ആലപ്പുഴ: ‘വാഴ 2’ എന്ന സിനിമയില് വൈദ്യനിര്ദേശമില്ലാതെ അമിതമായി അരിഷ്ടം ഉപയോഗിക്കുന്നതിലൂടെയുണ്ടാകുന്ന അപകടങ്ങള് ചിത്രീകരിച്ചിരിക്കുന്നത് സ്വയംചികിത്സയുടെ ഭവിഷ്യത്തുകളെക്കുറിച്ചുള്ള കൃത്യമായ മുന്നറിയിപ്പാണ്. സിനിമ നല്കുന്ന ഈ പോസിറ്റീവ് സന്ദേശത്തെ ആയുര്വേദ മെഡിക്കല് അസോസിയേഷന് ഓഫ് ഇന്ത്യ (എഎംഎഐ) സ്വാഗതം ചെയ്യുന്നതായി ഭാരവാഹികള് അറിയിച്ചു. ഏത് ചികിത്സാ രീതിയിലായാലും ഡോക്ടറുടെ മേല്നോട്ടമില്ലാതെ മരുന്നുകള് ഉപയോഗിക്കുന്നത് ഗുരുതരമായ ആരോഗ്യപ്രശ്നങ്ങള്ക്ക് കാരണമാകുമെന്ന യാഥാര്ത്ഥ്യമാണ് സിനിമ അടിവരയിടുന്നത്.
എന്നാല്, സിനിമയിലെ ഈ സന്ദര്ഭത്തെ മുന്നിര്ത്തി ആയുര്വേദത്തേയും ആയുര്വേദ മരുന്നുകളേയും മൊത്തത്തില് അപകീര്ത്തിപ്പെടുത്താന് ചില തത്പരകക്ഷികള് ബോധപൂര്വം ശ്രമിക്കുന്നത് പ്രതിഷേധാര്ഹമാണ്. വന്കിട കോര്പറേറ്റ് താത്പര്യങ്ങള്ക്ക് വേണ്ടി വിടുപണി ചെയ്യുന്ന ഇത്തരം കേന്ദ്രങ്ങള്, ആയുര്വേദത്തിന്റെ വിശ്വാസ്യത തകര്ത്ത് രോഗികളെ മറ്റ് വാണിജ്യ ചികിത്സാ കേന്ദ്രങ്ങളിലേക്ക് വഴിതിരിച്ചുവിടാനുള്ള ആസൂത്രിത നീക്കമാണ് നടത്തുന്നത്. ചെറിയ വിഷയങ്ങളെപ്പോലും പര്വതീകരിച്ച് ആയുര്വേദ വിരുദ്ധ പ്രചാരണമാക്കി മാറ്റുന്ന ഇത്തരം പ്രവണതകളെ പൊതുജനങ്ങള് തിരിച്ചറിയണമെന്നും അതീവ ജാഗ്രത പാലിക്കണമെന്നും അസോസിയേഷന് അഭ്യര്ത്ഥിച്ചു.
ആയുര്വേദ മെഡിക്കല് അസോസിയേഷന് ഈ സിനിമക്കെതിരെ കേസ് നല്കുന്നുവെന്ന തരത്തില് പ്രചരിക്കുന്ന വാര്ത്തകള് തീര്ത്തും വ്യാജമാണ്. അസോസിയേഷന് പറയാത്ത കാര്യങ്ങള് സംഘടനയുടെ പേരില് പ്രചരിപ്പിക്കുന്നത് കുടിലമായ ലക്ഷ്യങ്ങളോടെയാണ്. ഇത്തരം തെറ്റായ വാര്ത്തകളെ അസോസിയേഷന് ശക്തമായി നിഷേധിക്കുന്നു. ശാസ്ത്രീയ പഠനങ്ങളിലൂടെയും നൂറ്റാണ്ടുകളായുള്ള പ്രയോഗത്തിലൂടെയും സുരക്ഷിതമെന്ന് തെളിയിക്കപ്പെട്ടവയാണ് ആസവ- അരിഷ്ടങ്ങള്. ആയുര്വേദ ഫാര്മക്കോപ്പിയ നിശ്ചയിച്ചിട്ടുള്ള ഗുണനിലവാര മാനദണ്ഡങ്ങളും സുരക്ഷിത ആല്ക്കഹോള് പരിധിയും പാലിച്ചാണ് ഇവ നിര്മിക്കപ്പെടുന്നത്. കൃത്യമായ നിര്മാണ രീതിയിലൂടെ ഔഷധങ്ങളുടെ ദഹനക്ഷമത വര്ദ്ധിപ്പിക്കാനും പാര്ശ്വഫലങ്ങള് ഇല്ലാതാക്കാനും കഴിയുമെന്ന് വിവിധ പഠനങ്ങള് സാക്ഷ്യപ്പെടുത്തുന്നു. ഒരു ഡോക്ടറുടെ നിര്ദേശപ്രകാരം കൃത്യമായ അളവില് ഉപയോഗിക്കുമ്പോള് ഇവ ലിവറിനേയോ മറ്റ് ആന്തരികാവയവങ്ങളെയോ ദോഷകരമായി ബാധിക്കുന്നില്ല. ആയുര്വേദത്തിനെതിരെ നടക്കുന്ന സംഘടിത ക്യാമ്പയിനുകളില് പൊതുജനങ്ങള് വഞ്ചിതരാകരുതെന്നും അസോസിയേഷന് പ്രസിഡന്റ് ഡോ. കെ. എസ്. വിഷ്ണു നമ്പൂതിരി, ജനറല് സെക്രട്ടറി ഡോ. പി. കെ. ഹരിദാസ് എന്നിവര് അറിയിച്ചു.
