ആലപ്പുഴ: നിയമസഭാ തെരഞ്ഞെടുപ്പില്‍ വിജയം പ്രതീക്ഷിച്ച് മുഖ്യമന്ത്രി സ്ഥാനത്തേക്ക് മത്സരരംഗത്തുള്ള കോണ്‍ഗ്രസ് നേതാക്കള്‍ പുസ്തക രചനയിലും മത്സരിക്കുന്നു. കോണ്‍ഗ്രസിലെ തങ്ങളുടെ അനുയായികളെ നിയോഗിച്ച് വാഴ്‌ത്തിപ്പാടലുകള്‍ നടത്തുന്നതിന് പുറമെയാണ് സാഹിത്യരംഗത്തും അവര്‍ മത്സരിക്കുന്നതെന്നതാണ് സവിശേഷത. മുതിര്‍ന്ന നേതാവ് രമേശ് ചെന്നിത്തല ആഴ്ചകള്‍ മുന്‍പാണ് നോവല്‍ പ്രസിദ്ധീകരിച്ചത്.
‘നിയോഗം’ എന്ന നോവല്‍ കഥാകൃത്ത് ടി. പത്മനാഭനാണ് പ്രകാശനം ചെയ്തത്. അഞ്ച് പതിറ്റാണ്ടിലെ പൊതുജീവിതത്തില്‍ കണ്ടുമുട്ടിയ വ്യക്തികളുടെ സംഘര്‍ഷങ്ങളും വേദനകളും അനുഭവങ്ങളും എഴുത്തിനെ സ്വാധീനിച്ചു എന്നാണ് ചെന്നിത്തല പറഞ്ഞത്. അച്ഛന്റെ വേരുകള്‍ തേടി അമേരിക്കയിലെ ചിക്കാഗോയില്‍ നിന്ന് ഒറ്റപ്പാലത്ത് എത്തുന്ന എയ്ഞ്ചല്‍ എന്ന പെണ്‍കുട്ടിയിലൂടെ രണ്ട് സംസ്‌കാരങ്ങളുടെ കഥയാണ് നിയോഗം എന്ന നോവല്‍ പറയുന്നത്.
തൊട്ടുപിന്നാലെ ലോക പുസ്തകദിനത്തില്‍ വായനക്കാര്‍ക്കായി പുതിയ ഗ്രന്ഥം സമര്‍പ്പിച്ച് എഐസിസി ജനറല്‍ സെക്രട്ടറി കെ.സി. വേണുഗോപാല്‍ എംപിയും രംഗത്തെത്തി. ‘നേരിനൊപ്പം: പോരാട്ടങ്ങള്‍, നിലപാടുകള്‍’ എന്ന് പേരിട്ടിരിക്കുന്ന ഈ പുസ്തകം അദ്ദേഹത്തിന്റെ പാര്‍ലമെന്ററി ജീവിതത്തിലെ പ്രസംഗങ്ങളുടെ സമാഹാരമാണ്.
പ്രതിപക്ഷ നേതാവ് വി.ഡി. സതീശനാകട്ടെ തനൊരു വലിയ പുസ്തക പ്രേമിയാണെന്ന് മുന്‍പ് പലവട്ടം സമൂഹമാദ്ധ്യമങ്ങളിലുടെയും അല്ലാതെയും പൊതുജനത്തെ അറിയിച്ചിട്ടുണ്ട്. കഴിഞ്ഞ വര്‍ഷം ഏറെ തിരക്കിനിടയിലും 20 ഇംഗ്ലീഷ് പുസ്തകങ്ങളടക്കം 60 പുസ്തകങ്ങള്‍ താന്‍ വായിച്ചതായി അദ്ദേഹം വെളിപ്പെടുത്തിയിരുന്നു. നേരത്തെ സതീശന്റെ പ്രഭാഷണങ്ങള്‍ ഉള്‍പ്പെടുത്തി പുസ്തകം പ്രസിദ്ധീകരിച്ചിട്ടുണ്ട്.
തെരഞ്ഞെടുപ്പ് ഫലം വരുന്നതിന് മുന്‍പ് തന്നെ കോണ്‍ഗ്രസില്‍ മുഖ്യമന്ത്രി സ്ഥാനത്തിന്റെ പേരില്‍ അടി രൂക്ഷമാണ്. വി.ഡി. സതീശനും, രമേശ് ചെന്നിത്തലയുമാണ് ആദ്യം മുഖ്യമന്ത്രി സ്ഥാനത്തേക്ക് മത്സരരംഗത്തുണ്ടായിരുന്നതെങ്കില്‍ കെ.സി. വേണുഗോപാലിന്റെ രംഗപ്രവേശത്തോടെ കളി മാറി. ഹൈക്കമാന്‍ഡിന്റെ ഭാഗമായ വേണുഗോപാലിനെയാണ് ഭൂരിപക്ഷം നേതാക്കളും, നിയമസഭാ തെരഞ്ഞെടുപ്പില്‍ മത്സരരംഗത്തുണ്ടായിരുന്ന കോണ്‍ഗ്രസ് സ്ഥാനാര്‍ത്ഥികളും പിന്തുണക്കുന്നത്. രചനാ രംഗത്തും വായനയിലും കൂടി ഇവര്‍ മാറ്റുരയ്‌ക്കുന്നത് കൗതുകത്തോടെയാണ് അണികള്‍ വീക്ഷിക്കുന്നത്. നേതാക്കളുടെ ഡോക്യുമെന്ററി കൂടി മാത്രമെ ഇനി വരാനുള്ളു എന്ന് അവര്‍ പറയുന്നു.
