടും യോഗ്യതാ പരീക്ഷയായ ടെറ്റ് പാസായാല് മാത്രമേ ജോലിയില് തുടരാനും പ്രമോഷനും അവസരം ലഭിക്കൂ. കുട്ടികളുടെ ബോധന ശാസ്ത്രത്തിലും അദ്ധ്യാപന അഭിരുചിയിലും കേന്ദ്രീകരിക്കുന്ന യോഗ്യതാ പരീക്ഷയാണ് ടെറ്റെന്നും സ്കൂള് അദ്ധ്യാപകരാകാനുള്ള ഈ യോഗ്യത എല്ലാ അദ്ധ്യാപകരും പാസാകണമെന്നുമാണ് സുപ്രീംകോടതി മുന് ഉത്തരവില് ചൂണ്ടിക്കാട്ടിയത്.
