കൊച്ചി: തപസ്യ കലാസാഹിത്യവേദിയുടെ ഈ വര്‍ഷത്തെ അക്കിത്തം പുരസ്‌കാരത്തിന് കവി വി. മധുസൂദനന്‍ നായര്‍ അര്‍ഹനായി. ഒരുലക്ഷം രൂപയും പ്രശംസാ പത്രവും കീര്‍ത്തി ഫലകവും അടങ്ങുന്നതാണ് പുരസ്‌കാരം. മേയ് 15ന് കോഴിക്കോട്ടെ തപസ്യ സുവര്‍ണ ജൂബിലി ആഘോഷ സമാപന പരിപാടിയില്‍ അവാര്‍ഡ് സമര്‍പ്പിക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ പറഞ്ഞു. ജ്ഞാനപീഠ ജേതാവായ മഹാകവി അക്കിത്തത്തിന്റെ ജന്മശതാബ്ദി വര്‍ഷം കൂടിയാണിത്.
പ്രശസ്ത നിരൂപകന്‍ ആഷാ മേനോന്‍, എഴുത്തുകാരന്‍ പ്രൊഫ. കെ.പി. ശശിധരന്‍, കവി കല്ലറ അജയന്‍ എന്നിവരടങ്ങുന്ന ജൂറിയാണ് അവാര്‍ഡ് നിര്‍ണയിച്ചത്.
കവിതാ രചനയിലൂടെയും കാവ്യാലാപനത്തിലൂടെയും മലയാള കവിതയെ ആധുനിക കാലത്ത് ജനകീയമാക്കുകയും അതുവഴി പുതിയൊരു ഭാവുകത്വം കൊണ്ടുവരികയും ചെയ്ത കവിയാണ് മധുസൂദനന്‍ നായരെന്ന് ജൂറി വിലയിരുത്തി.
മലയാള സാഹിത്യത്തില്‍ സവിശേഷ സംഭാവനകള്‍ നല്കുന്നവരെയാണ് അക്കിത്തം പുരസ്‌കാരം നല്കി ആദരിക്കുക. എം.ടി. വാസുദേവന്‍ നായര്‍, ശ്രീകുമാരന്‍ തമ്പി, പ്രൊഫ. കെ.പി. ശങ്കരന്‍ എന്നിവരാണ് മുമ്പ് അക്കിത്തം പുരസ്‌കാരം ലഭിച്ചവര്‍.
വാര്‍ത്താ സമ്മേളനത്തില്‍ തപസ്യ സംസ്ഥാന വര്‍ക്കിങ് പ്രസിഡന്റ് പ്രൊഫ. പി.ജി. ഹരിദാസ്, ജില്ലാ പ്രസിഡന്റ് വെണ്ണല മോഹന്‍, ജില്ലാ ജനറല്‍ സെക്രട്ടറി കെ.വി. രാജീവ്, ലക്ഷ്മി നാരായണന്‍ (സംസ്‌കാര്‍ ഭാരതി) എന്നിവര്‍ പങ്കെടുത്തു.
