ഇന്ത്യൻ സായുധസേനയ്ക്ക് കൂടുതൽ കരുത്ത് പകർന്ന് അഗ്നി 6 ഒരുങ്ങിക്കഴിഞ്ഞു . മിസൈലിന്റെ രൂപകൽപ്പന ഡിആർഡിഒ പൂർത്തിയാക്കി. പ്രോട്ടോടൈപ്പ് നിർമ്മിക്കുന്നതിനുള്ള പ്രവർത്തനങ്ങൾ നിലവിൽ പുരോഗമിക്കുകയാണെന്ന് ഡിആർഡിഒ ചെയർമാൻ ഡോ. സമീർ വി. കാമത്ത് പറഞ്ഞു .
പദ്ധതി പൂർണ്ണമായും മുന്നോട്ട് കൊണ്ടുപോകാനും ഫ്ലൈറ്റ് ടെസ്റ്റുകൾ നടത്താനുമുള്ള തീരുമാനം കേന്ദ്ര സർക്കാരിനാണ്. സർക്കാർ അനുമതി ലഭിച്ചാലുടൻ ഡിആർഡിഒ പറക്കൽ പരീക്ഷണങ്ങൾ ആരംഭിക്കുമെന്നും അദ്ദേഹ പറഞ്ഞു. വിജയകരമായ പരീക്ഷണത്തിന് ശേഷം, ഇന്ത്യൻ സായുധ സേനയുടെ സ്ട്രാറ്റജിക് ഫോഴ്സ് കമാൻഡിൽ ഇത് ഉൾപ്പെടുത്തും.
ഇന്ത്യയുടെ പ്രതിരോധ ശക്തി കൂടുതൽ ശക്തിപ്പെടുത്താൻ ലക്ഷ്യമിടുന്ന അഗ്നി-6 പദ്ധതി കരുത്തോടെ മുന്നോട്ട് പോകുന്നുവെന്നാണ് സമീർ വി കാമത്ത് സൂചിപ്പിക്കുന്നത് . 10,000 കിലോമീറ്ററിൽ കൂടുതൽ ദൂരമുള്ള ലക്ഷ്യങ്ങളെ ആക്രമിക്കാൻ കഴിവുള്ള ഇന്ത്യയുടെ അടുത്ത ഇന്റർകോണ്ടിനെന്റൽ ബാലിസ്റ്റിക് മിസൈൽ (ഐസിബിഎം) ആകാൻ ഒരുങ്ങുകയാണ് അഗ്നി-6.
ഡിആർഡിഒ നിലവിൽ വികസിപ്പിച്ചുകൊണ്ടിരിക്കുന്ന ഇന്ത്യയുടെ ഏറ്റവും നൂതനമായ ദീർഘദൂര ബാലിസ്റ്റിക് മിസൈലാണ് അഗ്നി-6. ഈ മിസൈലിൽ എംഐആർവി (മൾട്ടിപ്പിൾ ഇൻഡിപെൻഡന്റ്ലി ടാർഗെറ്റബിൾ റീ-എൻട്രി വെഹിക്കിൾ) സാങ്കേതികവിദ്യയാണ് സജ്ജീകരിച്ചിരിക്കുന്നത് . അതായത് ഈ ഒരൊറ്റ മിസൈലിന് വ്യത്യസ്ത ലക്ഷ്യങ്ങളെ ഒരേസമയം ആക്രമിക്കാൻ കഴിവുള്ള ഒന്നിലധികം ആണവ വാർഹെഡുകൾ വഹിക്കാൻ കഴിയും.
തന്ത്രപരമായ പ്രതിരോധം ലക്ഷ്യമിട്ടാണ് മിസൈൽ പ്രധാനമായും വികസിപ്പിച്ചുകൊണ്ടിരിക്കുന്നത്. ചൈനയുടെ ഏത് ഭാഗത്തെയും എളുപ്പത്തിൽ ലക്ഷ്യം വയ്ക്കാൻ ഇത് വഴി ഇന്ത്യയ്ക്ക് കഴിയും. 10,000 മുതൽ 12,000 കിലോമീറ്റർ വരെയാണ് ഇതിന്റെ ദൂരപരിധി. ഭാരം കുറഞ്ഞ പേലോഡുള്ളതിനാൽ, ഇതിന് 14,000 മുതൽ 16,000 കിലോമീറ്റർ ദൂരം എത്താൻ കഴിയും.ഏകദേശം 3 ടൺ (3,000 കിലോഗ്രാം) ന്യൂക്ലിയർ അല്ലെങ്കിൽ തെർമോ ന്യൂക്ലിയർ വാർഹെഡുകൾ വഹിക്കാനുമാകും.
10 മുതൽ 11 വരെ വാർഹെഡുകൾ വഹിക്കാൻ അഗ്നി 6 ന് ശേഷിയുണ്ട്. ഓരോ വാർഹെഡിനും 250 കിലോടൺ വരെ ഭാരം വഹിക്കാൻ കഴിയും. 55,000 മുതൽ 70,000 കിലോഗ്രാം വരെയാണ് ഭാരം. 20 മുതൽ 40 മീറ്റർ വരെയാണ് നീളം.ഭാവിയിൽ അന്തർവാഹിനിയിൽ നിന്ന് വിക്ഷേപിക്കാവുന്ന വകഭേദവും വികസിപ്പിച്ചേക്കാം.ഒരൊറ്റ മിസൈലിന് ഒരേസമയം ഒന്നിലധികം നഗരങ്ങളെയോ സൈനിക താവളങ്ങളെയോ നശിപ്പിക്കാൻ കഴിയും . ഇന്ത്യ നിലവിൽ അഗ്നി-5 വിന്യസിച്ചിട്ടുണ്ട് – 5,000 കിലോമീറ്ററിൽ കൂടുതൽ ദൂരപരിധിയുള്ള മിസൈൽ – കൂടാതെ എംഐആർവി പരീക്ഷണങ്ങളും വിജയകരമായി നടത്തിയിട്ടുണ്ട്.
