തിരുവനന്തപുരം: ചിക്കന് മന്തി കഴിക്കുന്ന ഉണ്ണിക്കണ്ണന്റെ ചിത്രം വച്ച് വിഷു ആശംസാസന്ദേശം നല്കിയ ഹോട്ടലിന്റെ പരസ്യത്തിന്റെ പേരില് വിദ്വേഷ പ്രചാരണം പാടില്ലെന്ന് കേരള പൊലീസ്. മതവികാരം വ്രണപ്പെടുത്തിയതിന് ഹോട്ടല് ഉടമയ്ക്കെതിരെ കേസെടുത്തിട്ടുണ്ട്. വിഷയത്തില് നിയമ നടപടികള് പുരോഗമിക്കുകയാണ്.ഈ അവസരത്തില് സാമൂഹ്യ മാധ്യമങ്ങളില് ഉള്പ്പെടെ വിദ്വേഷ പ്രചാരണം നടത്തിയാല് കര്ശന നടപടികള് സ്വീകരിക്കുമെന്ന് പൊലിസ് ഫെയ്സ്ബുക്ക് പോസ്റ്റില് അറിയിച്ചു.
മതസ്പര്ദ്ധ വളര്ത്തുന്ന പോസ്റ്റുകള് പ്രചരിപ്പിക്കുകയോ സമുദായങ്ങള്ക്കിടയില് ഭിന്നിപ്പുണ്ടാക്കാന് ശ്രമിക്കുകയോ ചെയ്യുന്നവര്ക്കെതിരെ കര്ശന നിയമനടപടി സ്വീകരിക്കും. ഇത്തരം വിദ്വേഷ പ്രചരണങ്ങള് നടത്തുന്നവരെ ഉടനടി കണ്ടെത്തുന്നതിനായി സൈബര് പൊലീസ് നിരീക്ഷണം ശക്തമാക്കി. സാമൂഹിക മാധ്യമ അക്കൗണ്ടുകള് നീക്കം ചെയ്യുമെന്ന് പൊലീസ് അറിയിച്ചു.
ചേര്ത്തലയിലെ മെഹര് മന്തിക്കട ഉടമകളിലൊരാളായ ഹര്ഷാദിനെയാണ് പൊലീസ് അറസ്റ്റ് ചെയ്തത്. ഇയാളെ പിന്നീട് ജാമ്യത്തില് വിട്ടു.ആലപ്പുഴയിലെ അഭിഭാഷകന്റെ പരാതിയിലാണ് കേസെടുത്തത്.
