കൊച്ചി: പുതിയ പരിശീലകന്‍ ആഷ്‌ലി വെസ്റ്റ് വുഡിന് കീഴില്‍ നാലാം മത്സരത്തിനായ് കേരള ബ്ലാസ്റ്റേഴ്സ് ഇന്ന് കലൂര്‍ സ്റ്റേഡിയത്തില്‍ ഇറങ്ങും. വൈകീട്ട് അഞ്ചിന് നടക്കുന്ന പോരാട്ടത്തില്‍ കരുത്തരായ ജംഷെഡ്പുര്‍ എഫ്‌സി ആണ് എതിരാളികള്‍.
വിഷുദിനത്തില്‍ നടന്ന ഹോം മത്സരത്തില്‍ നോര്‍ത്ത് ഈസ്റ്റ് യുണൈറ്റഡിനോട് സമനില പാലിച്ചിരുന്നു. അതിന് മുമ്പ് ബെംഗളൂരു എഫ്‌സിയെ അവരുടെ തട്ടകത്തില്‍ തോല്‍പ്പിച്ച് ബ്ലാസ്റ്റേഴ്സ് സീസണിലെ വിജയ ദാഹം തീര്‍ത്തിരുന്നു. ഇന്നത്തെ മത്സരത്തിലൂടെ ഇത്തവണത്തെ രണ്ടാം വിജയത്തില്‍ കുറഞ്ഞൊന്നും പ്രതീക്ഷിക്കുന്നില്ലെന്ന് കോച്ച് ആഷ്‌ലി വെസ്റ്റ് വുഡ് വാര്‍ത്താ സമ്മേളനത്തില്‍ പറഞ്ഞു.
സീസണില്‍ ഇതുവരെ ഒമ്പത് മത്സരങ്ങളില്‍ കളിച്ച ബ്ലാസ്റ്റേഴ്സ് ഒരു വിജയവും രണ്ട് സമനിലയും സഹിതം അഞ്ച് പോയിന്റ് മാത്രമാണ് നേടിയിട്ടുള്ളത്. ആറ് മത്സരങ്ങളില്‍ പരാജയപ്പെട്ട ടീം പട്ടികയില്‍ 13-ാം സ്ഥാനത്താണ്. കളിച്ച എട്ട് മത്സരങ്ങളില്‍ നാലെണ്ണം മാത്രം വിജയിച്ച ജംഷെഡ്പുര്‍ 15 പോയിന്റുമായി പട്ടികയില്‍ അഞ്ചാം സ്ഥാനത്താണ്.
