കോട്ടയം: സംസ്ഥാനത്ത് ഇന്നും ഉയര്ന്ന താപനില മുന്നറിയിപ്പു നല്കി കേന്ദ്ര കാലാവസ്ഥാ വകുപ്പ് (ഐഎംഡി). ഇടുക്കി, വയനാട് ഒഴികെയുള്ള ജില്ലകളില് യെലോ അലര്ട്ട് പ്രഖ്യാപിച്ചു. സംസ്ഥാനത്ത് സാധാരണയെക്കാള് മൂന്ന് മുതല് നാല് വരെ ഡിഗ്രി സെല്ഷ്യസ് കൂടുതലാകും താപനില.
പാലക്കാട് ജില്ലയില് 40, കൊല്ലം ജില്ലയില് 39, എന്നിങ്ങനെ വരെ ഡിഗ്രിയില് ചൂടുയരാം. കോട്ടയം, പത്തനംതിട്ട, തൃശൂര്, കോഴിക്കോട് ജില്ലകളില് 38 ഡിഗ്രി വരെയാകാം. ആലപ്പുഴ, എറണാകുളം, മലപ്പുറം, കണ്ണൂര്, കാസര്കോട് ജില്ലകളില് 37, തിരുവനന്തപുരം ജില്ലയില് 36 എന്നിങ്ങനെ ചൂടുയരാനിടയുണ്ട്.
ഉയര്ന്ന താപനിലയും ഈര്പ്പമുള്ള വായുവും കാരണം മലയോര മേഖലകളിലൊഴികെ ചൂടും അസ്വസ്ഥതയുമുള്ള കാലാവസ്ഥയ്ക്ക് സാധ്യത. വിവിധ പ്രദേശങ്ങളില് അള്ട്രാവയലറ്റ് സൂചിക (യുവി ഇന്ഡക്സ്) ഉയര്ന്ന് നില്ക്കുന്നതിനാല് സൂര്യാതപമേല്ക്കാന് സാധ്യത കൂടുതലാണ്.
യുവി സൂചിക കോട്ടയം, പത്തനംതിട്ട, ആലപ്പുഴ, ഇടുക്കി ഇന്നലെ ഉച്ചയ്ക്ക് 12.30ന് എട്ട് (ഓറഞ്ച് അലര്ട്ട്) രേഖപ്പെടുത്തി. മലപ്പുറത്ത് ഏഴും കൊല്ലം, എറണാകുളം, തൃശൂര്, പാലക്കാട്, കോഴിക്കോട്, വയനാട് ജില്ലകളില് ആറും (യെലോ അലര്ട്ട്).
വിവിധ ജില്ലകളില് 29, 30, മേയ് ഒന്ന് തീയതികളില് ഒറ്റപ്പെട്ട ശക്തമായ മഴയ്ക്ക് സാധ്യതയുണ്ട്. പത്തനംതിട്ട, ഇടുക്കി ജില്ലകളില് 29നും മേയ് ഒന്നിനും കണ്ണൂരും കാസര്കോട്ടും 30നും വയനാട്ടില് മേയ് ഒന്നിനും യെലോ അലര്ട്ട് പ്രഖ്യാപിച്ചു.
ഒറ്റപ്പെട്ടയിടങ്ങളില് 28 മുതല് മേയ് ഒന്ന് വരെ ഇടി മിന്നലോടു കൂടിയ മഴയ്ക്കും മണിക്കൂറില് 40-50 കി.മീ. വേഗത്തില് ശക്തമായ കാറ്റിനും സാധ്യതയുണ്ട്.
