ന്യൂദല്‍ഹി: ഭാരതത്തിന്റെ ചരിത്ര വ്യക്തിത്വങ്ങളെയും സംഭവങ്ങളെയും പകര്‍ത്തിയ ഫോട്ടോഗ്രാഫര്‍ ഇനി ഓര്‍മ. 1972ലെ ബംഗ്ലാദേശ് വിമോചന സമരം, ഭോപ്പാല്‍ ദുരന്തം എന്നിങ്ങനെ’ഭാരതമാകെ അടിവരയിടുന്ന പല സന്ദര്‍ഭങ്ങളെയും ജനങ്ങള്‍ കണ്ടറിഞ്ഞത് റായ്യുടെ ചിത്രങ്ങളിലൂടെയാണ്. ഇന്ദിരാഗാന്ധി, മദര്‍ തെരേസ, ദലൈലാമാ, സത്യജിത് റേ, ഹരിപ്രസാദ് ചൗരസ്യ, ബിസ്മില്ലാഖാന്‍ തുടങ്ങിയവരുടെ നിരവധി ചിത്രങ്ങളെടുത്തതിലൂടെ ഭാരതത്തിന്റെ സാമൂഹിക, സാംസ്‌ക്കാരിക, ആത്മീയ മാനങ്ങളെ അദ്ദേഹം പകര്‍ത്തി.
നിത്യേന പത്രങ്ങളില്‍ റായുടെ ചിത്രം ഇടം പിടിക്കുന്നതിനേക്കാള്‍ കൂടുതല്‍ സംവേദനക്ഷമതയോടെ സാധാരണ ജനങ്ങളുടെ ജീവിതവും ആ ക്യാമറ ഫിലിമിലുടെ കടന്നു പോയി. റായ് ചിത്രങ്ങള്‍ ടൈം, ലൈഫ്, ദി ന്യൂയോര്‍ക്ക് ടൈംസ് ദി ഇന്‍ഡിപ്പെന്‍ഡന്റ് തുടങ്ങിയ അന്താരാഷ്‌ട്ര പ്രസിദ്ധീകരണങ്ങളുടെ നിറസാന്നിധ്യമായിരുന്നു. റിഫ്‌ളക്ഷന്‍സ് ഇന്‍ ബ്ലാക്ക് ആന്‍ഡ് വൈറ്റ്, എക്‌സ്‌പോഷര്‍: പൊര്‍ട്രൈറ്റ് ഓഫ് എ കോര്‍പ്പറേറ്റ് ക്രൈം എന്നിവയുള്‍പ്പെടെ നിരവധി പുസ്തകങ്ങള്‍ രചിച്ചു. 2010ല്‍ സ്ഥാപിതമായ രഘു റായ് ഫൗണ്ടേഷന്‍ അദ്ദേഹത്തിന്റെ 50,000 ചിത്രങ്ങള്‍ സൂക്ഷിക്കുന്നു.
അദ്ദേഹം തന്റെ 57-ാമത് പുസ്തകത്തിന്റെ പണിപ്പുരയിലായിരുന്നു. മദര്‍ തെരേസയെ മാര്‍പ്പാപ്പ വിശുദ്ധയായി പ്രഖ്യാപിക്കുന്നതിന് എത്രയോ മുമ്പ് സെയ്ന്റ് മദര്‍ എന്ന പേരില്‍ റായ് പുസ്തകമിറക്കി. ഭോപ്പാല്‍ ദുരന്തത്തിന്റെ പേരില്‍ അദ്ദേഹം രചിച്ച പുസ്തകമാണ് എക്‌സ്‌പോഷര്‍, എ കോര്‍പറേറ്റ് ക്രൈം. ലോക പ്രശസ്ത ഫോട്ടോഗ്രാഫര്‍മാരുടെ കൂട്ടായ്‌മയായ മാഗ്നം ഫോട്ടോസിലെ അംഗം കൂടിയാണ് റായ്. പഞ്ചാബിലെ ജംഗില്‍ ആണ് ജനനം, നിലവില്‍ ഈ സ്ഥലം പാകിസ്താന്റെ ഭാഗമാണ്.
