കണ്ണൂര്: അഞ്ചരക്കണ്ടി ഡെന്റല് കോളേജിലെ ബിഡിഎസ് വിദ്യാര്ഥി നിതിന്രാജിനെ ജാതീയമായി അധിക്ഷേപിച്ചതിന് തെളിവില്ലെന്ന് തലശേരി അഡീഷണല് സെഷന്സ് കോടതി.നിതിന് രാജിന്റെ മരണത്തില് ഡോ.എം.കെ.റാമിന് മുന്കൂര് ജാമ്യം നിഷേധിച്ചും രണ്ടാം പ്രതി ഡോ.കെ.ടി.സംഗീത നമ്പ്യാര്ക്ക് മുന്കൂര് ജാമ്യം അനുവദിച്ചുമുളള വിധിയുടെ വിശദാംശങ്ങള് പുറത്തു വന്നു.
വിദ്യാര്ത്ഥികളോട് ഉള്ള ഡോ. റാമിന്റെ പെരുമാറ്റം മോശമായിരുന്നു. എന്നാല്, അത് ജാതിയെ അടിസ്ഥാനമാക്കിയുള്ളതല്ലെന്നും വിധിയില് പറയുന്നു. നിതിന് രാജ്, ലോണ് ആപ്പുകാരുടെ ഭീഷണിയില് കടുത്ത മാനസിക സമ്മര്ദ്ദത്തിലായിരുന്നു.
പ്രിന്സിപ്പാളിന്റെ മുറിയില് വച്ച് നടന്ന ചോദ്യം ചെയ്യലും തുടര്ന്നുളള സൈബര് പരാതിയെക്കുറിച്ചുള്ള ഭയവുമാണ് നിതിന് രാജിന്റെ ആത്മഹത്യക്ക് കാരണം. പ്രിന്സിപ്പാളിന്റെ മുറിക്ക് സമീപം റാമിന്റെ സാന്നിധ്യവും വിദ്യാര്ത്ഥികളുടെ മൊഴികളുമടക്കം പ്രോസിക്യൂഷന് വാദങ്ങള് കോടതി ശരിവച്ചു. ഈ സാഹചര്യത്തില് റാമിനെ കസ്റ്റഡിയില് ചോദ്യം ചെയ്യേണ്ടത് അനിവാര്യമാണെന്ന് കോടതി നിരീക്ഷിച്ചു.സംഗീത നമ്പ്യാര്ക്ക് എതിരെ പ്രഥമദൃഷ്ട്യാ തെളിവുകളൊന്നും ലഭ്യമല്ലെന്നും ജാമ്യം അനുവദിക്കുന്നുമെന്നുമാണ് കോടതി ഉത്തരവിലുള്ളത്.
ഡോ റാമും സംഗീത നമ്പ്യാരും കഴിഞ്ഞ പതിനഞ്ച് ദിവസമായി ഒളിവിലാണ് . ആത്മഹത്യാ പ്രേരണാ കുറ്റത്തിന് പുറമെ, പട്ടികജാതി-പട്ടികവര്ഗ അതിക്രമ നിരോധന നിയമപ്രകാരമുള്ള വകുപ്പുകളും പ്രതികള്ക്കെതിരെ ചുമത്തിയിരുന്നു. എന്നാല് വിധിയില് തൃപ്തരല്ലെന്നും മേല്ക്കോടതിയെ സമീപിക്കുമെന്നും നിതിന് രാജിന്റെ അച്ഛന് വൈ എല് രാജന് പറഞ്ഞു.
