തിരുവനന്തപുരം: സര്ക്കാര് നയങ്ങളെ വിമര്ശിച്ചെന്ന് കാട്ടി സൈനിക ക്ഷേമ പ്രിന്സിപ്പല് സെക്രട്ടറി ബി അശോകിന് സസ്പെന്ഷന്. അനുമതിയില്ലാതെ മാധ്യമങ്ങളില് പ്രതികരിച്ചതും ചൂണ്ടിക്കാട്ടിയാണ് നടപടി.
സമൂഹമാധ്യമങ്ങളില് സര്ക്കാര് നയങ്ങളെ വിമര്ശിച്ചു, അഭിമുഖങ്ങളില് വിമര്ശിച്ചു, ഐഎഎസ് ഉദ്യോഗസ്ഥന് പാലിക്കേണ്ട സര്വീസ് ചട്ടങ്ങള് ലംഘിച്ചു എന്നിങ്ങനെ ഉത്തരവില് ചൂണ്ടിക്കാട്ടുന്നു.
നിയമസഭാ തിരഞ്ഞെടുപ്പിന് മുന്പ് മാധ്യമങ്ങള് വഴി ബി അശോക് പ്രതികരണങ്ങള് നടത്തിയിരുന്നു. തുടര്ഭരണം ഫാസിസ്റ്റ് പ്രവണതയാണെന്നായിരുന്നു അശോകിന്റെ പ്രതികരണം. പിന്നാലെയാണ് സര്ക്കാര് നയങ്ങളെ വിമര്ശിച്ചുവെന്ന് ചൂണ്ടിക്കാട്ടി സസ്പന്ഷന്.സുതാര്യമായ ജനാധിപത്യത്തിന് വോട്ടര്മാര് ജാഗ്രത കാണിക്കണമെന്ന് ഒരു ലേഖനത്തില് അശോക് ആവശ്യപ്പെട്ടിരുന്നു.
ആഭ്യന്തരവകുപ്പിനെയും ലേഖനത്തില് രൂക്ഷമായി വിമര്ശിക്കുന്നു.അഭിപ്രായങ്ങള് വ്യക്തിപരമാണെന്നും ലേഖനത്തിന്റെ അവസാനത്തില് അശോക് പറയുന്നുണ്ട്. തിരഞ്ഞെടുപ്പ് ഫലം വരാനിരിക്കെയാണ് ബി അശോകിനെതിരെയുളള നടപടി.
സസ്പെന്ഷന് ചട്ട വിരുദ്ധമെന്ന് ബി അശോക് പ്രതികരിച്ചു. ഉത്തരവ് നിയമപരമായി നില നില്ക്കില്ലെന്നും സസ്പെന്ഷന് പ്രതികാര നടപടിയാണെന്നും ബി അശോക് പറഞ്ഞു. ചീഫ് സെക്രട്ടറിയാണ് സസ്പന്ഷന് ഉത്തരവ് പുറപ്പെടുവിച്ചിരിക്കുന്നത്.
കാര്ഷിക സര്വകലാശാല വൈസ് ചാന്സലര് കൂടിയാണ് ബി അശോക്.
