ആലപ്പുഴ:ജില്ലാ ജയിലില് റിമാന്ഡ് പ്രതി തൂങ്ങി മരിച്ച നിലയില് .ഞായറാഴ്ച വൈകിട്ടാണ് സംഭവം. റിമാന്ഡ് പ്രതി പുന്നപ്ര സ്വദേശി ശരത് പ്രസാദിനെയാണ് മരിച്ച നിലയില് കണ്ടത്.ജനറല് ആശുപത്രിയില് ഡോക്ടറെ അസഭ്യം പറഞ്ഞ കേസിലെ പ്രതിയാണ് .ഇയാളെ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
ജില്ലാ ജയിലിലെ ശുചിമുറിയില് ഉടുമുണ്ടില് തൂങ്ങി മരിച്ചനിലയിലാണ് ശരത്തിനെ കണ്ടെത്തിയത്. വൈകിട്ടത്തെ റേഷന് വാങ്ങി മുകള്നിലയിലെ എഫ് വണ് സെല്ലിലേക്ക് പോയ ശരത്പ്രസാദ് മൂത്രമൊഴിക്കണമെന്ന് ആവശ്യപ്പെട്ടാണ് ശുചിമുറിയില് പോയത്. പ്രിസണ് ഓഫീസര് നടത്തിയ പരിശോധനയിലാണ് പ്രതി ഉടുമുണ്ടില് തൂങ്ങി നില്ക്കുന്നത് കണ്ടത്.
റോഡപകടത്തില്പ്പെട്ട് ജനറല് ആശുപത്രിയിലെത്തിയ ശരത്പ്രസാദ് അത്യാഹിത വിഭാഗത്തിലെ ഡോക്ടറെ അസഭ്യം പറഞ്ഞ് കയ്യേറ്റം ചെയ്തത് കഴിഞ്ഞ 21നാണ്. പരിശോധിക്കാനെത്തിയ ഡോക്ടറോട് തന്നോട് ഒന്നും ചോദിക്കണ്ടെന്നും എക്സ്റേ എടുക്കാന് എഴുതി തന്നാല് മാത്രം മതിയെന്നും പറഞ്ഞായിരുന്നു അസഭ്യ വര്ഷം. ഇയാള് ബഹളമുണ്ടാക്കിയതോടെ മറ്റു രോഗികളെ ചികിത്സിക്കാന് കഴിഞ്ഞില്ലെന്നും ജോലി തടസപ്പെടുത്തിയെന്നും കാട്ടി ഡോക്ടര് നല്കിയ പരാതിയിലായിരുന്നു അറസ്റ്റ്. ശരത് പ്രസാദ് മുമ്പും നിരവധിക്കേസുകളിലെ പ്രതിയാണ്. ശശിധരന് – സരസ്വതി ദമ്പതികളുടെ മകനാണ്. ഭാര്യ: സിജിന. മക്കള്: കാര്ത്തിക്, ദിക്ഷ.
