മാഞ്ചസ്റ്റര്‍: ഇംഗ്ലീഷ് പ്രീമിയര്‍ ലീഗ് കിരീടനേട്ടത്തിലേക്ക് അടുക്കുമ്പോള്‍ കൂടുതല്‍ പിരിമുറുക്കത്തിലേക്ക്. സീസണില്‍ ഒന്നാം സ്ഥാനത്ത് തുടര്‍ന്നുകൊണ്ടിരിക്കുന്ന ആഴ്‌സണലും രണ്ടാമതുള്ള സിറ്റിയും തമ്മിലുള്ളത് മൂന്ന് പോയിന്റിന്റെ വ്യത്യാസം മാത്രം. സിറ്റിയുടെ എത്തിഹാദ് സ്‌റ്റേഡിയത്തില്‍ ഭാരത സമയം ഇന്നലെ പുലര്‍ച്ചെ നടന്ന കളിയില്‍ സിറ്റി 2-1ന് വിജയിച്ചു.
സീസണില്‍ മങ്ങിയ നിലയില്‍ കളിച്ചുവരുന്ന സിറ്റി പ്രതാപം വീണ്ടെടുക്കുന്ന പ്രകടനമാണ് ഇന്നലെ കാഴ്‌ച്ചവച്ചത്. ഒരുമാസം മുമ്പ് ഇഎഫ്എല്‍ കപ്പ് ഫൈനലിന്റെ മറ്റൊരു പതിപ്പാണ് ഇന്നലെ കണ്ടത്. അന്ന് സിറ്റി എതിരില്ലാത്ത രണ്ട് ഗോളിനാണ് വിജയിച്ചതെങ്കില്‍ ഇന്നലെ ആഴ്‌സണലിന് സിറ്റിയുടെ രണ്ട് ഗോളുകള്‍ക്കുമിടെ ഒരു ഗോള്‍ കണ്ടെത്താനായെന്നത് മാത്രമാണ് ആശ്വാസം.
തുടക്കം മുതല്‍ ഒടുക്കം വരെ പെപ്പ് ഗ്വാര്‍ഡിയോളയുടെ സിറ്റി ആഴ്‌സണല്‍ ഗോള്‍മുഖത്ത് കാഴ്‌ച്ചവച്ച ആക്രമണത്തിന്റെ ടെംപോ അതേ പടി നിലനിന്നു. ആഴ്‌സണല്‍ കളത്തില്‍ കുതിച്ചുപായുന്ന സിറ്റി താരങ്ങള്‍ക്കിടെ ആഴ്‌സണല്‍ നനഞ്ഞ പടക്കങ്ങളാകുകയായിരുന്നു. 16-ാം മിനിറ്റില്‍ ആഴ്‌സണല്‍ പ്രതിരോധ നിരയെ കീറിമുറിച്ചൊരു തകര്‍പ്പന്‍ മുന്നേറ്റത്തിനൊടുവില്‍ റയാന്‍ ചേര്‍കിയാണ് സിറ്റിക്കായി ആദ്യ ഗോള്‍ നേടിയത്. 18-ാം മിനിറ്റില്‍ തന്നെ ആഴ്‌സണല്‍ തിരിച്ചടിച്ചു. പക്ഷെ സിറ്റി ഗോളി ജിയാന്‍ലൂയിജി ഡന്നരുമ വരുത്തിയ വളരെ അശ്രദ്ധമായൊരു പിഴവില്‍ നിന്ന് ബോണസ് പോലെ വീണു കിട്ടിയതായിരുന്നു ആ ഗോള്‍. ജര്‍മന്‍ താരം കായി ഹാവെര്‍ട്‌സ് ആണ് ഗോള്‍ നേടിയത്.
ആദ്യപകുതി സമനിലയില്‍ കലാശിച്ചെങ്കിലും സിറ്റിയുടെ കളത്തില്‍ സിറ്റിയുടെ വാഴ്‌ച്ചയ്‌ക്ക് മുന്നില്‍ ആഴ്‌സണലിന് മറുപടി ഉണ്ടായില്ല. രണ്ടാം പകുതിയിലും സിറ്റി തന്നെ മത്സരം നയിക്കുന്ന കാഴ്‌ച്ചയാണ് മാഞ്ചസ്റ്ററില്‍ കണ്ടത്. 66-ാം മിനിറ്റില്‍ ഗംഭീരമായൊരു ഫിനിഷിങ്ങിലൂടെ സൂപ്പര്‍ താരം എര്‍ലിങ് ഹാളണ്ട് സിറ്റിക്കായി വിജയഗോള്‍ നേടി. വീറും വാശിയും മുറ്റിനിന്ന പോരാട്ടം താരങ്ങള്‍ തമ്മിലുള്ള കയ്യാങ്കളിയുടെ വക്കോളമെത്തി. ആഴ്‌സണലിന്റെ ഗബ്രിയേല്‍ മഗള്‍ഹീസും സിറ്റിയുടെ ഹാളണ്ടും പരസ്പരം ശിരസ്സുകള്‍ ചേര്‍ത്ത് വച്ച് വെല്ലുവിളിക്കുന്ന സ്ഥിതിയിലേക്ക് വരെ കാര്യങ്ങളെത്തി. കളത്തിന് സൈഡ്‌ലൈനില്‍ പെപ് ഗ്വാര്‍ഡിയോളയും ആര്‍ട്ടേറ്റയും തമ്മിലും പരസ്പരം പോരടിക്കുന്ന തരത്തിലേക്ക് വരെ മത്സരത്തിന്റെ തീവ്രത നീണ്ടു.
ലീഗില്‍ ആഴ്‌സണലിന്റെ തുടര്‍ച്ചയായ നാലാം തോല്‍വി
സീസണില്‍ കരുത്തന്‍ കുതിപ്പ് തുടര്‍ന്നുവന്ന ആഴ്‌സണല്‍ കഴിഞ്ഞ നാല് പ്രീമിയര്‍ ലീഗ് മത്സരങ്ങളില്‍ തുടര്‍ തോല്‍വി നേരിട്ടിരിക്കുകയാണ്. ഇഎഫ്എല്‍ കപ്പില്‍ സിറ്റിയോട് പരാജയപ്പെട്ടതിന് ശേഷം അര്‍ട്ടേറ്റയുടെ പടയ്‌ക്ക് ആത്മവിശ്വാസം കുറഞ്ഞതുപോലെയായി. ഇതിനിടെ ചാമ്പ്യന്‍സ് ലീഗ് ക്വാര്‍ട്ടറില്‍ സ്‌പോര്‍ട്ടിങ്ങിനെ പരാജയപ്പെടുത്തിയെങ്കിലും ആഴ്‌സണലിന്റെ വമ്പിന് ചേര്‍ന്നതായിരുന്നില്ല സ്‌കോര്‍ നില. രണ്ട് പാദങ്ങളിലുമായി 1-0നായിരുന്നു ആഴ്‌സണല്‍ വിജയം. ടീമിന്റെ അടുത്ത പ്രീമിയര്‍ ലീഗ് പോരാട്ടം ശനിയാഴ്‌ച്ച ന്യൂകാസില്‍ യുണൈറ്റഡിനെതിരെയാണ്.
നിലവില്‍ 33 കളികളില്‍ നിന്നാണ് ആഴ്‌സണലിന് 70 പോയിന്റുള്ളത്. സിറ്റിക്ക് 67 പോയിന്റുമായാണ് രണ്ടാം സ്ഥാനത്ത് തുടരുന്നതെങ്കിലും 32 മത്സരങ്ങളേ കളിച്ചിട്ടുള്ളൂ.
