മുംബൈ: ശത്രുവിന്റെ റഡാറുകള്ക്ക് ഒരു സന്ദേശവും നല്കാതെ മുങ്ങിക്കപ്പലുകള്ക്ക് കടലിനടയില് ഏത്ര നേരം വേണമെങ്കിലും പതുങ്ങിയിരിക്കാനും യാത്ര ചെയ്യാനും സഹായിക്കുന്ന സ്റ്റെല്ത്ത് സാങ്കേതിക വിദ്യയില് ഇന്ത്യ ന് നാവികസേന സ്വയം പര്യാപ്തത കൈവരിക്കുന്നു. പ്രതിരോധരംഗത്തെ ആത്മനിര്ഭരതയില് മറ്റൊരു വമ്പന്കുതിപ്പ്. നേരത്തെ സ്റ്റെല്ത്ത് സാങ്കേതികവിദ്യയ്ക്ക് 100 ശതമാനവും വിദേശരാജ്യങ്ങളെ ആശ്രയിച്ചിരുന്ന നാവിക സേന മെയ്ക്ക് ഇന് ഇന്ത്യയുടെ ഭാഗമായി ഈ മേഖലയില് സ്വന്തം പാത വെട്ടിത്തുറക്കുകയാണ്.
ശബ്ദവീചികള് പുറപ്പെടുവിക്കാതിരിക്കാന് മുങ്ങിക്കപ്പലുകള്ക്ക് റബ്ബര് ടൈല് കൊണ്ട് പൊതിഞ്ഞ ബോഡിയാണ് തയ്യാറാക്കുന്നത്. കപ്പലിന്റെ പള്ളയിലാണ് (ഹള്) റബ്ബര് ടൈലുകള് ഉപയോഗിക്കുക. കടലില് വെള്ളത്തില് മുങ്ങിക്കിടക്കുന്ന ഭാഗമാണ് ഹള്. മുങ്ങിക്കപ്പല് സഞ്ചരിക്കുമ്പോള് വെള്ളത്തിലേക്ക് ശബ്ദവീചികള് കൂടി പ്രസരിക്കുക സ്വാഭാവികമാണ്. ഈ ശബ്ദവീചികള് പിടിച്ചെടുത്താണ് ശത്രുവിന്റെ റഡാറുകള് മുങ്ങിക്കപ്പലുകളെ കണ്ടുപിടിക്കുക. ഈ ശബ്ദുവീചികള് പുറപ്പെടുവിക്കാതിരിക്കാനും നിശ്ശബ്ദമായി പതുങ്ങിയിരിക്കാനും ഉള്ള ശേഷി നല്കുന്നത് കപ്പലിന്റെ പള്ളയെ പൊതിഞ്ഞിരിക്കുന്ന പദാര്ത്ഥമാണ്. റബ്ബര് ടൈലുകള് മുങ്ങിക്കപ്പലുകള്ക്ക് അക്കൗസ്റ്റിക് സ്റ്റെല്ത് ശേഷി കൈവരിക്കാന് സഹായിക്കും.
അങ്ങിനെ മുങ്ങിക്കപ്പലുകളുടെ സ്റ്റെല്ത് ശേഷിയുടെ കാര്യത്തിലും ഇന്ത്യയുടെ നാവിക സേന മുന്നേറ്റത്തിനൊരുങ്ങുകയാണ്. ഇത്തരം റബ്ബര് ടൈല് പോലുള്ള സിന്തറ്റിക് ടൈലുകള് നിശ്ശബ്ദമായി വെള്ളത്തിനടിയിലൂടെ കുതിക്കാന് മുങ്ങിക്കപ്പലുകളെ സഹായിക്കും. ഇത് മുങ്ങിക്കപ്പലുകളുടെ കടലിനടിയിലെ യുദ്ധസമാര്ത്ഥ്യം വര്ധിപ്പിക്കും.
റബ്ബര് ടൈലുകള് കൊണ്ട് കപ്പലിന്റെ ശരീരത്തെ പൊതിയുക എന്ന് പറഞ്ഞാല് സിംപിളാണ്. പക്ഷെ അത്യന്തം ദുഷ്കരമായ എഞ്ചിനീയറിംഗ് വശം ഇതില് ഒളിഞ്ഞിരിക്കുന്നു. കടല്വെള്ളത്തിലേക്ക് ശബ്ദം പ്രസരിപ്പിക്കാതിരിക്കാന് പല പാളികളിലായി ദുഷ്കരമായ ഇലക്ട്രോണിക് സംവിധാനങ്ങള് കൂടി ചേര്ക്കേണ്ടതുണ്ട്. കഴിഞ്ഞ എത്രയോ ദശകങ്ങളായി വിദേശരാജ്യങ്ങള് മാത്രം ആശ്രയിച്ചിരുന്ന ഇന്ത്യ സുപ്രധാനമായ പ്രതിരോധ ശേഷിയാണ് ഇതുവഴി കൈവരിച്ചിരിക്കുന്നത്. ഇന്ത്യയുടെ പ്രതിരോധ രംഗത്തെ ആത്മനിര്ഭര് ശേഷി വര്ധിക്കുകയാണ് ഇതിലൂടെ. പ്രതിരോധ സാങ്കേതിക വിദ്യ നൂറ് ശതമാനവും തദ്ദേശീയമായി നിര്മിക്കുക, കഴിവതും വിദേശരാജ്യങ്ങളെ ആശ്രയിക്കാതിരിക്കുക എന്നതാണ് മോദി സര്ക്കാരിന്റെ പ്രതിരോധരംഗത്തെ നയം.
