സംയുക്ത പ്രവേശന പരീക്ഷ (ഐഎന്‍ഐ- സിഇടി 2026) മേയ് 16ന്
ഏപ്രില്‍ 25 വരെ ഓണ്‍ലൈനില്‍ അപേക്ഷിക്കാം
വിശദവിവരങ്ങള്‍ www.aiimsexam.ac.in ല്‍
അഡ്മിഷന്‍ എംഡി/ എംഎസ്/ എംസിഎച്ച്/ ഡിഎം/ എംഡിഎസ് കോഴ്‌സുകളില്‍
ദേശീയ പ്രാധാന്യമുള്ള എയിംസുകള്‍, ജിപ്‌മെര്‍ പുതുച്ചേരി, നിംഹാന്‍സ് ബെംഗളൂരു, പിജിമെര്‍ ചണ്ടിഗാര്‍, ശ്രീചിത്തിര തിരുനാള്‍ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സ് ആന്റ് ടെക്‌നോളജി തിരുവനന്തപുരം എന്നിവിടങ്ങളില്‍ 2026 സെഷന്‍ മെഡിക്കല്‍ പിജി (എംഡി/ എംഎസ്/ എംസിഎച്ച് (6 വര്‍ഷം) എംഡിഎസ്/ എംഡി ഹോസ്പിറ്റല്‍ അഡ്മിനിസ്‌ട്രേഷന്‍ കോഴ്‌സുകളിലേക്കുള്ള കംപ്യൂട്ടര്‍ അധിഷ്ഠിത സംയുക്ത പ്രവേശന പരീക്ഷ (ഐഎന്‍ഐ- സിഇടി) മേയ് 16ന് രാജ്യത്തെ തെരഞ്ഞെടുക്കപ്പെട്ട നഗരങ്ങളില്‍ നടത്തും. ഓള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസ് (എയിംസ്) ന്യൂദല്‍ഹിയാണ് പരീക്ഷ സംഘടിപ്പിക്കുന്നത്. മൂന്ന് മണിക്കൂര്‍ ദൈര്‍ഘ്യമുള്ള പരീക്ഷയില്‍ ഒബ്ജക്ടീവ് മാതൃകയിലുള്ള 200 ചോദ്യങ്ങളുണ്ടാവും ശരി ഉത്തരത്തിന് ഒരു മാര്‍ക്ക്, ഉത്തരം തെറ്റിയാല്‍ 1/3 മാര്‍ക്ക് വീതം കുറയ്‌ക്കും. ഐഎന്‍ഐ- ഡിഇടിയില്‍ നേടുന്നവര്‍ പെര്‍സെന്റൈല്‍ സ്‌കോര്‍ അടിസ്ഥാനത്തിലാണ് പ്രവേശനം. പരീക്ഷാഘടനയും സിലബസും അപേക്ഷാ സമര്‍പ്പണത്തിനുള്ള നിര്‍ദ്ദശങ്ങളും പ്രവേശന നടപടികളും അടങ്ങിയ 2026 ലെ പ്രോസ്‌പെക്ടസ് www.aiimsexams.ac.in ല്‍ ലഭിക്കും.
അപേക്ഷാഫീസ് 4000 രൂപ. എസ്‌സി/ എസ്ടി വിഭാഗങ്ങള്‍ക്ക് 3200 മതി. ഡബിറ്റ്, ക്രഡിറ്റ് കാര്‍ഡ് മുഖേന ഫീസ് അടയ്‌ക്കാം. ഭിന്നശേഷിക്കാര്‍ക്ക് ഫീസില്ല.
55 ശതമാനം മാര്‍ക്കില്‍ കുറയാതെ (എസ്‌സിഎസ്ടി വിഭാഗങ്ങള്‍ക്ക് 50 ശതമാനം മതി) അംഗീകൃത എംബിബിഎസ്/ ബിഡിഎസ് ബിരുദമുള്ളവര്‍ക്ക് പരീക്ഷയില്‍ പങ്കെടുക്കാം. 12 മാസത്തെ കമ്പല്‍സറി റൊട്ടേറ്റിംഗ് ഇന്റേണ്‍ഷിപ്പ്/ പ്രാക്ടിക്കല്‍ ട്രെയിനിംഗ് 2026 ജൂലൈ 31 നകം പൂര്‍ത്തിയാക്കണം.
ഓണ്‍ലൈനില്‍ ഏപ്രില്‍ 25 വൈകിട്ട് 5 മണിവരെ രജിസ്റ്റര്‍ ചെയ്ത് അപേക്ഷിക്കാം. തെറ്റുള്ളപക്ഷം തിരുത്തുന്നതിന് ഏപ്രില്‍ 30 മുതല്‍ മേയ് രണ്ട് വരെ സൗകര്യമുണ്ടാവും. അന്തിമ രജിസ്‌ട്രേഷന്‍ സ്റ്റാറ്റസും അഡ്മിറ്റ്കാര്‍ഡും മേയ് 4ന് വെബ്‌സൈറ്റില്‍ ലഭ്യമാകും.
