കൊല്ലം:തെന്മല ഡിവിഷനിലെ കൊടും വനത്തിന് അര കിലോമീറ്റര്‍ ഉള്ളിലുളള ക്ഷേത്രത്തിന് പുറകുവശത്തായി മനുഷ്യന്റെ അസ്ഥിയും തലയോട്ടിയും കണ്ടെത്തിയത് വിറക് ശേഖരിക്കാനായി എത്തിയ സ്ത്രീകള്‍.തെന്മല ഡാം ജംഗ്ഷനിലെ കെ ഐ പി ഉന്നതിയോട് ചേര്‍ന്നാണ് ക്ഷേത്രം.
അസ്ഥികൂടം കണ്ടതിന് തൊട്ട് അടുത്തായി മരത്തില്‍ കയര്‍ ഉണ്ട്. ഒപ്പം പുരുഷന്റേത് എന്ന് തോന്നിക്കുന്ന വസ്ത്രങ്ങളും ചെരിപ്പും ഉണ്ട്
ഒന്നര വര്‍ഷം മുമ്പ് ഉന്നതിയില്‍ നിന്നും കാണാതായ ആളുടെ അസ്ഥികൂടമാകാം ഇതെന്നാണ് കരുതുന്നത്. കാണാതായ ആളെ കുറിച്ച് പൊലീസ് അന്വേഷണം നടത്തി വരികയായിരുന്നു.
തെന്മല ഡാമും പരിസരവും വനത്താല്‍ ചുറ്റപ്പെട്ട പ്രദേശം ആയതിനാല്‍ ഉന്നതയിലെ മിക്ക വീടുകളിലെ ആള്‍ക്കാരും വനത്തില്‍ നിന്നുമാണ് വിറക് ശേഖരിക്കുന്നത്. അങ്ങനെ വിറക് ശേഖരിക്കാന്‍ ആയി എത്തിയ മൂന്ന് സ്ത്രീകളാണ് ആദ്യം തലയോട്ടി കാണുന്നതും പിന്നീട് തെന്മല പൊലീസില്‍ വിവരം ധരിപ്പിക്കുന്നതും.പൊലീസ് ,ഫോറന്‍സിക്ക് വിരലടയാള വിദഗ്ധര്‍ ഉള്‍പ്പെടെയുള്ളവര്‍ സ്ഥലത്ത് പരിശോധന നടത്തി.
ഒന്നരവര്‍ഷം മുമ്പ് ഉന്നതിയില്‍ നിന്നും കാണാതായ വൃദ്ധന്റെ മൃതശരീരം തന്നെയാകാം എന്നാണ് പ്രദേശവാസികള്‍ പറയുന്നത് .അദ്ദേഹം ഉപയോഗിക്കുമായിരുന്ന വസ്ത്രങ്ങളും ചെരുപ്പും പ്രദേശവാസികള്‍ തിരിച്ചറിഞ്ഞിട്ടുണ്ട്
