കൊച്ചി: ഒകുലോപ്ലാസ്റ്റിക് അസോസിയേഷന്‍ ഓഫ് ഇന്ത്യയുടെ 36-ാം വാര്‍ഷിക സമ്മേളനം ആരംഭിച്ചു. ഹോട്ടല്‍ ഗോകുലം പാര്‍ക്കില്‍ നടക്കുന്ന മൂന്ന് ദിവസത്തെ സമ്മേളനം ഗിരിധര്‍ ഐ ഇന്‍സ്റ്റിറ്റ്യൂട്ടാണ് കേരള സൊസൈറ്റി ഓഫ് ഒഫ്താല്‍മിക് സര്‍ജന്‍സിന്റെ നേതൃത്വത്തില്‍ സംഘടിപ്പിക്കുന്നത്.
ഹൈക്കോടതി ജഡ്ജി ജസ്റ്റിസ് ബച്ചു കുര്യന്‍ തോമസ് ഉദ്ഘാടനം ചെയ്തു. ആധുനിക വൈദ്യശാസ്ത്രം ഇന്ന് മുന്നേറുന്നത് കൃത്യത, നേരത്തെയുള്ള ചികിത്സ, ഉയര്‍ന്ന ജീവിത നിലവാരം എന്നിവ മാനദണ്ഡമാക്കിയാണ്. രോഗ വിമുക്തിക്ക് പുറമെ അവയവങ്ങളുടെ പ്രവര്‍ത്തന ശേഷിയും രൂപവും സൗന്ദര്യവും പുനഃസ്ഥാപിക്കുന്നത് വരെ ഇന്ന് ചികിത്സയുടെയും വൈദ്യശാസ്ത്ര പുരോഗതിയുടെയും ഭാഗമായി കഴിഞ്ഞുവെന്ന് അദ്ദേഹം പറഞ്ഞു.
ഒപിഎഐ ദേശീയ പ്രസിഡന്റ് ഡോ. കസ്തൂരി ഭട്ടാചാര്‍ജി മുഖ്യപ്രഭാഷണം നടത്തി. കണ്‍പോളകള്‍, ഐ സോക്കറ്റ് (കണ്‍തടം അഥവാ കണ്‍കുഴി) തുടങ്ങിയ ഭാഗങ്ങളുമായി ബന്ധപ്പെട്ട വിവിധ രോഗങ്ങള്‍ക്ക് ചികിത്സയില്‍ വലിയ മുന്നേറ്റങ്ങളുണ്ടായതായി അവര്‍ പറഞ്ഞു. തൈറോയ്ഡ്, കണ്ണ് രോഗം, ട്യൂമര്‍, അപകട പരിക്കുകള്‍ തുടങ്ങിയവയില്‍ നേരത്തെ കണ്ടെത്തലും സംയുക്ത ചികിത്സയും നിര്‍ണായകമാണെന്ന് കസ്തൂരി ഭട്ടാചാര്‍ജി പറഞ്ഞു. ഡോ. എസ്.ജെ. സായികുമാര്‍, ഡോ. രമണ്‍ മിത്തല്‍, ഡോ. സന്തോഷ് ജി. ഹോണവര്‍, ഡോ. മരിയന്‍ പോളി, ഡോ. ഷെബിന്‍ സലീം, ഡോ. സാവരി ദേശായി, ഡോ. എ. ഗിരിധര്‍, ഡോ. രാജീവ് സുകുമാരന്‍ എന്നിവര്‍ സംസാരിച്ചു.
മൂന്ന് ദിവസങ്ങളിലായി കണ്ണിന് ചുറ്റുമുള്ള ഭാഗത്തെ ബാധിക്കുന്ന വിവിധ രോഗങ്ങളെക്കുറിച്ച് വിശദമായ ചര്‍ച്ചകള്‍ നടക്കുമെന്ന് ഓര്‍ഗനൈസിങ് ചെയര്‍മാന്‍ ഡോ. എസ്.ജെ. സായികുമാര്‍ പറഞ്ഞു. കൊതുക് വഴി പകരുന്ന പാരസിറ്റിക് രോഗമായ പെരിയോകുലര്‍ ഡിറോഫിലേറിയാസിസ് കേരളത്തിലെ ചില ഭാഗങ്ങളില്‍ വര്‍ദ്ധിക്കുന്നതായി അദ്ദേഹം ചൂണ്ടിക്കാട്ടി.
കണ്‍പോളയ്‌ക്ക് ചുറ്റും വീക്കം, ചെറിയ കട്ടകള്‍, ചുവപ്പ് എന്നിവ ലക്ഷണങ്ങളാകാം. ചിലപ്പോള്‍ ചെറിയ വേദനയോ എന്തോ ചലനമുണ്ടെന്ന തോന്നലോ ഉണ്ടാകാം. ഇത്തരം ലക്ഷണങ്ങള്‍ കണ്ടാല്‍ ഉടന്‍ പരിശോധന ആവശ്യമാണെന്നും അദ്ദേഹം പറഞ്ഞു. അപകടങ്ങള്‍ മൂലമുള്ള ഐ സോക്കറ്റ് പൊട്ടലുകളും ചര്‍ച്ചയായി. ഇത്തരം പരിക്കുകള്‍ കണ്ണിന്റെ ചലനം തടസപ്പെടുത്തുകയും ഇരട്ട കാഴ്ച ഉണ്ടാക്കുകയും ചെയ്യും. ശസ്ത്രക്രിയയിലൂടെ പൊട്ടിയ ഭാഗങ്ങള്‍ പുനര്‍നിര്‍മിക്കുന്ന രീതികള്‍ വിദഗ്ധര്‍ ചര്‍ച്ച ചെയ്തു. ഐ സോക്കറ്റ് പുനര്‍നി
ര്‍മാണം, കണ്ണിമ ശസ്ത്രക്രിയ, ട്യൂമര്‍ ചികിത്സ, അപകട പരിക്ക് പരിചരണം, കണ്ണുനീര്‍ ശസ്ത്രക്രിയ തുടങ്ങിയ വിഷയങ്ങളില്‍ സെഷനുകള്‍ നടക്കുന്നുണ്ട്.
