കോലഞ്ചേരി: പഴങ്ങനാട് ജംഗിള് പാര്ക്കിലുണ്ടായ അപകടത്തില് മരിച്ച മുഹമ്മദ് ആദമി (5)ന്റെ സംസ്കാരം ഇന്ന് രാവിലെ കോട്ടയം ചെങ്ങളം ജുമാ മസ്ജിദില് നടക്കും. വിദേശത്തുള്ള അച്ഛന് നസീര് എത്തിയ ശേഷമായിരിക്കും അന്ത്യകര്മങ്ങള് നടക്കുക. കുട്ടി മരിക്കാനിടയായ സംഭവത്തില് പഴങ്ങനാട് ജംഗിള് പാര്ക്കിനെതിരെ നടപടി കടുപ്പിച്ച് കിഴക്കമ്പലം പഞ്ചായത്ത്.
അനുമതിയില്ലാതെ നിര്മാണ പ്രവര്ത്തനങ്ങള് നടത്തിയെന്ന് കണ്ടെത്തിയതിനെത്തുടര്ന്ന് സെക്രട്ടറി പാര്ക്കിന് സ്റ്റോപ്പ് മെമ്മോ നല്കി. പാര്ക്കിന്റെ ആരംഭഘട്ടത്തില് ലൈസന്സിനായി അപേക്ഷ നല്കിയിരുന്നെങ്കിലും യന്ത്രസഹായത്തോടെയുള്ള വിനോദോപാധികള് പ്രവര്ത്തിപ്പിക്കുന്നില്ലെന്ന കാരണത്താല് പഞ്ചായത്ത് അനുമതി നിഷേധിച്ചിരുന്നു. ഇതിന് ശേഷവും പാര്ക്കില് വിവിധ നിര്മാണങ്ങള് നടന്നു. ലൈസന്സ് നല്കാതിരുന്നതിന് ശേഷം പാര്ക്കിനുള്ളില് പുതിയ നിര്മാണങ്ങള് നടന്ന കാര്യം ശ്രദ്ധയില്പ്പെട്ടിരുന്നില്ലെന്നാണ് പഞ്ചായത്ത് അധികൃതര് നല്കുന്ന വിശദീകരണം.
സ്റ്റേപ്പ് മെമ്മോ നിലവില് വന്നതോടെ പാര്ക്കിന്റെ പ്രവര്ത്തനങ്ങള് പൂര്ണമായും നിര്ത്തി. അതേസമയം സംഭവത്തില് തടിയിട്ടപറമ്പ് പോലീസ് കേസെടുത്തു. പാര്ക്ക് ഉടമകള്ക്കെതിരെയും പാലാരിവട്ടം ബിയോണ്ട് ബോണ് പ്രീ സ്കൂള് അധികൃതര്ക്കെതിരെയും അന്വേഷണം തുടങ്ങി. അപകടകരമായ ചതുപ്പ് പ്രദേശത്തിന് ചുറ്റും വേലികളോ സിസിടിവി പോലുള്ള മറ്റ് സുരക്ഷാ സംവിധാനങ്ങളോ ഒരുക്കാത്തതിനാണ് പാര്ക്ക് ഉടമസ്ഥര്ക്കെതിരെ നടപടി. കുട്ടികളെ നിരീക്ഷിക്കുന്നതില് വീഴ്ച വരുത്തിയതിനും സുരക്ഷാ മുന്കരുതലുകള് പാലിക്കാത്തതിനും സ്കൂള് അധികൃതരും മറുപടി പറയേണ്ടി വരും.
ഇന്നലെ പോസ്റ്റ്മോര്ട്ടം നടപടികള് പൂര്ത്തിയാക്കിയ ശേഷം മൃതദേഹം ആദം താമസിച്ചിരുന്ന തമ്മനത്തെ വസതിയില് പൊതുദര്ശനത്തിന് എത്തിച്ചിരുന്നു. തുടര്ന്ന് മൃതദേഹം കോട്ടയത്തെ സ്വകാര്യ ആശുപത്രി മോര്ച്ചറിയിലേക്ക് മാറ്റി. ചൊവ്വാഴ്ച ഉച്ചയ്ക്ക് രണ്ടിനുണ്ടായ അപകടത്തില് സ്കൂള് അധികൃതരുടെ ഭാഗത്ത് നിന്നുണ്ടായ ഗുരുതരമായ അനാസ്ഥയാണ് ഇപ്പോള് ചര്ച്ചയാകുന്നത്. 25 കുട്ടികളും 9 അദ്ധ്യാപകരുമടങ്ങുന്ന വലിയ സംഘം കൂടെയുണ്ടായിട്ടും കുട്ടി കൂട്ടംതെറ്റിയത് അദ്ധ്യാപകര് അറിഞ്ഞത് ഏറെ വൈകിയാണ്. കുട്ടി അപ്രത്യക്ഷനായ ഉടനെ പാര്ക്ക് അധികൃതരെ വിവരം അറിയിക്കുന്നതിന് പകരം അദ്ധ്യാപകര് സ്വന്തം നിലയില് തിരച്ചില് നടത്തുകയായിരുന്നു. ഈ സമയം നഷ്ടപ്പെട്ടത് കുട്ടിയുടെ ജീവന് രക്ഷിക്കാനുള്ള സാധ്യതകളെ ഇല്ലാതാക്കിയോ എന്നും പോലീസ് പരിശോധിക്കുന്നുണ്ട്.
