തിരുവനന്തപുരം: കുമാരാരാമം ഇടപ്പഴഞ്ഞി ബാലസുബ്രഹ്മണ്യസ്വാമി ക്ഷേത്ര മതപാഠശാലയില് കയറി പോലീസ് നടത്തിയ അതിക്രമത്തില് പ്രതിഷേധിച്ച് ഹൈന്ദവ സംഘടനകളുടെ നേതൃത്വത്തില് നടത്തിയ മാര്ച്ചില് പ്രതിഷേധമിരമ്പി. കടുത്ത വെയിലിനെയും ചൂടിനെയും അവഗണിച്ച് സ്ത്രീകളും വയോധികരുമടക്കം നിരവധി പ്രവര്ത്തകരാണ് മാര്ച്ചില് പങ്കെടുത്തത്.
പ്രവര്ത്തകര്കരെ പ്രകോപിപ്പിക്കാന് പോലീസ് പലതവണ ശ്രമം നടത്തിയെങ്കിലും സമാധാനപരമായാണ് പ്രവര്ത്തകര് മാര്ച്ചില് പങ്കെടുത്തത്. വെള്ളയമ്പലം യക്ഷിയമ്മന് ആല്ത്തറ ക്ഷേത്രത്തിന് മുന്നില് നിന്നാരംഭിച്ച മാര്ച്ചിനെ തടയാന് നിരവധി ബാരിക്കേഡുകളാണ് റോഡിന് കുറുകെയും ഇരുവശങ്ങളിലുമായി പോലീസ് സ്ഥാപിച്ചിരുന്നത്. പലയിടങ്ങളിലും പോലീസിന്റെ വലിയ സന്നാഹങ്ങളും ഉണ്ടായിരുന്നു. നാമജപങ്ങളും പിണറായി സര്ക്കാരിന്റെ പോലീസിനെതിരെയുള്ള മുദ്രവാക്യങ്ങളും മുഴക്കി പ്രവര്ത്തകര് പ്രതിഷേധം രേഖപ്പെടുത്തി. കടുത്ത വെയിലിലും പ്രവര്ത്തകരുടെ ആവേശം പോലിസിനുള്ള താക്കീതായി മാറി. മ്യൂസിയം പോലീസ് സ്റ്റേഷന് അര കിലോമീറ്റര് ദൂരത്തില് പോലീസ് മാര്ച്ച് തടഞ്ഞു. തുടര്ന്ന് മുന് ഡിജിപി ടി.പി. സെന്കുമാര് മാര്ച്ച് ഉദ്ഘാടനം ചെയ്തു. നീതിക്ക് വേണ്ടി നിലകൊള്ളേണ്ട പോലീസ് മാര്ക്സിസ്റ്റുകാരുടെ ഏജന്റായി പ്രവര്ത്തിക്കുന്നതായി ഉദ്ഘാടന പ്രസംഗത്തില് ടി. പി. സെന്കുമാര് പറഞ്ഞു.
മറ്റേതെങ്കിലും മതത്തിന്റെ മത പാഠശാലയിലോ അതുപോലുള്ള യോഗങ്ങളിലോ ഈ രീതിയില് പോകാനും ഇത്തരം അക്രമ പ്രവര്ത്തനങ്ങള് നടത്താനും പോലീസ് തയാറാകുമോ എന്നുകൂടി നാം ആലോചിക്കണം. ഹൈന്ദവരെ നിരന്തരം വേട്ടയാടുകയാണ് പിണറായി സര്ക്കാര്. ഇതിന് ഒത്താശ ചെയ്യുന്നത് പോലീസ് ഉദ്യോഗസ്ഥരാണ്. പോലീസ് നീതിപൂര്വം പ്രവര്ത്തിക്കാന് തയാറാകണമെന്നും സെന്കുമാര് പറഞ്ഞു. ക്ഷേത്രത്തില് കടന്നു കയറി അതിക്രമം നടത്തിയ പോലീസ് ഉദ്യോഗസ്ഥര്ക്കെകതിരെ മാതൃകാപരമായ അടിയന്തിര ശിക്ഷാ നടപടികള് സ്വീകരിക്കണം. ഈ കാര്യത്തില് കര്ശന നടപടി സ്വീകരിക്കണമെന്ന് സംസ്ഥാന പോലീസ് മേധാവിയോടും സംസ്ഥാന സര്ക്കാരിനോടും ആവശ്യപ്പെടുകയാണെന്ന് സെന്കുമാര് കൂട്ടിച്ചേര്ത്തു.
ഭീകരവാദികള്ക്കും തീവ്രവാദികള്ക്കും മാത്രം ജീവിക്കാന് പറ്റുന്ന നാടായി കേരളം മാറിയെന്ന് കേരള ക്ഷേത്ര സംരക്ഷണ സമിതി ഉപാധ്യക്ഷന് ജി.കെ. സുരേഷ് ബാബു മുഖ്യപ്രഭാഷണത്തില് പറഞ്ഞു. അടിയന്തരാവസ്ഥ കാലത്തെ ഓര്മിപ്പിക്കുന്ന തരത്തിലുള്ള നടപടികളാണ് പോലീസിന്റെ ഭാഗത്ത് നിന്നുമുണ്ടാകുന്നത്. പരിവാര് സംഘടനകളുടെയും ബിജെപിക്കാരെയും തെരഞ്ഞുപിടിച്ച് പോലീസ് ആക്രമിക്കുന്നത് പതിവാണ്. പോലീസ് നിഷ്പക്ഷമായി പെരുമാറണമെന്നും അദ്ദേഹം ആവശ്യപ്പെട്ടു. ഹിന്ദു ഐക്യവേദി സംസ്ഥാന സെക്രട്ടറി സന്ദീപ് നമ്പാനൂര്, ഹിന്ദു ഐക്യവേദി തിരുവനന്തപുരം ജില്ലാ ജനറല് സെക്രട്ടറി വഴയില ഉണ്ണി, മാതൃസമിതി സംസ്ഥാന വൈസ് പ്രസിഡന്റ് പത്മാവതി, ജഗതി വാര്ഡ് കൗണ്സിലര് മധു, ക്ഷേത്ര സംരക്ഷണ സമിതി ജില്ലാ സെക്രട്ടറി പാപ്പനംകോട് അനില്, ഹിന്ദു ഐക്യവേദി ജില്ലാ വര്ക്കിങ് പ്രസിഡന്റ് കല്ലിയൂര് കൃഷ്ണകുമാര്, ക്ഷേത്രസംരക്ഷണ സമിതി ജില്ലാ പ്രസിഡന്റ് സുനില് കൈമനം തുടങ്ങിയവര് പങ്കെടുത്തു.
