സിനിമ താരങ്ങളുടെ ആഡംബര ജീവിതം വാർത്തകളിൽ പതിവായി ഇടംപിടിക്കാറുണ്ടെങ്കിലും, ഇപ്പോൾ ശ്രദ്ധാകേന്ദ്രമായിരിക്കുന്നത് ഒരു താരമല്ല മറിച്ച് താരത്തിന്റെ മാനേജരാണ്. ഷാരൂഖ് ഖാന്റെ മാനേജർ പൂജ ദദ്ലാനി ദശകോടികൾ വിലയുള്ള അപ്പാർട്ട്മെന്റ് വാങ്ങിയ വാർത്തയാണ് ഇപ്പോൾ ചർച്ചാവിഷയം.റിയൽ എസ്റ്റേറ്റ് ഡാറ്റാ അനലിറ്റിക്സ് സ്ഥാപനമായ സിആർഇ മാട്രിക്സ് പുറത്തുവിട്ട രേഖകൾ പ്രകാരം, മുംബൈയിലെ ബാന്ദ്ര പ്രദേശത്തെ കാർട്ടർ റോഡിൽ സ്ഥിതി ചെയ്യുന്ന ‘വരുൺ’ എന്ന കെട്ടിടത്തിലാണ് പൂജയും കുടുംബവും മൂന്ന് ആഡംബര അപ്പാർട്ട്മെന്റുകൾ സ്വന്തമാക്കിയിരിക്കുന്നത്.
ഓരോ അപ്പാർട്മെന്റിനും ഏകദേശം 38 കോടി രൂപ വീതമാണ് ചെലവഴിച്ചത്.നിലവിൽ പുനർനിർമ്മാണത്തിലിരിക്കുന്ന കെട്ടിടത്തിന്റെ ഉയർന്ന നിലകളിലാണ് ഈ അപ്പാർട്ട്മെന്റുകൾ. ഓരോ യൂണിറ്റും 1,511.15 ചതുരശ്ര അടി കാർപെറ്റ് ഏരിയയും 81.16 ചതുരശ്ര അടി ബാൽക്കണിയും ഉൾക്കൊള്ളുന്നു. മൂന്ന് ഫ്ലാറ്റുകളും ചേർന്ന് 4,776 ചതുരശ്ര അടി വിസ്തീർണ്ണമുണ്ട്. കൂടാതെ ആറ് കാർ പാർക്കിംഗ് സൗകര്യങ്ങളും ലഭിക്കും. 2028 ഡിസംബറോടെ നിർമ്മാണം പൂർത്തിയാക്കി കൈമാറുമെന്നാണ് കരാറിൽ വ്യക്തമാക്കിയിരിക്കുന്നത്.
പൂജ ദദ്ലാനി, ഭർത്താവ് ഹിതേഷ് പ്രകാശ് ഗുർനാനി, പിതാവ് മോഹൻ സിയോറാം ദദ്ലാനി എന്നിവരുടെ പേരുകളിലാണ് ഫ്ലാറ്റുകൾ രജിസ്റ്റർ ചെയ്തിരിക്കുന്നത്. 2026 ഏപ്രിൽ 21-നാണ് ഈ വമ്പൻ ഇടപാട് നടന്നത്. സ്റ്റാമ്പ് ഡ്യൂട്ടിയായി ഏകദേശം 2.16 കോടി രൂപയും രജിസ്ട്രേഷൻ ഫീസായി 90,000 രൂപയും അടച്ചിട്ടുണ്ട്.
2012 മുതൽ ഷാരൂഖ് ഖാന്റെ പ്രൊഫഷണൽ കാര്യങ്ങൾ കൈകാര്യം ചെയ്യുന്നത് പൂജ ദദ്ലാനിയാണ്. മുൻപ് ദീപിക പദുകോണിന്റെ മാനേജരായും പ്രവർത്തിച്ചിട്ടുള്ള ഇവർ ഇന്ത്യയിലെ ഏറ്റവും കൂടുതൽ പ്രതിഫലം കൈപ്പറ്റുന്ന സെലിബ്രിറ്റി മാനേജർമാരിൽ ഒരാളാണ്. സിനിമാ പ്രോജക്റ്റുകൾ മുതൽ പരസ്യങ്ങളും ബിസിനസ് സംരംഭങ്ങളും വരെ നിർണായക പങ്കുവഹിക്കുന്ന പൂജ ദദ്ലാനിയുടെ പ്രതിവർഷ വരുമാനം 7 മുതൽ 9 കോടി രൂപ വരെയാണെന്ന് റിപ്പോർട്ടുകൾ സൂചിപ്പിക്കുന്നു.
