തിരുവനന്തപുരം: നെട്ടയം സംഘര്ഷത്തില് വട്ടിയൂര്ക്കാവ് എസ്എച്ച്ഒ വിപിന്റെയും എസ്ഐ ദീപുവിന്റെയും നേതൃത്വത്തില് പോലീസ് നടത്തിയത് അടിയന്തിരാവസ്ഥ കാലഘട്ടത്തെ ഓര്മിപ്പിക്കുന്ന ക്രൂരതയാണന്നും ഈ ഉദ്യോഗസ്ഥര്ക്ക് എതിരെ നടപടി വേണമെന്നും ബിജെപി ആവശ്യപ്പെട്ടു. തെരഞ്ഞെടുപ്പിന്റെ തുടക്കം മുതല് തന്നെ വട്ടിയൂര്ക്കാവ് പോലീസിന്റെ ഭാഗത്ത് നിന്ന് മോശം സമീപനം ഉണ്ടായി. ഇത് സംബന്ധിച്ച് മുതിര്ന്ന ഉദ്യോഗസ്ഥരോട് പരാതി പറഞ്ഞിരുന്നെന്നും ബിജെപി സംസ്ഥാന വൈസ് പ്രസിഡന്റ് ആര്. ശ്രീലേഖ പറഞ്ഞു.
കുമാരാരാമം ക്ഷേത്ര മതപാഠശാല പോലീസ് തല്ലിത്തകര്ത്ത സംഭവം വളരെ ദാരുണമാണ്. അടിയന്തരാവസ്ഥയെ സൂചിപ്പിക്കുന്ന തരത്തിലുള്ള സമീപനമാണ് പോലീസിന്റെ ഭാഗത്തുനിന്ന് കഴിഞ്ഞ ദിവസങ്ങളിലുണ്ടായത്. വട്ടിയൂര്ക്കാവ് പോലീസ് ഭീകരാന്തരീക്ഷം സൃഷ്ടിച്ചു. പക്ഷപാതപരമായിട്ടാണ് പോലീസ് പെരുമാറിയത്. മുന് പോലീസ് ഉദ്യോഗസ്ഥ എന്ന നിലയില് കൃത്യമായി അത് തനിക്ക് അറിയാം. പോലീസ് അസോസിയേഷന് ഭരിക്കുന്നത് തന്നെ സിപിഎമ്മുകരാണ്. മലമുകള് പ്രദേശത്ത് ബിജെപിക്ക് സ്വാധീനം ലഭിച്ചു. ഇതിന്റെ പ്രകോപനമാണ് ബിജെപി പ്രവര്ത്തകനെ മര്ദ്ദിക്കുന്നതിലെത്തിയത്. ബിജെപി പ്രവര്ത്തകരെ തിരഞ്ഞുപിടിച്ച് അറസ്റ്റ് ചെയ്യുന്നു. ഇതുപോലെ ഒരു ഭീകരത പോലീസ് മുന്പ് കാണിച്ചിട്ടില്ല. മലമുകള് പള്ളിയില് കയറി നിന്ന് ഡിവൈഎഫ്ഐ പ്രവര്ത്തകര് എറിഞ്ഞ കല്ല് കൊണ്ടാണ് പോലീസ് ഉദ്യോഗസ്ഥന് പരിക്കേറ്റത്. പരിക്കേറ്റ ഉദ്യോഗസ്ഥര്ക്കായി രക്ഷാപ്രവര്ത്തനം നടത്തിയത് ബിജെപി പ്രവര്ത്തകരാണ്.
ഇതിന്റെ ഡിജിറ്റല് തെളിവുകള് സിറ്റി പോലീസ് കമ്മിഷണര്ക്ക് തിങ്കളാഴ്ച തന്നെ കൈമാറി. എന്നാല് ഇതൊന്നും വകവെക്കാതെയാണ് എസ്എച്ച്ഒ വിപിന്റെ നേതൃത്വത്തില് പോലീസ് ബിജെപി പ്രവര്ത്തര്ക്ക് എതിരെ അഴിഞ്ഞാടിയത്. ഇടപ്പഴഞ്ഞി ക്ഷേത്രത്തിനുള്ളിലെ മത പഠനശാല ആക്രമിച്ച് നശിപ്പിച്ച് പോലീസ് ഒരു കേസിലും പ്രതിയല്ലാത്ത പരാതിക്കാരന് കൂടിയായ ബിനു ഉള്പ്പടെയുള്ള പ്രവര്ത്തകരെ അറസ്റ്റ് ചെയ്തതും ക്രൂരമായി ഇടിവണ്ടിയില് ഇട്ട് മര്ദിച്ചതും, അനുമതി ഇല്ലാതെ ആരാധനാലയങ്ങളില് പ്രവേശിക്കരുതെന്ന സുപ്രീകോടതി വിധി പോലും കാറ്റില് പറത്തിയാണ് പോലീസ് ഇടപ്പഴിഞ്ഞി ക്ഷേത്രം അക്രമിച്ചതെന്നും ബിജെപി നേതാക്കള് ആരോപിച്ചു.
കുറ്റക്കാരായ ഉദ്യോസ്ഥര്ക്കെതിരെ നടപടി എടുത്തില്ലങ്കില് സമരം ശക്തമാക്കുമെന്നും ശ്രീലേഖ പറഞ്ഞു. സിറ്റി ജില്ലാ അധ്യക്ഷന് കരമന ജയന്, ജില്ലാ ജനറല് സെക്രട്ടറി പാപ്പനംകോട് സജി, വട്ടിയൂര്ക്കാവ് മണ്ഡലം പ്രസിഡന്റ് മണികണ്ഠന് എന്നിവര് അറിയിച്ചു.
