കൊല്ക്കൊത്ത: ബംഗാളില് വോട്ടെണ്ണല് അട്ടിമറിക്കാന് മമതയുടെ നീക്കം. ബാലറ്റ് പേപ്പറുഖളും വോട്ടിംഗ് യന്ത്രങ്ങളും സൂക്ഷിക്കുന്ന സൗത്ത് കൊല്ക്കൊത്തയിലെ സഖാവത്ത് മെമ്മോറിയല് സ്കൂളിലെ സ്ട്രോംഗ് റൂം തുറന്നെന്നായിരുന്നു തൃണമൂല് നേതാക്കളുടെ ആരോപണം. ഇതേ തുടര്ന്ന് മമത ബാനര്ജി താന് മത്സരിക്കുന്ന ഭവാനിപൂര് മണ്ഡലത്തിലെ സ്ട്രോംഗ് റൂമിന് മുന്പില് പ്രവര്ത്തകരുമായി എത്തി. എന്നാല് പിന്നീട് തൃണമൂല് പ്രവര്ത്തകര് വിവിധ സ്ട്രോംങ് റൂമുകള്ക്ക് മുന്പില് കൂട്ടത്തോടെ എത്തുകയായിരുന്നു. എന്നാല് തെരഞ്ഞെടുപ്പ് കമ്മീഷന് കര്ശനമായ നിര്ദേശം നല്കിയതിന്റെ അടിസ്ഥാനത്തില് കേന്ദ്രസേന എല്ലാ സ്ട്രോങ് റൂമുകള്ക്ക് മുന്പിലും നിലയുറപ്പിച്ചിരിക്കുകയാണ്.
ബാലറ്റ് ബോക്സുകള് സൂക്ഷിക്കുന്ന സ്ട്രോംഗ് റൂമിന് മുന്നില് ആരു വന്നാലും തടയാന് തെരഞ്ഞെടുപ്പ് കമ്മീഷന് ജില്ലാ മജിസ്ട്രേറ്റുമാരുടെയും ഡിജിപി ഉള്പ്പെടെയുള്ള ഉന്നത പൊലീസ് ഉദ്യോഗസ്ഥരുടെയും യോഗത്തില് അന്ത്യശാസനം നല്കിയിരിക്കുകയാണ്. സ്ട്രോംഗ് റൂമിന്റെ സീല് തുറക്കാന് ആരേയും അനുവദിക്കില്ലെന്ന് തെരഞ്ഞെടുപ്പ് കമ്മീഷന് വ്യക്തമാക്കിയിട്ടുണ്ട്.
സമൂഹമാധ്യമങ്ങളില് പങ്കുവെയ്ക്കപ്പെട്ട ഒരു വീഡിയോയാണ് മമതയേയും തൃണമൂല് നേതാക്കളേയും ചൊടിപ്പിച്ചത്. ഇത് കലാപമുണ്ടാക്കാന് കരുതിക്കൂട്ടി തയ്യാറാക്കിയ വീഡിയോ ആണെന്ന് കരുതുന്നു. സ്ട്രോങ്ങ് റൂം തുറക്കുന്നതായാണ് ഈ വീഡിയോ. നേതാജി ഇന്ഡോര് സ്റ്റേഡിയത്തിലെ സ്ട്രോങ്ങ് റൂമില് തിരിമറി നടന്നു എന്ന ആരോപണവും തൃണമൂല് ഉയര്ത്തി..രണ്ടാംഘട്ട വോട്ടെടുപ്പില് കൊല്ക്കത്തയില് നിന്നുള്ള വോട്ടിംഗ് യന്ത്രങ്ങള് ഇരിക്കുന്ന സ്ട്രോംഗ് റൂം തുറന്നെന്നും ചില ബാലറ്റ് പേപ്പറുകള് ആരോ കൊണ്ടുവെയ്ക്കുന്നതായി കണ്ടുവെന്നുമാണ് ആരോപണം. ഇത് വോട്ടിംഗ് യന്ത്രങ്ങള് ദുരുപയോഗം ചെയ്യാനാണെന്ന് ആരോപിച്ചാണ് മമതയും കൂട്ടരും രംഗത്തെത്തിയത്. ഇപ്പോള് സ്ട്രോംഗ് റൂമിന് മുന്പില് തൃണമൂല് പ്രവര്ത്തകരും ബിജെപി പ്രവര്ത്തകരും തമ്പടിച്ചിരിക്കുകയാണ്.
സ്ട്രോംഗ് റൂമിന് മുന്നില് എത്തിയ മമത വന്ന വാഹനം ബിജെപി പ്രവര്ത്തകര് തടഞ്ഞു. മമതയുടെ വാഹനത്തില് എന്തോ കാര്യമായ സാധനം ഒളിപ്പിച്ചുവെച്ചിട്ടുണ്ടെന്നും അതിനാല് ഈ വാഹനം കടത്തിവിടില്ലെന്നുമാണ് ബിജെപി പ്രവര്ത്തകര് വാദിച്ചത്.
