കൊല്ലം: ഇനി ഭാവിയില്ല എന്ന കോണ്ഗ്രസിന്റെ തിരിച്ചറിവാണ് വനിതാ സംവരണ ബില്ലിനെ അവര് എതിര്ക്കാന് കാരണമെന്ന് ബിജെപി സംസ്ഥാന ഉപാധ്യക്ഷന് ഷോണ് ജോര്ജ്. കൊല്ലം പ്രസ്ക്ലബ്ബില് നടന്ന വാര്ത്താസമ്മേളനത്തില് സംസാരിക്കുകയായിരുന്നു അദ്ദേഹം.
തെരഞ്ഞെടുപ്പ് കാലഘട്ടമായതുകൊണ്ട് തന്നെ ബില്ലിനെ എതിര്ക്കുന്ന സമീപനം തികച്ചും സ്ത്രീവിരുദ്ധമാണ്. തിരിച്ച് ഭരണത്തിലേക്ക് വരാനാകില്ലെന്ന കോണ്ഗ്രസിന്റെ ആകുലതയാണ് കുറച്ച് ദിവസങ്ങളായി കാണാന് സാധിക്കുന്നത്. ജനകീയ പിന്തുണ ഉണ്ടെങ്കില് ഏത് നിയമത്തെയും തരണം ചെയ്യാന് കഴിയും. രാജ്യത്തിന്റെ പുരോഗതിക്കൊപ്പം കോണ്ഗ്രസിന് നില്ക്കാനായില്ല എന്നുള്ളതാണ് വസ്തുത.
ജനസംഖ്യ ആനുപാതികമായ ഡീലിമിറ്റേഷന് കാലാകാലങ്ങളായി താമസിപ്പിച്ചു. 54 കോടി ജനസംഖ്യയുള്ള കാലത്ത് തീരുമാനിക്കപ്പെട്ട ജനപ്രതിനിധികളുടെ എണ്ണം 140 കോടി ആകുമ്പോള് തിരുത്താന് കഴിയാത്ത സാഹചര്യമെന്ന് പറയുന്നത് ഭരണഘടന പറയുന്ന നിയമത്തിന് നേരെയുള്ള വെല്ലുവിളിയാണ്. ജനപ്രതിനിധികളുടെ എണ്ണം കൂടുന്നുവെന്ന് പറയുമ്പോഴുള്ള കോണ്ഗ്രസിന്റെ ആകുലത ഇനി ഭരണം കിട്ടില്ലെന്ന് തിരിച്ചറിഞ്ഞുകൊണ്ടാണ്.
കോണ്ഗ്രസിന്റെ സ്ത്രീവിരുദ്ധ സമീപനം സാധാരണക്കാരിലേക്ക് ഉള്പ്പടെ എത്തിക്കാന് വലിയ സമരപരിപാടികള് ബിജെപിയുടെ നേതൃത്വത്തില് ഉണ്ടാകും. 25 മുതല് മണ്ഡലതലങ്ങളില് നിന്ന് ബോധവത്കരണ പരിപാടികളും പ്രക്ഷോഭങ്ങളും സംഘടിപ്പിക്കും. കോണ്ഗ്രസ് കേരളത്തില് അധികാരത്തില് വരുമെന്ന് വിശ്വസിക്കുന്നില്ല. കോണ്ഗ്രസില് നടക്കുന്ന ചര്ച്ച ബില്ലിനെ കുറിച്ചല്ല, മറിച്ച് കേരളത്തില് ആര് മുഖ്യമന്ത്രി ആകുമെന്നതാണ്. ബില്ലിനെതിരെ കോണ്ഗ്രസ് കാണിച്ചത് വലിയ മണ്ടത്തരമാണ്.
ബിജെപിയുടെ ഒരു ഔട്ട്റീച്ച് പരിപാടിയും പാളിയിട്ടില്ലെന്നത് വ്യക്തമാണെന്ന് ഷോണ് പറഞ്ഞു. അതിനുശേഷം ഒരുപാട് ക്രൈസ്തവ വിശ്വാസികള് ബിജെപിക്കൊപ്പം വന്നു. ക്രിസ്ത്യന് ഔട്ട്റീച്ച് 100 ശതമാനം വിജയമുണ്ടാകും. എന്റെ പരാമര്ശം സഭയ്ക്കെതിരെ അല്ല, ദീപിക എന്ന പത്രത്തോടാണ്. ഒരു സഭയും രാഷ്ട്രീയ നിലപാട് പറഞ്ഞിട്ടില്ല. സഭയുടെ മുഖപത്രം സഭ പറയുന്ന കാര്യങ്ങള് വേണം പറയാന്. കെ.സി. വേണുഗോപാല് എഴുതി കൊടുക്കുന്ന ലേഖനങ്ങള് സഭയുടെ നിലപാടല്ല. ഞാന് രാജ്യവിരുദ്ധ ശക്തികളെയാണ് എതിര്ക്കുന്നത്. അതിനെ മതപരമായി മാറ്റുന്നത് രാഷ്ട്രീയ വൈരാഗ്യമാണ്. എസ്ഡിപിയെ പറയുമ്പോള് ആര്ക്കാണ് വേദനയെന്നും അദ്ദേഹം ചോദിച്ചു.
ബിജെപി സംസ്ഥാന സെക്രട്ടറി എം.വി. ഗോപകുമാര്, ബിജെപി വെസ്റ്റ് ജില്ലാ പ്രസിഡന്റ് എസ്. പ്രശാന്ത്, ജില്ലാ വൈസ് പ്രസിഡന്റ് ശശികലാറാവു, മഹിളാമോര്ച്ച ജില്ലാ പ്രസിഡന്റ് ഐശ്വര്യ, ബിജെപി ഇരവിപുരം മണ്ഡലം പ്രസിഡന്റ് നിഷ എന്നിവര് പങ്കെടുത്തു.
